ધનકુબેર / લોકડાઉન થયું ત્યારથી દર કલાકે અંબાણીની કમાણી 90 કરોડ રૂપિયા, લિસ્ટમાં અદાણી ચોથા ક્રમે

• રિલાયન્સ ઇન્ડસ્ટ્રીઝના મુકેશ અંબાણી સતત નવમા વર્ષે ટોચ પર
• અંબાણીની કુલ સંપત્તિ 6,58,400 કરોડ રૂપિયા છે
• 1,43,700 કરોડ રૂપિયાની સંપત્તિ સાથે હિન્દુજા બ્રધર્સ બીજા સ્થાને છે
• એવન્યુ સુપરમાર્ટ્સના સ્થાપક રાધાકિશન દમાણી પહેલીવાર ટોપ 10માં 

મુકેશ અંબાણી સતત નવમા વર્ષે અગ્રેસર : 

હુરુન ઇન્ડિયાની ટોપ ધનવાન લોકોની યાદીમાં મુકેશ અંબાણી સતત નવમા વર્ષે ટોપ પર છે અને ભારતનાં સૌથી ધનવાન વ્યક્તિ રહ્યા છે, આ યાદીમાં તેમની પાસે 6,58,400 કરોડ રૂપિયાની સંપત્તિ છે. ખાસ વાત કે કે લોકડાઉન બાદ પણ તેમની સંપત્તિમાં દર કલાકે 90 કરોડ રૂપિયાનો વધારો જોવા મળ્યો છે. આ યાદીમાં બીજા સ્થાન પર 1,43,700 કરોડ રૂપિયાની સંપત્તિની સાથે હિન્દુજા બ્રધર્સ બીજા સ્થાન પર છે. 

ચોથા સ્થાન પર ગૌતમ અદાણીનું નામ 

આ વર્ષે સૂચીમાં 828 ભારતીયો છે જેમાં લંડનમાં રહેતા હિન્દુજા બ્રધર્સ કુલ 1,43,700 કરોડ રૂપિયાની સંપત્તિ સાથે બીજા સ્થાન પર આવ્યા છે. આ સિવાય HCLના સંસ્થાપક શિવ નાડર 1,41,700 કરોડ રૂપિયાની સંપત્તિ સાથે ત્રીજા જ્યારે ગૌતમ અદાણી ચોથા અને અઝીમ પ્રેમજી પાંચમાં સ્થાન પર છે. 

ગુજરાતમાં અદાણી નંબર વન : 

ગુજરાતીઓમાં જેટલા પણ ધનવાન વ્યક્તિઓ છે તેમાં ગૌતમ અદાણી સૌથી અગ્રેસર છે અને તેમનું નામ ભારતનાં પાંચ સૌથી ધનવાન વ્યક્તિઓમાં પણ સમાવેશ થાય છે.

ધનવાન ગુજરાતીઓમાં મોટા ભાગના ફાર્માસ્યુટિકલ અને જવેલરી ક્ષેત્રનાં : 

વર્ષ 2020ની હુરુન ધ રિચેસ્ટ પીપલ ઇન ઇન્ડિયાની યાદીમાં કુલ 60 ગુજરાતીઓનો સમાવેશ થાય છે. જે 60 ગુજરાતીઓનો આ લિસ્ટમાં સમાવેશ થયો છે તેમાં ફાર્માસ્યુટિકલ અને જવેલરી ક્ષેત્રનાં જ 48% લોકો છે. ગયા વર્ષની યાદીની તુલનામાં વર્ષે ગુજરાતીઓની કુલ સંપત્તિમાં 32%નો વધારો નોંધાયો છે.  

નવા ઉમેરાયેલા લોકોની સંખ્યામાં પણ ગુજરાતનો સિંહફાળો : 

હુરુન ઇન્ડિયા રીચ લિસ્ટમાં જેટલા નવા નામો ઉમેરાયા છે તેમાં 12 ગુજરાતીઓનો સમાવેશ થાય છે. આ યાદી કુલ 828 લોકોની છે જેમાં 162 નવા ચેહરાની એન્ટ્રી થઇ છે, જેમાં અશોક સૂતાનું નામ પણ સામેલ થયું છે. જેટલા નવા નામો ઉમેરાયા છે તેમાંથી 12 ગુજરાતીઓ છે. નોંધનીય છે કે 229 લોકો એવા પણ છે જેમની સંપત્તિમાં ઘટાડો સામે આવ્યો છે. નોંધનીય છે કે ગુજરાતીઓની ધનવાન લોકોની યાદીમાં એક પણ મહિલાનો સમાવેશ થતો નથી.

ગુજરાતના ધનવાન વ્યક્તિઓની પહેલી પસંદ અમદાવાદ : 

ગુજરાતમાં ધનવાન વ્યક્તિઓની પહેલી પસંદ અમદાવાદ છે અને મોટા ભાગનાં અમીરો માટે અમદાવાદ પહેલી પસંદ છે કારણ કે 63% ધનવાન વ્યક્તિઓ અમદાવાદમાં રહે છે.