મુકેશ અંબાણી દેશના સૌથી ધનિક વ્યક્તિ છે. તેણે નવી બુલેટ પ્રૂફ કાર Mercedes S600 Guard ખરીદી છે.
મળતી માહિતી મુજબ, અત્યારે મુકેશ અંબાણી તેમની હાઇ સિક્યુરિટી બુલેટ પ્રૂફ કાર BMW 7-Seriesમાં મુસાફરી કરે છે.
તાજેતરમાં જ આ નવી મર્સિડીઝ બેન્ઝ કાર તેમના ઘરે પહોંચાડાઇ છે. એવું કહેવામાં આવી રહ્યું છે કે આ કારનો થોડા સમય પહેલા ઓર્ડર અપાયો હતો, અને હવે આ કારને કસ્ટમાઇઝ કરીને ડિલીવર કરવામાં આવી છે.
કિંમત આશરે 10 કરોડ
માનવામાં આવી રહ્યું છે કે ટૂંક સમયમાં આ કાર મુકેશ અંબાણીના કાફલામાં શામેલ થઈ જશે. જો કે હાલ આ કારની કિંમત વિશે કોઈ સત્તાવાર માહિતી મળી નથી. પરંતુ નિષ્ણાતો માને છે કે તેની કિંમત આશરે 10 કરોડ હશે.
આવી કારની કિંમત કસ્ટમાઈઝેશન અને કસ્ટમરની ડિમાન્ડ ઉપર નિર્ભર હોય છે. જેમ જેમ સિક્યોરિટી ફીચર્સ વધતા જાય તેમ તેમ કારની કિંમત વધતી જાય છે.
VR 10 લેવલની સુરક્ષા સિસ્ટમ
મુકેશ અંબાણીની નવી Mercedes S600 Guard દેખાવમાં રેગ્યુલર મોડેલ જેવી જ છે. સિલ્વર કલરની આ કાર ખૂબ જ લક્ઝુરિયસ છે. આ કાર Mercedes Maybach S600 સેડાન પર આધારિત છે અને VR 10 લેવલની સુરક્ષા સિસ્ટમનો ઉપયોગ કરે છે.
ખૂબ સુરક્ષિત છે આ કાર
એવું કહેવામાં આવી રહ્યું છે કે આ કાર ઓટોમેટિક ગન્સના ફાયરિંગને અને લગભગ 2 મીટરના અંતરેથી 15 કિલોગ્રામ TNT બ્લાસ્ટને સરળતાથી સહન કરી શકે છે. આમાં ઘણી શ્રેષ્ઠ સુવિધાઓનો સમાવેશ કરવામાં આવ્યો છે. આ ગાડીમાં પોલીકાર્બોનેટ કોટેડ વિંડો છે. આ સિવાય કારની બોડી ખાસ પ્રકારની સ્ટ્રોંગ સ્ટીલમાંથી બનાવવામાં આવી છે.
જો એન્જિનની વાત છે તો આ કારમાં કંપનીએ V12 6.0 લિટરની ક્ષમતાવાળા ટર્બો ચાર્જ્ડ પેટ્રોલ એન્જિનનો ઉપયોગ કર્યો છે. જે 523 BHPનો મજબૂત પાવર અને 850 Nmનો ટોર્ક જનરેટ કરે છે. તેમાં 7 સ્પીડ ઓટોમેટિક ટ્રાન્સમિશન ગિયરબોક્સ શામેલ છે. આ સિવાય કારના વજન અનુસાર સસ્પેન્શન રિટયુન કરી શકાય છે.