ઇન્ડસ્ટ્રી / હવે બાળકો માટે રમકડાં બનાવશે મુકેશ અંબાણી, આ કંપની ખરીદવાની તૈયારીમાં રિલાયન્સ

દુનિયાના 13માં સૌથી અમીર બિઝનેસમેન મુકેશ અંબાણી હવે રમકડાંનો બિઝનેસ શરૂ કરવા જઇ રહ્યા છે. એના માટે એ લંડનની રમકડાં બનાવનાર કંપની ખરીદવા જઇ રહ્યા છે. આ કંપનીનું નામ હેમલીઝ છે. જો મુકેશ અંબાણી આ કંપનીને ખરીદવામાં સફળ રહે છે તો ભારતમાં રમકડાના માર્કેટમાં એમનું પ્રભુત્વ સ્થાપિત થઇ જશે. બંને કંપની વચ્ચે છેલ્લા તબક્કાની વાત ચાલી રહી છે. જે જલ્દી ફાઇનલ થાય એવું જાણવા મળી રહ્યું છે.

તમને જણાવી દઇએ કે મુકેશ અંબાણી છેલ્લા કેટલાક વર્ષથી નવા વેપારમાં રોકાણ કરવાનું પ્લાનિંગ બનાવી રહ્યા છે. થોડાક દિવસો પહેલા એમને રિયલ એસ્ટેટમાં ઊતરવાની જાહેરાત કરી હતી. હેમલીઝની પાસે દુનિયાભરમાં 130 સ્ટોર છે, એમાંથી ભારતમાં 87 છે. ડિસેમ્બર 2018માં હેમલીઝને 92 લાખ પાઉન્ડનું નુકસાન થયું. એક વર્ષ પહેલા કંપનીને 17 લાખ પાઉન્ડનો નફો થયો હતો. 

કંઇક આવો છે મુકેશ અંબાણીનો પ્લાન 
બીજી બાજુ રિલાયન્સ હાલના વર્ષમાં હેમલીઝના સ્ટોર્સની સંખ્યા વધારવાનું કામ કરવા જઇ રહી છે. મુકેશ અંબાણીએ આ વર્ષે ઇ કોમર્સ માર્કેટપ્લેસ લોન્ચ કરવાની પણ જાહેરાત કરી છે. જેમાં હેમલીધની પ્રોડક્ટ્સને પણ રાખવામાં આવશે. તમને જણાવી દઇએ કે રિલાયન્સ પોતાનું ઇ કોમર્સ માર્કેટપ્લેસ લોન્ચ કરીને ખાવા પીવાના સામાનથી લઇને કપડા અને રમકડાં બધું વેચવામાં આવશે. રિલાયન્સ રિટેલ હેઠળ રિલાયન્સ ટ્રેન્ડ પાસે ભારતમાં સૌથી વધારે વિદેશી બ્રાન્ડના ટાયઅપ છે. જેનો ફાયદો ઊઠાવવા માટે રિલાયન્સ વિચારી રહી છે. 

હેમલીઝના માલિક ચીનની એક કંપની છે. રિલાયન્સ રિટેલની રિલાયન્સ બ્રાન્ડની પાસે હેમલીઝની ભારતની માસ્ટર ફ્રેન્ચાઇઝી છે. લંડનમાં રમકડાના જૂના સ્ટોરથી હેમલીઝ બ્રાન્ડ શરૂ થઇ હતી. ભારતમાં આ કંપની સૌથી મોટી ટૉય રિટેલર બનીને સામે આવી છે.