રિલાયન્સ ઈન્ડસ્ટ્રી લિમિટેડના ચેરમેન મુકેશ અંબાણી એક સફળ કારોબારી છે. મુકેશ અંબાણી જે પણ કારોબાર શરૂ કરે છે તેનું સફળ થવું નક્કી હોય છે. ટેલીકોમ કંપની રિલાયન્સ જિયો તેનું સૌથી મોટું સબૂત છે. હાલમાં મુકેશ અંબાણીએ ગ્રીન એનર્જી સેગમેન્ટમાં ઉતરવાની જાહેરાત કરી છે. તેની સફળતાને લઈને અત્યારથી જ ભવિષ્યવાણી થવા લાગી છે.
અમેરિકાની રિસર્ચ ફર્મે કરી છે ભવિષ્યવાણી
અમેરિકાની રિસર્ચ ફર્મે બ્રોકરેજ ફર્મ બરન્સ્ટેન રિસર્ચે કહ્યું કે રિલાયન્સ ઈન્ડસ્ટ્રીના ગ્રીન એનર્જી કારોબારને લઈને આવનારા 5 વર્ષમાં સફળતાના નવા શિખર સર કરશે. ફર્મનું કહેવું છે કે 5 વર્ષમાં રિલાયન્સના આ નવા ગ્રીન એનર્જી કારોબારની વેલ્યૂ વધીને 36 બિલિયન ડોલરની નજીક એટલે કે લગભગ 2.6 લાખ કરોડ રૂપિયા થશે. આ રિપોર્ટમાં કહેવાયું છે કે જો બધુ યોગ્ય રીતે ચાલશે તો 2026માં રિલાયન્સના કુલ એબિટામાં ગ્રીન એનર્જી કારોબારની લગભગ 10 ટકા ભાગીદારી હશે.
આ છે મુકેશ અંબાણીની યોજના
રિલાયન્સ ઈન્ડસ્ટ્રીના ચેરમેન મુકેશ અંબાણીએ ગયા મહિને આયોજિત એનુઅલ જનરલ મીટિંગમાં ગ્રીન એનર્જી કારોબાર શરૂ કરવાની જાહેરાત કરી હતી. આ કારોબારમાં રિલાયન્સ 75 હજાર કરોડ રૂપિયાનુ રોકાણ કરશે. તેમાંથી 60 હજાર કરોડ રૂપિયા 4 ગીગા ફેક્ટ્રીને સ્થાપિત કરવામાં ખર્ચ કરશે. આ ફેક્ટ્રીમાં સોલાર, બેટરી, ફ્યૂલ સેલ અને ઈલેક્ટ્રોલાઈઝરનું ઉત્પાદન કરાશે. આ ફેક્ટ્રી ગુજરાતના જામનગરમાં લગાવાશે. રિલાયન્સની યોજના 2030માં 100 ગીગીવોટ સોલર એનર્જીની ક્ષમતા તૈયાર કરવાની છે.
રિલાયન્સને ચેલેન્જનો કરવો પડશે સામનો
રિપોર્ટમાં કહેવાયું છે કે પહેલા પણ અનેક તેલ કંપનીઓએ ક્લીન એનર્જી મેન્યુફેક્ચરિંગ કંપની બનાવાની કોશિશ કરી પણ તેઓ સફળ રહ્યા નથી. રિલાયન્સનું મેન્યુફેક્ચરિંગ ફોકસ ઘણું અલગ છે અને શકયતા છે કે તેમાં વધારે માર્જિન મળી શકે છે. ક્લીન એનર્જીમાં સીમિત મેન્યુફેક્ચરિંગની ક્ષમતા રિલાયન્સની સામે મોટી ચેલેન્જ છે. આ ચેલેન્જને પાર પાડવા માટે રિલાયન્સને નવા ભાગીદારો શોધવાના રહેશે. આ ભાગીદારો ફ્યૂલ સેલ અને બેટરી મેન્યુફેક્ચરિંગ માટે ટેકનિકી જરૂરિયાતોને પૂરી કરશે.