ભારતમાં ક્રિપ્ટોકરન્સી બિલને લઈને મુકેશ અંબાણીએ મોટી વાત કરી હતી. તેમણે કહ્યું હતું કે ભારતને પોતાનું ડિજિટલ ઈન્ફ્રાસ્ટ્રક્ચર બનાવવા અને તેનું રક્ષણ કરવાનો સંપૂર્ણ અધિકાર છે.
દેશના સૌથી ધનિક વ્યક્તિ મુકેશ અંબાણીએ ક્રિપ્ટોકરન્સી બિલનું ખુલ્લેઆમ સમર્થન કર્યું છે. રિલાયન્સ ઇન્ડસ્ટ્રીઝના વડા અંબાણીએ પર્સનલ ઈન્ફર્મેશન અને ક્રીપ્ટો કરન્સીની સિક્યોરીટી અંગેના પ્રસ્તાવિત બિલને સમર્થન આપતાં કહ્યું છે કે ભારત આગળ લઈ જતી નીતિઓ અને નિયમો સાથે આવી રહ્યું છે. માહિતીને ડિજિટલ રીતે સંગ્રહિત કરવા માટે કડક પ્રણાલીના સમર્થક, અંબાણીએ કહ્યું હતું કે દેશોને તેમના વ્યૂહાત્મક ડિજિટલ ઈન્ફ્રાસ્ટ્રક્ચર બનાવવાનો અને તેની સુરક્ષા કરવાનો સંપૂર્ણ અધિકાર છે.
પ્રાઈવસીના હકનું રક્ષણ થવું જોઈએ
અંબાણીએ અંગત માહિતી અથવા ડેટાને નવી ઉપમા આપતા કહ્યું હતું કે દરેક નાગરિકના પ્રાઈવસીના હકનું રક્ષણ થવું જોઈએ. IFSCA ના નેજા હેઠળ આયોજિત ઇન્ફિનિટી ફોરમમાં અંબાણીએ કહ્યું, "ભારત દેશને આગળ લઈ જતી નીતિઓ અને નિયમો સાથે આવી રહ્યું છે."
તેમણે કહ્યું કે ભારતમાં આધાર, ડિજિટલ બેંક એકાઉન્ટ અને ડિજિટલ પેમેન્ટ દ્વારા ડિજિટલ ઓળખ માટે પહેલાથી જ મજબૂત ઈન્ફ્રાસ્ટ્રક્ચર છે. આવી સ્થિતિમાં, વ્યક્તિગત માહિતીની પ્રાઈવસી અને ક્રિપ્ટોકરન્સી માટેનું બિલ યોગ્ય પગલું છે.
ડિજિટલ ઈન્ફ્રાસ્ટ્રક્ચર ભારત માટે મહત્વનું
અંબાણીએ કહ્યું કે ડેટા અને ડિજિટલ ઈન્ફ્રાસ્ટ્રક્ચર ભારત અને વિશ્વના દરેક દેશ માટે વ્યૂહાત્મક રીતે મહત્વપૂર્ણ છે. દરેક દેશને આ વ્યૂહાત્મક ડિજિટલ ઈન્ફ્રાસ્ટ્રક્ચર બનાવવા અને તેનું રક્ષણ કરવાનો સંપૂર્ણ અધિકાર છે. જો કે, તેમણે ઉમેર્યું હતું કે ક્રોસ બોર્ડર રિલેશન્સ અને પાર્ટનરશિપ પર તેની અસર તપાસવા માટે વૈશ્વિક ધોરણની જરૂર છે.
દરેક નાગરિકની પ્રાઈવસીના રક્ષણ પર ભાર મૂકતા, તેમણે કહ્યું હતું કે યોગ્ય નીતિઓ અને નિયમનકારી માળખું લાવીને, વ્યક્તિગત માહિતી અને ડિજિટલ ઇન્ફ્રાસ્ટ્રક્ચરને સુરક્ષિત કરવા માટે દેશની જરૂરિયાત સાથે સંતુલન બનાવવું પડશે.
બ્લોકચેન ટેકનોલોજી ઉપયોગી
તે પોતાની જાતને બ્લોકચેન ટેક્નોલોજીના મજબૂત સમર્થક તરીકે વર્ણવે છે અને કહે છે કે તે ક્રિપ્ટોકરન્સીથી અલગ છે. બ્લોકચેન ટેકનોલોજી સારા સમાજ માટે ખૂબ જ મહત્વની છે. તેનો ઉપયોગ સપ્લાય ચેઈનને આધુનિક બનાવવા માટે થઈ શકે છે જે આપણા અર્થતંત્રનું જીવન છે.
અંબાણીએ કહ્યું કે દેશ સંપૂર્ણપણે 2G થી 4G માં બદલાઈ રહ્યો છે. પરંતુ આવતા વર્ષે 5Gના આગમન સાથે, ભારત સૌથી અદ્યતન ડિજિટલ ઈન્ફ્રાસ્ટ્રક્ચર ધરાવતા દેશોમાં સામેલ થઈ જશે.