રિપોર્ટ / મુકેશ અંબાણીની સંપત્તિ વધી, દુનિયાના 5મા નંબરના અમીર બનતા આ વ્યક્તિના રેકિંગ પર આવ્યો ખતરો

• મુકેશ અંબાણીની સંપત્તિમાં થયો મોટો વધારો
• 75 અરબ ડોલરની સંપત્તિ સાથે દુનિયામાં 5મા નંબરે પહોંચ્યા
• ફેસબુક ફાઉન્ડર માર્ક ઝકરબર્ગની આવ્યા નજીક

સંપત્તિની બાબતમાં મુકેશ અંબાણી હવે ફેસબુકના ફાઉન્ડર માર્ક ઝકરબર્ગ (89 અરબ ડોલર)ની નજીક આવી ચૂક્યા છે. બંનેની સંપત્તિમાં હાલમાં ઘણું અંતર છે. ઉલ્લેખનીય છે કે ફોર્બ્સ અરબપતિની સંપત્તિઓનું મૂલ્યાંકન કરે છે. દુનિયાભરમાં શેરબજારના ઉતાર-ચઢાવના કારણે ફોર્બ્સનો આંકડો બદલાતો રહે છે. 

જાણો મુકેશ અંબાણી પહેલાં કોણ કોણ છે

હાલમાં જાહેર કરાયેલી ફોર્બ્સની યાદીમાં પહેલા સ્થાને 185.8 અરબ ડોલર સાથે અમેઝોનના જેફ બેસોસ છે. ત્યારબાદ 113.1 અરબ ડોલરની સંપત્તિ સાથે બિલ ગેટ્સ, 112 અરબ ડોલરની સંપત્તિ સાથે એલવીએમએચના બર્નાર્ડ અર્નોલ્ટ એન્ડ ફેમિલિ ત્રીજા સ્થાને છે. ચોથા સ્થાને લગભગ 89 અરબ ડોલર સાથે ફેસબુકના માર્ક ઝકરબર્ગ રહ્યા છે. હવે 5મા ક્રમે 75 અરબ ડોલર સાથે મુકેશ અંબાણી આવી ચૂક્યા છે. ઉલ્લેખનીય છે કે 72.7 અરબ ડોલરની સંપત્તિ સાથે બર્કશાયર હેથવે છઠ્ઠા ક્રમે છે. 

રિલાયન્સને કઈ બાબતનો થયો ફાયદો

રિલાયન્સ ઈન્ડસ્ટ્રીએ હાલમાં રાઈટ ઈશ્યૂ અને જિયો પ્લેટફોર્મ્સમાં સંયુક્ત રીતે રોકાણ અને બીપીના રોકાણની મદદથી કુલ 2,12,809 કરોડ રૂપિયા મેળવ્યા છે. તેનો ફાયદો કંપનીના શેર ભાવ અને માર્કેટ કેપ પર પણ જોવા મળ્યો છે. રિલાયન્સ ઈન્ડસ્ટ્રીના માર્કેટ કેપમાં પણ ઝડપથી વધારો થયો છે. ઉલ્લેખનીય છે કે રિલાયન્સ ઈન્ડસ્ટ્રીનું માર્કેટ કેપ છેલ્લા 6 વર્ષમાં 10 લાખ કરોડ રૂપિયા વધ્યું છે. તેમાંથી 4 લાખ કરોડ રૂપિયાનો વધારો છેલ્લા 10 મહિનામાં થયો છે. તમને જણાવી દઈએ કે રિલાયન્સ ઈન્ડસ્ટ્રી દેવામુક્ત જાહેર થઈ ચૂકી છે. રિલાયન્સે આ સફળતા ડેડલાઈનના 9 મહિના પહેલાં જ મેળવી લીધી છે. 

2000 રૂપિયાની પાર પહોંચ્યો રિલાયન્સનો શેર 

ગઈકાલે કારોબારી દિવસે રિલાયન્સ ઈન્ડસ્ટ્રીનો શેર 2000 રૂપિયા સુધી પહોંચ્યો હતો. કારોબારના અંતમાં આ શેરનો ભાવ 2004 રૂપિયા હતો. માર્કેટ કેપની વાત કરીએ તો બીએસઈ ઈન્ડેક્સ પર 12 લાખ 70 હજાર કરોડ રૂપિયાથી વધુ પહોંચ્યો હતો.