બિઝનેસ / એક ડીલ કરી અને મુકેશ અંબાણી આ શખ્સને પછાડી બની ગયા એશિયામાં સૌથી ધનિક

2014માં વોટ્સએપને ટેકઓવર કર્યા પછી ફેસબુક સૌથી મોટી સોશ્યલ મીડિયા કંપની બની છે. આ ડીલ પછી રિલાયન્સ ઇન્ડસ્ટ્રીઝનો શેર બુધવારે શેર માર્કેટમાં 9.83 ટકા વધીને રૂ 1359 પર બંધ રહ્યો હતો.

મુકેશ અંબાણીની સંપત્તિ અલીબાબાના સ્થાપક જેક મા કરતા 3 અબજ ડોલર વધી ગઈ

ફેસબુકના આ સોદાથી અંબાણીની સંપત્તિ 4 અબજ ડોલર વધી 49 અબજ ડોલર થઈ છે. આ ડીલથી મુકેશ અંબાણીની સંપત્તિ અલીબાબાના સ્થાપક જેક મા કરતા 3 અબજ ડોલર વધારે થઈ ગઈ છે. બ્લૂમબર્ગના આંકડા મુજબ કોરોના વાયરસ મહામારીના પગલે 21 એપ્રિલ, મંગળવાર સુધી મુકેશ અંબાણીની સંપત્તિમાં 14 અબજ ડોલરનો ઘટાડો થયો હતો. મંગળવાર સુધી જેક માની સંપત્તિમાં 1 અબજ ડોલરનો ઘટાડો થયો હતો.

4.75 લાખ કરોડ રૂપિયાના વેલ્યુએશનની થઇ ગઈ Jio

રિલાયન્સ Jioમાં ફેસબુકે 43,574 કરોડ રૂપિયાના રોકાણની જાહેરાત કરી છે. ફેસબુક Jio પ્લેટફોર્મનો 9.99 ટકા હિસ્સો ખરીદશે. કોઈ પણ કંપનીમાં માઈનોરિટી સ્ટેક માટેનું આ સૌથી મોટું વિદેશી રોકાણ હશે. ફેસબુકના રોકાણ બાદ Jio પ્લેટફોર્મનું વેલ્યુએશન આશરે 4.75 લાખ કરોડ રૂપિયા થઇ ગયું છે. કોઈપણ ભારતીય કંપનીમાં માઈનોરિટી સ્ટેક માટે આ આજ સુધીની સૌથી મોટી FDI છે. Jio પ્લેટફોર્મ્સ માટેની પ્રી મની એન્ટરપ્રાઇઝ મૂલ્ય લગભગ 66 અબજ ડોલર હશે. આ ભાગીદારીથી લોકો અને બિઝનેસ માટે વિશાળ તકો ઉભી થશે.

ડિજિટલ ઇન્ડિયાનું મિશન પૂર્ણ થશે

રિલાયન્સ ઇન્ડસ્ટ્રીઝ (RIL) ના અધ્યક્ષ મુકેશ અંબાણીએ ફેસબુક સાથેની આ લાંબા ગાળાની ભાગીદારીને આવકારી છે. તેમણે કહ્યું છે કે ફેસબુક સાથેનો આ કરાર ડિજિટલ ઇન્ડિયાના મિશનને પૂર્ણ કરવામાં મહત્વનો ભાગ ભજવશે.