ક્રિકેટ જ નહીં આ રમતમાં પણ મહેન્દ્રસિંહ ધોની છે 'બાહુબલી'

ટીમ ઇન્ડિયાના પૂર્વ કપ્તાન મહેન્દ્ર સિંહ ધોની છેલ્લા એક મહિનાથી ક્રિકેટની રમતથી દૂર છે. તેવા સમયે એમએસ ધોનીએ ટેનિસમાં પોતાનો હાથ અજમાવ્યો. જો કે ધોનીએ ટેનિસમાં પણ ડંકો વગાડયો છે. ધોનીએ આ ટેનિસની આ ટૂર્નામેન્ટ જીતી લીધી છે.

ઉલ્લેખનીય છે કે ક્રિકેટ ફૂટબોલ અને શૂટિંગ બાદ મહેન્દ્રસિંહ ધોનીએ રાંચમાં લોન ટેનિસમાં પોતાનો હાથ અજમાવ્યો હતો. રાંચીના જેએસસીએ મેદાનમાં આયોજીત કન્ટ્રી ક્રિકેટ કલબ ટેનિસ ચેમ્પિયનશીપની ફાઇનલમાં ધોનીએ જીત મેળવી ટૂર્નામેન્ટ પોતાના નામે કરી લીધી.

આ ટૂર્નામેન્ટની ફાઇનલમાં ધોની-સુમિતની જોડીએ કન્હૈયા અને રોહિતની જોડીને મેન્સ ડબલ્સમાં પરાજય આપ્યો. કન્ટ્રી કલબ ટેનિસ ટૂર્નામેન્ટની આ ફાઇનલ મેચને લઇને લોકોમાં પણ ખાસો ઉત્સાહ જોવા મળ્યો હતો.

ફાઇનલમાં મેચમાં ધોની પોતાના જોડીદાર સુમિત સાથે મેદાનમાં ઉતર્યો હતો અને સામેની ટીમના કન્હૈયા અને રોહિતની જોડીને સીધા સેટ 6-3 6-3માં પરાજય આપ્યો.

ઉલ્લેખનીય છે કે 37 વર્ષનો ધોની હવે ઘણા સમય સુધી ઇન્ટરનેશનલ ક્રિકેટથી દૂર જોવા મળશે. હવે ધોની જાન્યુઆરીમાં રમાનાર ઓસ્ટ્રેલિયા સામેની વન ડે સિરીઝમાં જોવા મળશે.