WC 2019 / એક નિયમે કરી દીધા ધોની-સાક્ષીને દૂર, એક જ શહેર પણ હોટલ અલગ-અલગ

ટીમ ઇન્ડિયા ગત 23 મેએ અહીં આવી પહોંચી હતી અને બે પ્રેક્ટિસ મેચ રમ્યા બાદ ગત બુધવારે ટીમ ઇન્ડિયાએ સાઉથ આફ્રિકા સામેની પોતાની પહેલી મેચમાં જીત મેળવી. આ મેચ જોવા માટે ધોનીની પત્ની સાક્ષી પણ પહોંચી હતી.  
 

જોકે BCCIએ વર્લ્ડ કપ ની શરૂઆત પહેલાં જ નક્કી કરી લીધું કે ટીમના ખેલાડીના પરિવારનો કોઈ પણ સભ્ય ટૂર્નામેન્ટ શરૂ થયાના ૨૦ દિવસ બાદ જ ટીમ સાથે હોટલમાં રોકાઈ શકશે.
BCCIના સૂત્રએ જણાવ્યું સાક્ષી ઈંગ્લેન્ડ જરૂર પહોંચી છે અને તેણે સાઉથમ્પ્ટનમાં સ્ટેડિયમમાં સાઉથ  આફ્રિકા સામેની મેચ પણ જોઇ, પરંતુ તે ટીમની હોટેલમાં રોકાઈ નહોતી અને બોર્ડ પણ સાક્ષીનો ખર્ચ પણ નથી ઉઠાવી રહ્યું. 

બોર્ડના એક અધિકારીએ જણાવ્યું કે BCCIની નીતિ અનુસાર વર્લ્ડ કપ ના શરૂઆતના 20 દિવસ સુધી કોઈ પણ ખેલાડીની પત્ની કે પરિવારનો સભ્ય ટીમની હોટલમાં રહી નહીં શકે. આ સમયગાળા દરમિયાન જો કોઈ ઈંગ્લેન્ડ પહોંચે તો તેણે પોતાનો ખર્ચ જાતે જ ઉઠાવવો પડશે. આ નિયમ સાક્ષી પર પણ લાગુ પડ્યો છે. BCCIના નિયમે ભલે આ બંનેને અલગ અલગ હોટેલમાં રહેવા માટે મજબૂર કર્યાં હોય, પરંતુ નવરાશના સમયમાં બંને મળ્યાં હતાં અને સાથે જમ્યાં પણ હતાં.

BCCIના અધિકારીએ જણાવ્યું કે 20  દિવસની અવધિ પૂરી થતાં જ ખેલાડીઓના પરિવારના સભ્યો અહીં આવી પહોંચશે. કેપ્ટન વિરાટ કોહલીની પત્ની અનુષ્કા પણ આવવાની છે. 
આ પહેલાં પણ BCCI તરફથી કહેવામાં આવ્યું હતું કે, વિદેશ પ્રવાસ દરમિયાન ખેલાડીઓના પરિવારજનો ફક્ત 15 દિવસ સુધી સાથે રહી શકશે, પરંતુ ઈંગ્લેન્ડ, સાઉથ આફ્રિકા અને ઓસ્ટ્રેલિયા પ્રવાસમાં એ નિયમનું સંપૂર્ણપણે પાલન નહોતું થયું, જેના કારણે વર્લ્ડ કપમાં નવો નિયમ લાગું કરવામાં આવ્યો છે.