દુનિયાભરમાં મહેન્દ્ર સિંહ ધોનીની રમતનો ડંકો વાગી રહ્યો છે. ચારે બાજુએ આજે ધોનીની ચર્ચા થઇ રહી છે. ઓસ્ટ્રેલિયા સામેની વન ડે શ્રેણીમાં સતત ત્રણ અડધી સદી અને ભારતની ઐતિહાસિક જીતનો મુખ્ય પાયો રહેનાર આ ખેલાડીએ વિરોધીઓને પણ પોતાના કાયલ બનાવી દીધા છે.
જેમાં ઓસ્ટ્રેલિયા ટીમના કોચ જસ્ટિન લેંગરનો સમાવેશ થયો છે. જસ્ટિન લેંગર પણ ધોનીની પ્રશંસા કરતાં પોતાને રોકી શક્યો નહીં. ટીમ ઇન્ડિયા સામે વન ડે શ્રેણીમાં મળેલા પરાજય બાદ લેંગરે ધોનીને સુપરસ્ટાર તેમજ સર્વકાલિન મહાન ક્રિકેટર્સ ગણાવ્યો.
ઉલ્લેખનીય છે કે એમએસ ધોનીએ ત્રીજી વન ડેમાં 114 બોલમાં અણનમ 87 રન બનાવ્યા જેની મદદથી ભારતે ઓસ્ટ્રેલિયાને ત્રીજી વન ડેમાં પરાજય આપીને શ્રેણી 2-1થી પોતાના નામે કરી.
ઓસ્ટ્રેલિયન કોચે મેચ બાદ પત્રકાર પરિષદમાં કહ્યું ધોની 37 વર્ષનો છે પરંતુ વિકેટ વચ્ચેની તેની દોડ અને ફિટનેસ ગજબની છે. સતત ત્રણ દિવસ વિકેટ વચ્ચે રહી આ રીતે દોડવુ તે પણ 40 ડિગ્રી તાપમાનમાં એ અકલ્પનીય છે.
તે રમતનો સુપરસ્ટાર છે. લેંગરે કહ્યું કે એમએસ ધોની વિરાટ કોહલી અને ટેસ્ટમાં ચેતેશ્વર પુજારા આ બધા આદર્શ છે. ધોનીનો રેકોર્ડ સુકાની ખેલાડી તેમજ વિકેટ કિપર તરીકે તેની ક્ષમતા પુરવાર કરે છે.