ટીમ ઇન્ડીયાના પૂર્વ સુકાની એમએસ ધોનીએ વિશ્વ કપના વર્ષને લઇને શાનદાર શરૂઆત કરી છે. ઉલ્લેખનીય છે કે છેલ્લા કેટલાક સમયથી ફોર્મ વિહોણા ચાલી રહેલા ધોનીએ હાલમાં યોજાયેલ ઓસ્ટ્રેલિયા સામેની શ્રીણીની ત્રણ મેચમાં શાનદાર પ્રદર્શન કરી પોતાના ફોર્મમાં વાપસી કરી.
એમએસ ધોનીએ ભારતીય ટીમની ઐતિહાસિક શ્રેણી જીતમાં ત્રણ અડધી સદી સહિત 193 રન બનાવ્યાં. છેલ્લા કેટલાક સમયથી ફોર્મ વિહોણા ચાલી રહેલા ધોની પર આલોચકોએ સવાલ ઉઠાવ્યો હતો.
આમ ધોનીએ આલોચકોને કરારો જવાબ આપ્યો છે તેમજ સુકાની વિરાટ કોહલી તેમજ ટીમ મેનેજમેન્ટનો વિશ્વાસ જીત્યો છે. ધોનીએ ઓસ્ટ્રેલિયા સામે બે મેચમાં મેચ ફિનીશિંગની ભૂમિકા ભજવી હતી.
આમ હવે ન્યૂઝીલેન્ડ સામે હવે યોજાનારી પાંચ વન ડેમાં ધોની ફરી ધમાલ મચાવા તૈયાર છે. ન્યૂઝીલેન્ડ સામે 23મી જાન્યુઆરીથી વન ડે શ્રેણીનો પ્રારંભ થશે. ધોનીનું જો કે ન્યૂઝીલેન્ડમાં અત્યાર સુધીનું પ્રદર્શન સારુ રહ્યું છે.
ધોનીએ ન્યૂઝીલેન્ડમાં 12 મેચમાં 90.16ની સરેરાશથી 541 રન બનાવ્યાં છે. ધોનીએ ન્યૂઝીલેન્ડમાં ત્રણ અડધી સદી ફટકારી છે. એમએસ ધોની પાસે સચિન તેંડૂલકર અને વિરેન્દ્ર સહેવાગનો એક વિશેષ રેકોર્ડ તોડવાની તક છે.
તેંડૂલકરે ન્યૂઝીલેન્ડમાં 18 મેચમાં 652 રન બનાવ્યા છે જ્યારે સહેવાગે 12 મેચમાં 598 રન બનાવ્યા છે. આમ ધોની પાસે આ બંને દિગ્ગજ ખેલાડીઓ કરતાં વધારે રન બનાવવાની તક છે.