કોરોના વાયરસના કારણે સ્થગિત થઇ ગયેલ આઇપીએલ હવે આખરે યુએઈમાં રમાવાની છે અને 19મી સપ્ટેમ્બરથી શરૂઆત થવાની છે. એવામાં ટૂર્નામેન્ટમાં ત્રણ વખતની ચેમ્પિયન ચેન્નઈ સુપર કિંગ્સ પોતાની તૈયારીમાં કોઈ કમી છોડવા માંગતા નથી.
19મી સપ્ટેમ્બરથી શરુ થશે આઇપીએલ
લાંબા સમય બાદ ક્રિકેટના મેદાન પર પરત ફરશે ધોની
સૌથી પહેલા યુએઈ પહોંચી પ્રેક્ટીસ કરશે ધોની
એક અહેવાલમાં સામે આવ્યું છે કે એમ એસ ધોની અને ખેલાડીઓ બાકી ટીમોની પહેલા યુએઈમાં પહોંચી જશે જેથી ખેલાડી ત્યાંના માહોલમાં સેટ થઇ શકે અને લાંબા સમય બાદ ખેલાડી મેદાન પર પરત આવી રહ્યા છે તો ખૂબ પ્રેક્ટીસ કરી શકે.
ગલ્ફ ન્યૂઝના અહેવાલ મુજબ ધોની અને તેમની ટીમ ઓગસ્ટના બીજા અઠવાડિયામાં જ યુએઈ આવી જશે જ્યારે લીગની બીજી બધી ટીમ ત્રીજા અઠવાડિયામાં જ એન્ટ્રી કરશે. ચેન્નઈ સુપર કિંગ્સ ટીમનું માનવું છે કે કોરોના વાયરસના કારણે લાંબા સમયથી બધા ખેલાડીઓ ઘર પર છે અને આટલા લાંબા બ્રેક બાદ પ્રેક્ટીસ માટે સમયની જરૂર પડશે.
આ ટીમમાં સૌથી વધારે ફોકસ એમએસ ધોની પર રહેશે. ધોની વર્લ્ડ કપ 2019 બાદ ક્રિકેટના મેદાન પર પરત આવશે. નોંધનીય છે કે આઈપીએલની શરુઆત માર્ચ મહિનામાં જ થવાની હતી પરંતુ કોરોના વાયરસના કારણે ટૂર્નામેન્ટ ટળી ગઈ.
નોંધનીય છે કે આઈપીએલની શરૂઆત અને ફાઈનલ મેચની તારીખો ભલે જાહેર કરવામાં આવી હોય પરંતુ ટૂર્નામેન્ટનું શેડ્યુલ હજુ સુધી આપવામાં આવ્યું નથી. ધોની ઉપરાંત ચેન્નાઈ સુપર કિંગ્સ ટીમમાં સુરેશ રૈના, રવિન્દ્ર જાડેજા, હરભજન સિંઘ, કેદાર જાધવ, દીપક ચહર, પિયુષ ચાવલા અને શાર્દુલ ઠાકુર જેવા સ્ટાર ખેલાડીઓ છે.