આક્ષેપ / સાંસદ નુસરત જહાંએ કહ્યું, ભાજપ સત્તામાં આવ્યું તો મુસ્લિમોના આવા દિવસો આવશે

• બંગાળમાં ભાજપ અને TMC વચ્ચે આક્ષેપોનો મારો 
• TMC સાંસદ નુસરત જહાંનું ભાજપને લઈને વિવાદીત નિવેદન 
• ભાજપને કોરોના કરતાં પણ વધુ ખતરનાક વાયરસ ગણાવ્યું 

TMC સાંસદે ઉત્તર 24 પરગણાના મુસ્લિમ પ્રભાવવાળા વિસ્તારમાં ચૂંટણી પ્રચાર દરમિયાન ભાજપને કોરોના વાયરસ સાથે સરખાવ્યું હતું. તેમણે કહ્યું, 'તમે તમારી આંખો ખુલ્લી રાખો ... ભાજપ જેવો ખતરનાક વાયરસ ફરી રહ્યો છે. આ પક્ષ ધર્મોની વચ્ચે ભેદભાવ અને માણસો વચ્ચે ભેદભાવ ઊભો કરાવે છે. જો ભાજપ સત્તામાં આવશે તો મુસ્લિમોની ઊંધી ગણતરી શરૂ થઈ જશે. 

ભાજપે મમતા બેનરજીના મૌન પર ઉઠાવ્યા સવાલો 

TMC ના સાંસદ નુસરતના નિવેદનને લઈને ભાજપના આઇટી સેલના પ્રમુખ અમિત માલવીયાએ મમતા બેનર્જી અને તેમના પક્ષ પર મુસ્લિમ તુષ્ટિકરણનો આરોપ લગાવ્યો હતો. માલવીયાએ કહ્યું, 'પશ્ચિમ બંગાળમાં રસી ઉપર સૌથી ખરાબ રાજકારણ થઈ રહ્યું છે. મમતા બેનર્જીના મંત્રીમંડળના વર્તમાન પ્રધાન પ્રથમ સિદ્દિકુલ્લાહ ચૌધરીએ રસી વહન કરતી ટ્રકને અટકાવી હતી. હવે TMC ના સાંસદ, જ્યારે મુસ્લિમ બહુમતી વાળા દેગંગા જિલ્લામાં ચૂંટણી પ્રચાર કરી રહ્યા છે, ત્યારે ભાજપને કોરોના સાથે સરખાવી રહ્યા છે. પરંતુ મમતા બેનર્જી ચૂપ છે. કેમ? તુષ્ટિકરણ ?

રસી લઈ જતા વાહનને ડાયવર્ટ કરવું પડ્યું હતું

શનિવાર 16 જાન્યુઆરીથી દેશભરમાં રસીકરણ અભિયાન શરૂ કરવામાં આવી રહ્યું છે. આવી સ્થિતિમાં કોરોના રસી પશ્ચિમ બંગાળ મોકલવામાં આવી હતી. પરંતુ કૃષિ કાયદાના વિરોધમાં રાષ્ટ્રીય ધોરીમાર્ગ બંધ કરી દેવામાં આવ્યો હતો, જેના પગલે આ વાહનને 12 કિમી વધુ ફરીને આવવું પડ્યું હતું. બુધવારે મમતા બેનર્જીના કેબીનેટ રાજ્ય પ્રધાન સિદ્દિકુલ્લા ચૌધરીની આગેવાની હેઠળ નેશનલ હાઇવે બંધ કરાયો હતો. આને કારણે બર્ધમાન જિલ્લામાં કોરોનાની રસી લઈ જતા વિશેષ વાહનને અટકાવવામાં આવ્યું હતું.