મધ્ય પ્રદેશ / સિંધિયાના કિલ્લા પર કોંગ્રેસે કબ્જો કર્યો: AAP અને એવૌસીની પાર્ટીએ ગણિત બગાડ્યા, BJPએ 4 સીટ ખોઈ દીધી

• મધ્ય પ્રદેશની નગર નિગમ ચૂંટણીમાં પ્રથમ તબક્કાનું ચિત્ર સ્પષ્ટ થયું
• પ્રથમ તબક્કાની 111 સીટ પર પરિણામ ગત રોજ આવ્યા
• ભાજપનો સૌથી મજબૂત ગઢ ધ્વસ્ત થયો, ગ્વાલિયર અને જબલપુર ખોવાનો વારો આવ્યો

મધ્ય પ્રદેશમાં નગર નિગમની ચૂંટણીનું ચિત્ર સ્પષ્ટ થઈ ચુક્યું છે અને સત્તાધારી પાર્ટી ભાજપનો મજબૂત કિલ્લો ધ્વસ્ત થયો છે. પહેલા તબક્કામાં 11 નગર નિગમની ચૂંટણી થઈ હતી. જેના પરિણામ ગત રોજ આવ્યા છે. આ 11માંથી 7 નગર નિગમના મેયર ચૂંટણીમાં ભાજપ, 3 પર કોંગ્રેસ અને 1 પર આમ આદમી પાર્ટી જીતી ગઈ છે. નગર નિગમ ચૂંટણીના પરિણામ જોતા ભલે લાગે કે, ભાજપને બહુમત સીટ મળી છે, પણ ગત ચૂંટણીની સરખામણીમાં પાર્ટીને ભારે નુકસાન થયું છે. ભાજપના કેટલાય દિગ્ગજો પોતાના જ ગઢ બચાવી શક્યા નથી. રાજ્યમાં લગભગ એક વર્ષ બાદ વિધાનસભા ચૂંટણી આવી રહી છે. ત્યારે આવા સમયે નગર નિગમની ચૂંટણી ભાજપ માટે ચિંતાનો વિષય બની રહી છે, તો વળી કોંગ્રેસ માટે એક સંજીવનીનું કામ કરી ગઈ છે. 

પ્રથમ તબક્કાની 11માંથી 4 સીટ ભાજપે ખોઈ દીધી

મધ્ય પ્રદેશની 11 નગર નિગમમાંથી ભાજપે ઈન્દૌર, ભોપાલ, બુરહાનપુર, ઉજ્જૈન, સતના, ખંડવા અને સાગરમાં જીત નોંધાવી છે. કોંગ્રેસે ગ્વાલિયર, જબલપુર અને છિંદવાડા નગર નિગમ પર કબ્જો કર્યો છે. તો વળી નગર નિગમની ચૂંટણીમાં પ્રથમ વાર ઉતરેલી આમ આદમી પાર્ટીએ પણ ખાતુ ખોલાવ્યું છે. સાથે જ અસદુદ્દીન ઓવૈસીની પાર્ટી ભલે એક પણ મેયરની સીટ જીતી ન હોય, પણ કેટલાય સીટો પર કોંગ્રેસનું ગણિત ચોક્કસથી બગાડ્યું છે. રસપ્રદ વાત એ છે કે, મધ્ય પ્રદેશની તમામ 16 નગર નિગમોમાં ભાજપનો કબ્જો હતો, અને કોંગ્રેસના એક પણ મેયર નહોતા. ત્યારે હવે ભાજપે ચાર મેયર પદ ખોવાનો વારો આવ્યો છે. 

57 વર્ષ બાદ ભાજપે ગ્વાલિયર ખોઈ દીધું, જ્યોતિરાદિત્ય સિંધિયાનો કિલ્લો ધ્વસ્ત થયો

ગત વખતે થયેલી ચૂંટણીમાં ભાજપને પ્રથમ તબક્કાની તમામ 11 સીટ પર જીતી મળી હતી. આ વખતે ચાર સીટ ખોવાનો વારો આવ્યો છે. તેમાં ગ્વાલિયર પણ સામેલ છએ. જ્યાં છેલ્લા 57 વર્ષ બાદ ભાજપને હાર મળી છે. આવી જ રીતે જબલપુરમાં 23 વર્ષ બાદ ભાજપને મેયર નહીં હોય, ગ્વાલિયર અને જબલપુર ભાજપના સૌથી મજબૂત ગઢ ગણાય છે અને અહીં પાર્ટીને મળેલી હારથી કેટલાય મોટા સવાલો થઈ રહ્યા છે. જ્યોતિરાદિત્ય સિંધિયા, નરેન્દ્ર સિંહ તોમર, નરોત્તમ મિશ્રા, જયભાન સિંહ પવૈયા અને પ્રભાત ઝા ઉપરાંત શિવરાજ સરકારના પાંચ મંત્રી ગ્લાવિયરમાંથી આવે છે. ભાજપના પૂર્વ પ્રદેશ અધ્યક્ષ રાકેશ સિંહ જબલપુરથી સાંસદ છે તો રાષ્ટ્રીય અધ્યક્ષ જેપી નડ્ડા અને પ્રદેશ અધ્યક્ષ વીડી શર્માનું સાસરિયું પણ જબલપુર છે. ત્યારે આવા સમયે ભાજપને અહીં મળેલી હાર નિશ્ચિતપણે ચિંતાનો વિષય છે. શહેરી મત પર ભાજપની મજબૂત પક્કડ હોવાનું કહેવાય છે, તેથી જ આ હારને લઈને કેટલાય સવાલો થઈ રહ્યા છે.