ગેંગરેપ / અહીં 4 દિવસ સુધી FIR ન લેતા ગેંગરેપની પીડિતાએ કર્યો આપઘાત, ફરિયાદ ન લેનાર પોલીસ ઈન્સપેક્ટની ધરપકડ

• નરસિંહપુરમાં દલિત મહિલા પર 3 શખ્સે આચર્યું દુષ્કર્મ
• પોલીસે 4 દિવસ સુધી ફરિયાદ દાખલ ન કરી 
• પોલીસના વલણથી કંટાળીને પીડિતાએ કરી આત્મહત્યા
• CMએ આ મામલે એડિશનલ SP અને SDOPને હટાવવા નિર્દેશ આપ્યો

મધ્ય પ્રદેશના નરસિંહપુરમાં દલિત મહિલા સાથે 3 લોકોએ ગેંગરેપ કર્યો છે. પીડિતા અને તેના પરિવારજનો ન્યાયની આશાએ પોલીસ પાસે ગયા હતા. જોકે પોલીસે 4 દિવસ સુધી કોઈ ફરિયાદ દાખલ કરી નહોતી. અંતે પોલીસના વલણથી કંટાળીને પીડિતાએ આત્મહત્યા કરી લીધી હતી.

નરસિંહપુર જિલ્લામાં દલિત મહિલા પર  દુષ્કર્મ થયું હતુ.  28 સપ્ટેમ્બરે મહિલા ખેતરમાં ઘાસ કાપવા માટે ગઈ હતી. પાડોશમાં રહેતા 3 આરોપીએ ખેતરમાં ગેંગરેપ કર્યો હતો.  પરિવારે ગોટિટોરિયા ચોકી અને ચીચલી પોલીસ સ્ટેશનના ધક્કા ખાધા પણ કોઈ મદદ ન મળી. પીડિત મહિલાની પોલીસે 4 દિવસ સુધી ફરિયાદ લીધી નહોતી. 

ફરિયાદ ન લેતી પોલીસને પરિવારજનોએ મેડિકલ તપાસ કરવા પણ કહ્યું હતુ. અંતે મેડિકલ ટેસ્ટ પણ જાતે કરાવ્યો અને પીડિતા મેડિકલ રિપોર્ટ સાથે પહોંચી તો પોલીસે પરિવારને બેસાડી રાખ્યો. પોલીસ એ હદે નીચે ગઈ કે પીડિતાને અપશબ્દો બોલીને પરિવારને છોડવા માટે પૈસા માગ્યા હતા. અંતે નિરાશ પીડિતાએ 2 ઓક્ટોબરે ફાંસી લગાવી આપઘાત કરી લીધો. 

CM શિવરાજસિંહ ચૌહાણે 2 ઓક્ટોબ રાત્રે કાર્યવાહીના નિર્દેશ આપ્યા છે. એડિશનલ SP અને SDOPને પદ પરથી હટાવી દેવામાં આવ્યા છે. FIR ન નોંધનાર પોલીસકર્મીની ધરપકડ કરવામાં આવી છે.  CMએ ટ્વીટ કરી રજા પર ગયેલા SP પાસે પણ જવાબ માગ્યો છે. આખરે પોલીસે આ મામલે 2 આરોપીની ધરપકડ કરી છે.