રાજનીતિ / રાજ્યસભા ચૂંટણી નજીક આવતાં MP બાદ મહારાષ્ટ્રમાં રાજકીય ઊથલપાથલ થઈ શકે?

• રિમોટથી સરકાર ચલાવવાનો પ્રયાસ કરનાર પવાર પર ઉદ્ધવ નારાજ
• મુખ્યપ્રધાન ઉદ્ધવ ઠાકરે એનડીએમાં પરત આવી શકે છે

મધ્યપ્રદેશમાં જે મોટાપાયે રાજકીય ખેલ ખેલાયો તેના પગલે હવે મહારાષ્ટ્રમાં પણ ગમે તે ઘડીએ મોટી ઊથલપાથલ થઇ શકે છે. 

રાજકીય વિશ્લેષક સમીર ચોગાંવકરે જણાવ્યું છે કે, વાસ્તવમાં મહારાષ્ટ્રમાં તાજેતરમાં નાગરિકતા સુધારા કાયદો, અલગાર પરિષદની તપાસ, મુંબઇના નવા પોલીસ કમિશનરની નિમણુંક અને રાજ્યસભાની બેઠક જેવા કેટલાય મુદ્દા પર એનસીપી (NCP) અને શિવસેના આમને સામને આવી ગયા છે.

આ સંજોગોમાં ગમે ત્યારે મહારાષ્ટ્રની વર્તમાન ગઠબંધન સરકારમાં મોટો ઘાતકીય ભૂકંપ સર્જાઇ શકે તેમ છે. મુખ્યપ્રધાન ઉદ્ધવ ઠાકરે એનડીએમાં પરત આવી શકે છે.

સમીર ચોગાંવકરે જણાવ્યું છે કે એનસીપી નેતા શરદ પવાર મહારાષ્ટ્ર સરકારને રિમોટથી ચલાવવાની કોશિશ કરી રહ્યા છે, જેના કારણે ઉદ્ધવ ઠાકરે ખૂબ નારાજ છે. ઉદ્ધવ ઠાકરેએ પોતાની સરકારને 100 દિવસ પૂરા થવાના પ્રસંગે જ્યારે તેઓ અયોધ્યા પહોંચ્યા ત્યારે તેમણે હિંદુત્વનો મુદ્દો ફરી ઉછાળીને પોતાની નારાજગી જાહેર કરી હતી.