રાજકોટ / ડૉક્ટરની બેદરકારીએ મહિલાની મોતને રાખ્યું માત્ર એક મિનિટ છેટું? ફરી વખત નહીં બની શકે માતા

ત્યારે ડોક્ટટ તે દર્દીને જીવન ભેટ ધરવા મરણિયા પ્રયાસ કરી રહ્યો હોય છે. જો કે આ વાત દર્દીને નારાયણ સમજનારા ડોક્ટરોને લાગૂ પડે છે. પરંતુ તમે જ્યારે જેતપુરની મધરકેર હોસ્પિટલના ડોક્ટરની બેદરકારીની ગાથા સાંભળશો તો તમને બીજા ડોક્ટરો પરથી પણ વિશ્વાસ ઊઠી જશે. એવું તો શું કર્યું મધરકેર હોસ્પિટલના એ ડોક્ટરે કે એક મહિલા દર્દીઓના જીવ અને મોતને માત્ર રહ્યું એક મિનિટનું છેટું?
 
રાજકોટના જેતપુર-ધોરાજી રોડ પર આવેલી આ મધરકેર હોસ્પિટલ છે. પરંતુ અહીં નવજાત બાળકોની માતાઓને ભગવાનના ભરોસે છોડી દેવામાં આવી રહી છે. વાત ખોટી લાગતી હોય તો અહીંના ગાયનેકોલોજિસ્ટ ડોક્ટરની ઘોર બેદરકારીનો તાજો જ કિસ્સો સામે આવ્યો છે. જેતપુરના ચંદુભાઈ ચુડાસમાના પત્ની કાજલબેનની પ્રસૂતી આ જ હોસ્પિટલમા મહિના પહેલા કરવામા આવી હતી.

ડોક્ટરે દર્દીને ભગવાના ભરોસે મૂકી દીધા
આ હોસ્પિટલના ડોક્ટર રુચિક સરવૈયાના હાથે થયેલી પ્રસૂતિને એક મહિનો થયો છતાં કાજલબેનને બ્લડિંગ બંધ થયું ન હતું. કાજલબેને ફરીવાર ડોક્ટર પાસે ચેકઅપ કરાવ્યું તો ડોક્ટરે ગર્ભાશયનુ ફરીવાર ઓપરેશન કરવાનું જણાવ્યું. કાજલબેન ઓપરેશન માટે હોસ્પિટલમાં દાખલ થઈ ગયા અને ડોક્ટર રુચિક સરવૈયાએ ઓપરેશન પણ હાથ ધર્યું. પરંતુ ઓપરેશન દરમિયાન ડોક્ટરની બેદરકારીના કારણે કાજલબેનનું બ્લડિંગ વધી ગયું. ડોક્ટર રુચિક ગભરાઈ ગયા અને લાંબા સમય સુધી કોઈ નિર્ણય ન લઈ શક્યા અને આ તરફ દર્દીનું આંતરડું લાંબા સમય સુધી ખુલ્લામાં રહેવાના કારણે ચેપથી ગ્રસિત થઈ ગયું. આખરે પોતાના કાબૂ બહાર કેસ જતો રહેતા ડોક્ટરે દર્દીને ભગવાન ભરોસે મૂકી દીધા હતા. 

આખું ગર્ભાશય કાઢી નાખવું પડ્યું
એમ કહો કે ડોક્ટરની બેદરકારીના કારણે બકરું કાઢતાં ઊંટ પેઠું. આ ઈન્ફેકશ ગર્ભાશય સુધી પહોંચી ગયું આખરે નોબત એ આવી કે કાજલબેનના આંતરડાનો કેટલોક ભાગ અને આખે આખું ગર્ભાશય કાઢી નાખવું પડ્યું. ત્યાર બાદ માંડમાંડ બચેલા દર્દી કાજલબેનને મળમૂત્રની એક કોથળી અને નળી સાથે હોસ્પિટલથી રજા આપી દેવાઈ. ડોક્ટરે માફી માગવી પડે તેવી નોબત આવી.

ફરીવાર માતા નહીં બની શકે
જોકે અહીં માફી માગવાથી વાત પતિ જતી નથી. ડોક્ટરની બેદરકારીનો અંત અહીં પણ ન આવ્યો. કેમકે ડોક્ટરે જે નળી ફીટ કરી હતી તે એક જ દિવસમાં લીક થઈ ગઈ આથી કાજલબેનને પ્રથમ જૂનાગઢ અને ત્યાંથી રાજકોટ રિફર કરવા પડ્યા. રાજકોટ હોસ્પિટલમાં કાજલબેનને નવી નળી ફીટ કરવામાં આવી અને પરંતુ ડોક્ટરની ભૂલના કારણે કાજલબેનને છ મહિના સુધી પથારીવશ રહેવુ પડશે. એટલું જ દુઃખની વાત એ પણ છે કે એક ડોક્ટરની ઘોર બેદરકારીએ એક મહિલાના ફરીવાર માતા બનવાના અરમાનની પણ હત્યા કરી નાખી છે. 

જોકે, આ કિસ્સામાં ડોક્ટરોની પેનલ દ્વારા કરાયેલી તપાસમાં એ સ્પષ્ટ થઈ ગયુ છે કે મહિલાને જીવના જોખમમાં મુકવા માટે રુચિક સરવૈયાની ઘોર બેદરકારી જ જવાબદાર છે. આથી તેમની વિરુદ્દમાં કેસ દાખલ કરવામાં આવ્યો છે. જો કે એક ડોક્ટરને થનાર સજાથી એક પ્રસૂતાને ક્યારેય ન્યાય મળી શકે તેમ નથી.