એપલના આઇફોન સામાન્ય રીતે એન્ડ્રોઇડ કરતા વધુ સુરક્ષિત હોવાનું માનવામાં આવે છે. તે માન્યતા સાવ ખોટી પણ નથી. કેમ કે આઇફોનને યુઝર્સ એન્ડ્રોઇડની જેમ કસ્ટમાઇઝ કરી શકતા નથી તેમજ થર્ડ પાર્ટી એપ પણ ડાઉનલોડ કરી શકાતી નથી. એન્ડ્રોઇની ઓપરેટિંગ સિસ્ટમ ઓપન સોર્સ પ્લેટફોર્મ છે. જેનો દુનિયાભરની મોબાઇલ કંપની ઉપયોગ કરે છે.
જયારે એપલની ઓપરેટિંગ સિસ્ટમ માત્ર આઇફોન સહિતના એપલના જ ડિવાઇસ માટે એકસકલુઝીવ છે. તેમ છતાં એપલ હોય કે કોઇ અન્ય કંપની,કોઇના પણ મોબાઇલ સંપુર્ણ સુરક્ષિત છે તેવો દાવો કરી શકાય તેમ નથી. તાજેતરના સંશોધનથી જાણવા મળ્યું છે કે આઇફોનને હેક કરવા માટે ગૂગલ પર સૌથી વધુ સર્ચ થયું છે. તેથી માનવામાં આવી રહ્યું છે કે આ ઉપકરણને હેક થવાની સંભાવના 167 ગણી વધારે છે.
ઇંગ્લેન્ડની રિસર્ચ ફર્મ કેસ 24 અનુસાર, આઇફોનને લગતા આ ડેટા ગુગલ સર્ચમાંથી એકત્રિત કરવામાં આવ્યા છે. સંશોધનકારોએ આ ડેટાથી જાણવા પ્રયત્ન કર્યો છે કે લોકો કયા મોબાઇલ હેક કરવા માગે છે. જો કે, આશ્ચર્યજનક વાત એ છે કે હાઉ ટુ હેક આઇફોન કીવર્ડ ગૂગલ પર લગભગ 10,040 વખત શોધવામાં આવ્યો છે. એવું માની શકાય છે કે હેકર્સની સાથે યુઝર્સ આઇફોનને હેક કરવાની ટ્રીક પણ શોધી રહ્યા છે. આ સિવાય લોકોએ ગૂગલ પર 700 વાર સેમસંગ ફોનને હેક કરવાની રીત શોધી હતીઆ સંશોધન મુજબ, લોકોએ એન્ડ્રોઇડ ફોન હેક કરવામાં ઓછો રસ દર્શાવ્યો છે. સેમસંગ અને એપલ સિવાય, અન્ય બ્રાન્ડના ઉપકરણોને હેક કરવા માટે 100થી ઓછી વખત સર્ચ કરવામાં આવ્યું હતું. સોનીના ફોનને હેક કરવા માટે 50 લોકોએ સર્ચ કર્યું હતું.