એલર્ટ / અમદાવાદીઓ આ જગ્યાઓ પર જતાં હોય તો સાચવજો, શહેરમાં વીસથી વધુ મોબાઈલ ફોન ચોરીની ફરિયાદો

• ભીડવાળી જગ્યા, રેલવે સ્ટેશન, બસ સ્ટેન્ડ પાસે મોબાઈલ ફોન સાચવજો
• શહેરમાં વીસથી વધુ મોબાઈલ ફોન ચોરીની ફરિયાદો નોંધાઈ
• મોબાઈલ ચોરી કરતી અનેક ગેંગ શહેરમાં સક્રિય

શહેરમાં ભીડભાડવાળી જગ્યા પર મોબાઇલ ચોરી કરતી અનેક ટોળકીઓ સક્રિય થઇ છે. જે તમારી નજર ચૂકવીને ગણતરીની મિનિટોમાં મોબાઇલ ચોરી કરીને નાસી જાય છે. શહેરનાં વિવિધ પોલીસ સ્ટેશનમાં મોબાઇલ ચોરીના ૨૦થી વધુ ગુના ગઇ કાલે દાખલ થયા છે. જેમાં પોલીસે મોબાઇલ ચોરને પકડી પાડવા માટે ચક્રો ગતિમાન કર્યાં છે. રેલવે સ્ટેશન, બસ સ્ટેન્ડ તેમજ જાહેર જગ્યા પરથી મોબાઇલ ફોન ચોરી થઇ હોવાની અનેક ફરિયાદો નોંધાઇ છે. મોબાઇલ ચોરી કરતી ગેંગ એક સાથે ચોરેલા મોબાઇલ ફોન ભેગા કરે છે અને બાદમાં ગુજરાતના અંતરિયાળ ગામડાં તેમજ અન્ય રાજ્યોમાં વેચી દેતા હોય છે.

વેજલપુરમાં રહેતા મયૂર કડિયા વાંકાનેરથી અમદાવાદ ટ્રેનમાં આવ્યા હતા. મયૂર કડિયા પ્લેટફોર્મ નંબર છ પરથી પસાર થતા હતા ત્યારે ગઠિયાએ તેમનો મોબાઇલ ફોન ચોરી લીધો હતો. કાલુપુર રેલવે પોલીસે આ મામલે ગુનો દાખલ કરીને તપાસ શરૂ કરી છે. 
આ સિવાય બાપુનગરમાં પ્રેમજી ચૌહાણ નામની વ્યકિત એએમટીએસ બસમાં ચઢતી હતી. ત્યારે એક શખ્સે તેમનો મોબાઇલ ચોરી લીધો હતો. તો બીજી તરફ બાપુનગર બસ સ્ટેન્ડ પાસે રિક્ષા ચાલક સુનિલ શિવહરેનો મોબાઇલ પણ કોઇ શખ્સે ચોરી લીધો. મોબાઇલ ચોરીની બંને ફરિયાદ બાપુનગર પોલીસ સ્ટેશનમાં નોંધાઇ છે. જેમાં પોલીસે તપાસ શરૂ કરી છે. 

ભીડનો લાભ લઇને કોઈ ગઠિયએ તેમના મોબાઇલ ફોનની ચોરી કરી લીધી
શાહપુર વિસ્તારમાં રહેતાં રશ્મિબહેન તેમનાં ઘરે રસોઇ બનાવતાં હતાં. ત્યારે તેમનો મોબાઇલ ફોન ઘરની બહાર મુક્યો હતો. જેથી કોઇ ગઠિયાએ તકનો લાભ લઇને મોબાઇલની ચોરી કરી લીધી હતી. દરિયાપુર પોલીસે રશ્મિબહેનની ફરિયાદના આધારે ગુનો દાખલ કર્યો છે. રમજાન મહિનો ચાલી રહ્યો છે ત્યારે ગોમતીપુર વિસ્તારમાં રહેતા શાહનવાઝખાન ખરીદી કરવા માટે ગયા હતા. ત્યારે ભીડનો લાભ લઇને કોઈ ગઠિયએ તેમના મોબાઇલ ફોનની ચોરી કરી લીધી હતી. ગોમતીપુર પોલીસે આ મામલે ગુનો દાખલ કર્યો છે. 

ચાલુ વાહન ઉપર પણ નજર ચૂકવીને મોબાઇલ ચોરી કરતી ગેંગ સક્રિય
ચાલુ વાહન ઉપર પણ નજર ચૂકવીને મોબાઇલ ચોરી કરતી ગેંગ સક્રિય થઇ છે. દીપક તલાટી નામનો યુવક કાંકરિયા ગેટ પાસેથી પોતનાં વાહન પર પસાર થતો હતો ત્યારે અજાણ્યા શખ્સોએ તેના ખિસ્સામાંથી ફોન કાઢી લીધો હતો. જેથી દીપકે કાગડાપીઠ પોલીસ સ્ટેશનમાં ચોરીની ફરિયાદ નોંધાવી હતી. આ સિવાય પણ શહેરનાં વિવિધ પોલીસ સ્ટેશનમાં મોબાઇલ ચોરીની વીસથી વધુ ફરિયાદ નોંધાઇ છે. મોબાઇલની ચોરી છેલ્લા ઘણા સમયથી વધી રહી છે જેમાં કેટલાક લોકો ઇ-એફઆઇઆર કરી રહ્યા છે તો કેટલાક લોકો પોલીસ સ્ટેશનમાં જઇને ફરિયાદ કરી રહ્યા છે. આ સિવાય ઘણી ફરિયાદો એવી હોય છે કે જે હજુ સુધી પોલીસ સ્ટેશનમાં નોંઘાઇ નથી. મોબાઇલ ચોરી કરતી ગેંગ એક સાથે મોબાઇલ ફોન ભેગા કરીને વેચી દેતી હોય છે.