હૈદરાબાદ રૅપ કેસ / આવા લોકો દેશમાં છે ત્યાં સુધી બળાત્કારની ઘટનાઓ ઓછી નહીં થાય, વાંચીને શરમથી માથું ઝૂકી જશે

• એક તરફ આરોપીને સજાની માંગ અને બીજી તરફ વિકૃત માનસિકતા
• હૈદરાબાદ રૅપની ઘટનાનો વીડિયો જોવા માટે લોકો કરી રહ્યાં છે સર્ચ
• પોર્ન સાઈટ્સ પર 48 કલાકમાં 80 લાખથી વધુ લોકોએ સર્ચ કર્યો વીડિયો

એક તરફ આરોપીને સજાની માંગ અને બીજી તરફ વિકૃત માનસિકતા

સડકથી લઈને સંસદ સુધી આંદોલન કરવાથી શું મળશે. આરોપીઓ તો ખુલ્લેઆમ વધી રહ્યા છે અને કદાચ કાનના પડદા ફાટી જાય તેટલા સમાચાર રોજ સાંભળવા મળી રહ્યા છે. પરંતુ આ બધાની વચ્ચે એક બાબત એવી બહાર આવી છે તે જોઈને લાગી રહ્યું છે કે દેશમાં એક વિકૃત માનસિકતા ધરાવતો વર્ગ પણ જીવી રહ્યો છે. એક બાજુ આરોપીઓને સજા આપવા માટે લોકો જાહેરમાં આંદોલન કરીને આક્રોશ કરી રહ્યાં છે.  ત્યારે બીજી બાજુ છુપાઈને લોકો પોતાના મોબાઈલમાં પોર્ન સાઈટ્સ પર આ ઘટનાનો વીડિયો શોધી રહ્યાં છે. તમને જાણીને નવાઈ લાગશે કે વીડિયો સર્ચ કરનારા વિકૃત લોકોની સંખ્યા 80 લાખને પાર પહોંચી છે. 

મોટી સંખ્યામાં લોકો સર્ચ કરી રહ્યા છે વીડિયો

હૈદરાબાદની વેટરનરી ડોક્ટર પર ગેંગરેપનો કેસ બન્યા બાદ અચાનક પોર્ન સાઈટ્સ પર લોકો તેનો વીડિયો સર્ચ કરી રહ્યા છે. મળતી માહિતી અનુસાર આ આંકડો 48 કલાકમાં 80 લાખને પાર પહોંચ્યો છે. ભારતીયો સહિત પાકિસ્તાનીઓ પણ આ વીડિયો માટે સર્ચિંગ કરી રહ્યા છે. ઉલ્લેખનીય છે કે આવો કોઈ વીડિયો પોર્ન સાઈટ્સ પર છે જ નહીં છતાં ટોપ ટ્રેન્ડિંગમાં છે.

આ કેવા લોકો છે અને ક્યાંથી આવે છે?

ભારત દેશની જનતાને માટે જેટલું કહો તેટલું ઓછું છે. કારણ કે જે દેશની સડક પર રેપ બાદ મીણબત્તી હાથમાં લઈને લોકો સડક પર જોવા મળી રહ્યા છે. જ્યારે અન્ય લોકો રેપ પીડિતાના વીડિયોને પોર્ન સાઈટ પર જોવા ઈચ્છે છે. આ વાતથી ખ્યાલ આવી રહ્યો છે કે લોકોની માનસિકતા શું થઈ ગઈ છે. આખરે આ લોકો આ વીડિયોને શા માટે જોવા ઈચ્છે છે. આ વાત આપણે જાણતા નથી. ભલે લોકો આ વીડિયોને પોર્ન સાઈટ પર સર્ચ કરીને ટ્રેન્ડ કરી રહ્યા હોય પરંતુ સાઈટ પર આવો કોઈ વીડિયો છે જ નહીં. જો તમે રેપ પીડિતાના નામથી ક્લિક કરશો તો તમને ફક્ત ખાલી પેજ મળશે. 

યુવતીનું નામ કેવી રીતે જાહેર થયું? 

હૈદરાબાદની વેટરનરી ડૉક્ટર યુવતીનો મૃતદેહ સળગેલી હાલતમાં 28 નવેમ્બરના રોજ મળી આવ્યો હતો. બાદમાં યુવતી પર સામુહિક દુષ્કર્મ થયું હોવાનું કન્ફર્મ થયું હતું. જો કે એ પહેલા યુવતી ગુમ થઈ હોવાના અહેવાલો પ્રસારિત થતા તેનું નામ તથા તેની તસવીર માધ્યમોમાં ફરતી થઈ હતી. હૈદરાબાદ પોલીસે યુવતીનું સાચું નામ જાહેર નહીં કરવાની વિનંતી કરતા તેને ‘દિશા’ નામે ઓળખવાની અપીલ કરી હતી. આટલી સંવેદનશીલ ઘટનામાં સોશ્યલ મીડિયા અને કેટલાંક મીડિયા હાઉસે પણ કાયદા અને ગાઈડલાઈનની ઐસી-તૈસી કરીને માત્ર પોતાની TRPની ચિંતા કરી છે. બળાત્કારના કેસમાં પીડિતાની ઓળખ છતી થાય તેવી કોઈ પણ માહિતી પ્રસારિત ન કરવી જોઈએ તેવો કાયદો અને ગાઈડલાઈન છે ત્યારે ખુલ્લેઆમ સોશ્યલ મીડિયા પર નામ તો ઠીક તસવીરો પણ જોવા મળી રહી છે. કદાચ આપણી આ પ્રવૃત્તિએ પણ કેટલાંક માનસિક વિકૃતિ ધરાવતા લોકોની હિંમતને વેગ આપ્યો હોય તેમ કહી શકાય.