ગત વિધાનસભાની ચૂંટણીની સરખામણીએ દાગી ઉમેદવારોની સંખ્યામાં વધારો થયો છે. બંને તબક્કાની ચૂંટણીના કુલ 1621 ઉમેદવારોમાંથી 313 જેટલા ઉમેદવારો વિવિધ ગુનાઓથી ખરડાયેલા છે.
ગુજરાતની 182 બેઠકો માટે 1621 ઉમેદવારો વચ્ચે જામશે જંગ
1621 ઉમેદવારો ઉમેદવારોમાંથી 313 ગુનાઓથી ખરડાયેલા
ગત ચૂંટણીની સરખામણીએ દાગી ઉમેદવારોની સંખ્યા વધી
ગુજરાત વિધાનસભાની ચૂંટણી જાહેર થયા બાદ તમામ રાજકીય પક્ષોએ ઉમેદવારોના નામો જાહેર કરી દીધા છે. તમામ ઉમેદવારોએ ઉમેદવારી ફોર્મ પણ ભરી દીધા છે. ગુજરાત વિધાનસભાની 182 બેઠકના 1621 ઉમેદવારોમાંથી 313 જેટલા ઉમેદવારો વિવિધ ગુનાઓથી ખરડાયેલા છે. ગત વિધાનસભાની ચૂંટણીની સરખામણીએ ગુનાથી ખરડાયેલા ઉમેદવારોની સંખ્યામાં વધારો થયો છે.
વિધાનસભાની 182 બેઠકો માટે કુલ 1621 ઉમેદવારો મેદાનમાં
ગુજરાત વિધાનસભા ચૂંટણીમાં ઉમેદવારોનું ચિત્ર સ્પષ્ટ થઈ ગયું છે. ગુજરાત વિધાનસભાની 182 બેઠકો માટે કુલ 1621 ઉમેદવારો મેદાનમાં છે. ગુજરાતમાં બે તબક્કામાં ચૂંટણી યોજાવા જઈ રહી છે. પ્રથમ તબક્કાની 89 બેઠકો માટે 1 ડિસેમ્બરના રોજ મતદાન થશે, આ માટે કુલ 788 ઉમેદવારો ચૂંટણીના મેદાનમાં છે. જ્યારે બીજા તબક્કાની 93 બેઠકો માટે 5 ડિસેમ્બરના રોજ મતદાન થશે. બીજા તબક્કાની 93 બેઠકો માટે 833 ઉમેદવારો મેદાનમાં છે.
313 ઉમેદવારો સામે વિવિધ પોલીસ કેસ નોંધાયેલા
ચૂંટણી પંચ દ્વારા મતદારો-નાગરિકો માટે લૉન્ચ કરવામાં આવેલી કેવાયસી(નો યોર કેન્ડિડેન્ટ) એપ્લિકેશન મુજબ બંને તબક્કાની ચૂંટણીના કુલ 1621 ઉમેદવારોમાંથી 313 ઉમેદવારો સામે વિવિધ પોલીસ કેસ નોંધાયેલા છે. જેમાં ભાજપના 28, કોંગ્રેલના 30 અને આમ આદમી પાર્ટીના 15 ઉમેદવારો સામે ગુના નોંધાયેલા છે. આ ઉપરાંત અન્ય કેટલીક સ્થાનિક પાર્ટીઓના ઉમેદવારો છે અને સૌથી વધુ અપક્ષના ઉમેદવારો છે. આપને જણાવી દઈએ કે, ચૂંટણી પંચ દ્વારા દરેક રાજકીય પક્ષોને પોતાના ગુનાહિત ઈતિહાસ ધરાવતા ઉમેદવારોની વિગતો વેબસાઈટ પર મૂકવાની સૂચના આપવામાં આવી છે.
ગત ચૂંટણીમાં કુલ 1815 ઉમેદવારો હતા મેદાનમાં
ગત વિધાનસભાની ચૂંટણીના દાગી ઉમેદવારો વિશે વિગતવાર વાત કરીએ તો ગત ચૂંટણીમાં કુલ 1815 ઉમેદવારો મેદાનમાં હતા. જેમાંથી 253 ઉમેદવારો ગુનાહિત ઈતિહાસ ધરાવતા હતા. એટલે કે કુલ ઉમેદવારોના 14 ટકા જેટલા ઉમેદવારો ગુનાથી ખરડાયેલા હતા. જ્યારે 2012માં કુલ 1283 ઉમેદવારો મેદાનમાં હતા. જેમાંથી 222 (17 ટકા) દાગી ઉમેદવારો હતા. આ વખતની ચૂંટણીમાં દાગી ઉમેદવારોમાં 5 ટકાનો વધારો થયો છે. આ વખતે કુલ 19 ટકાથી વધુ ઉમેદવારો ગુનાહિત ઈતિહાસ ધરાવે છે.