તારાજી / દ્વારકામાં સિઝનનો 110 ટકાથી વધુ વરસાદ, સર્વત્ર જળબંબાકાર જેવી સ્થિતિ.. રોડ રસ્તાઓ અને ઘરોમાં પાણી ફરી વળ્યા..  

• વાવાઝોડું ડીપ ડિપ્રેશનમાં ફેરવાશે 
• સમગ્ર દ્વારકા જિલ્લામાં મેઘમહેર 
• રોડ રસ્તા પર માત્ર પાણી જ પાણી 

‘ગુલાબ’ વાવાઝોડું 24 કલાકમાં ‘શાહીન’ બને તેવી આગાહી વચ્ચે તંત્ર સાબદું બન્યું છે ત્યારે આ વાવાઝોડું ગુજરાતના દરિયાકાંઠા સુધી પહોંચતાં ફંટાઈને કચ્છના અખાતમાંથી પાકિસ્તાનના મકરાન કોસ્ટ સુધી પહોંચશે. આમ ગુજરાત પરથી વાવાઝોડાનો ખતરો ઘટી ગયો છે. પરતું વાઝોડાની અસરને પગલે હજું પણ ભારે થી અતિભારે વરસાદનો ખતરો ગુજરાતમાં મંડાઈ રહ્યો છે.

વાવાઝોડું ડીપ ડિપ્રેશનમાં ફેરવાશે 

શાહીનની દહેશતને પગલે સૌરાષ્ટ સહિત અનેક પંથકમાં હવામાન વિભાગે  ભારે વરસાદની આગાહી કરી છે તંત્રે માછીમારોને દરિયો ન ખેડવા માટે સુચના પણ આપી દીધી છે આજે વાવાઝોડાને કારણે સૌરાષ્ટ્ર, કચ્છ, દિવ અને દાદરા નગર હવેલીમાં 60 કિ.મીની ઝડપે પવન ફૂંકાવાની શક્યતાઓ છે તો વાવાઝોડું ડીપ ડિપ્રેશનમાં ફેરવાશે તો દરિયાકાંઠાના વિસ્તારોમાં 45થી 70 કિ.મીની ઝડપ સુધીનો પવન ફૂંકાશે આ તરફ સૌરાષ્ટ્ર અને દક્ષિણ ગુજરાત સહિતના વિસ્તારોમાં 100થી 110 કિમીની ઝડપે પવન ફૂંકાઈ શકે છે.

સમગ્ર દ્વારકા જિલ્લામાં મેઘમહેર 

આ વાવાઝોડાની અસરને પગલે સવારથી જ દ્વારકા જિલ્લામાં મેઘમહેર જોવા મળી રહી છે તો કુરંગા RSPL ઘડી કંપની અને તેની પાસે આવેલી હોટલામાં પણ પાણી ભરાયા છે. ભારે વરસાદને પગલે સમગ્ર પંથક બેટમાં ફેરવાયું છે ત્યારે બચાવ ટીમ દ્વારા અનેક લોકોનું રેસ્ક્યૂ હાથ ધરવામાં આવી રહ્યું છે. દ્વારકાના રાવલ ગામે NDRFની ટીમ દ્વારા 6 લોકોનું રેસ્ક્યૂ ઓપરેશન હાથ ધરવામાં આવ્યું હતું અને બાદમાં તેમને સલામત સ્થળે ખસેડાયા હતા. 

નદીઓ બંને કાઠે વહેતી થઈ 

દ્વારકાના ભારે વરસાદને કારણે નદી નાળા છલકાયા છે નદીઓમાં નવા નીર આવતા દ્વારકાની રેણુકા નદી બે કાંઠે વહેતી થઈ છે કલ્યાણપુરના રાણ ગામની રેણુકા નદી બે કાંઠે વહેતા થતા અનેક ગામોમાં વરસાદી પાણી ભરાયા છે. રેણુકા નદીનો ધસમસતો પ્રવાહ રસ્તા પરથી પસાર થતો હોય તેવો દ્રશ્યો સર્જાયા છે.  આ તરફ દ્વારકાના જામરાવલમાં જળબંબાકાર જેવી સ્થિતિ સર્જાઈ છે. વર્તુ-2 ડેમ અને સાની ડેમના પાણી ફરી વળતા નીચાણવાળા વિસ્તારોમાં જળપ્રલય જેવી સ્થિતિ સર્જાઈ છે.

રોડ રસ્તા પર માત્ર પાણી જ પાણી 

 કલ્યાણપુર તાલુકામાં ભારે વરસાદને કારણે પાનેલી ગામની નદીમાં ઘોડાપૂર આવતા નદી ગાંડીતૂર બની છે જેથી અનેક ગામો બેટમાં ફેરવાયા છે. રોડ રસ્તા પર માત્ર પાણી જ પાણી જોવા મળી રહ્યા છે. ભારે વરસાદને કારણે દ્વારકા જિલ્લાના કોલવા-કંડોરણા પૂલ પર એક વૃદ્ધ તણાયા કોલવા-કંડોરણા વચ્ચેના પૂલ પર પાણીનો ધસમસતો પ્રવાહ વધતા ગ્રામજનો જીવના જોખમે રસ્તો પાર કરી રહ્યાં છે તે સમયે પૂલ પરથી પસાર થતા એક વૃદ્ધ તણાયા હતો તો બીજી તરફ દૂધ આપવા જઇ રહેલા યુવકનું બાઇક પણ ધસમસતા પ્રવાહમાં તણાયું હતું. 

નદીઓના પાણી રસ્તાઓ પર ફરી વળ્યા 

દ્વારકા જિલ્લામાં સાર્વત્રિક વરસાદને પગલે નદીઓના પાણી રસ્તાઓ પર ફરી વળતા ખંભાળિયા-લીંબડી હાઇવેના ડાયવર્ઝન પર પણ પાણી ભરાયા છે જેને પગલે વાહન રસ્તાની બંને તરફ ટ્રાફકજામના દ્રશ્યો સર્જાયા છે. આ તરફ ભાટીયા-ભોગાત હાઇવે પર પાણી ફરી વળ્યા છે, જેથી નાના વાહનોની અવરજવર બંધ થઈ ગઈ છે.

ભારે વરસાદને પગલે ખંભાળિયાની ઘી નદીમાં ઘોડાપૂર આવ્યું છે. દ્વારકા પંથકમાં ચૌતરફ પાણી ફરી વળ્યા છે જેમાં ખેડૂતોના ખેતરો પણ બાકાત રહ્યા નથી ભારે વરસાદના કારણે કુરંગા આસપાસના વિસ્તારોમાં જનજીવન અસ્તવ્યસ્ત થઈ ગયુ છે કુરંગા હાઈવે પાસેના ખેતરોમાં પાણી ફરી વળતા ખેડૂતોના તૈયાર પાક એડે ગયો છે. વરસાદની તારાજીને પગલે જનજીવ અસ્તવ્યસ્ત બન્યું છે. 

છેલ્લા 17 કલાકમાં 6 ઇંચ વરસાદ 

દેવભૂમિ દ્વારકા જિલ્લામાં પણ મોડીરાતથી વરસાદ સતત વરસી રહ્યો છે, ત્યારે જામખંભાળિયા, જામકલ્યાણપુર પંથકમાં છેલ્લા 17 કલાકમાં 6 ઇંચ વરસાદ નોંધાયો છે, જ્યારે ખંભાળિયામાં 5 ઈંચ વરસાદ,ભાણવડમાં દોઢ ઈંચ વરસાદ શહેરમાં મેઘરાજાની તોફાની બેટિંગને પગલે ઇસ્કોન ગેટ, રેલવે સ્ટેશન રોડ રસ્તાઓ પર પાણી ફરી વળ્યા છે. જેને કારણે વાહન ચાલકોને મુશ્કેલીમાં મુકાયા છે. દ્રારકાના ભાટિયાના સહિત દ્વારકાધીશ સોસાયટી,કૃષ્ણનગર સહિતના વિસ્તારોમાં ભરાતા સ્થાનિકોને હાલાકી ભોગવવાનો વારો આવ્યો છે.