અમદાવાદ ક્રિકેટ સટ્ટાકાંડ મામલે સૌથી મોટો ખુલાસો થયો છે. બુકીઓએ બેંકના કર્મચારીઓની સાથે મિલીભગતથી અન્યના ડોક્યુમેન્ટથી 100-200 નહીં પરંતુ 10 હજારથી વધારે ખાતા ખોલાવ્યા. ગેરકાયદેસર આવતા પૈસાને કાયદેસર બનાવવા આ પ્લાન બનાવ્યો.
અમદાવાદમાં ક્રિકેટ સટ્ટાકાંડમાં વધુ ખુલાસા
'મહાદેવ બુક' માટે ગુજરાતમાં 10 હજારથી વધુ બેંક એકાઉન્ટ ખોલાયા
ગેરકાયદે આવતા નાણાને કાયદેસર બનાવવા એકાઉન્ટ ખોલાયા
અમદાવાદના માધુપુરા ક્રિકેટ સટ્ટાકાંડમાં એક પછી એક ચોંકાવનારા ખુલાસા થઈ રહ્યા છે. આ કૌભાંડમાં બેંક કર્મચારીઓની પણ સંડોવણી બહાર આવી છે. 'મહાદેવ બુક' માટે કામ કરતા બુકીઓએ ગેરકાયદેસર રીતે આવતા નાણાંને કાયદેસર બનાવવા માટે 100 કે 200 નહીં પરંતુ 10 હજારથી વધારે બેંક એકાઉન્ટ ખોલાવ્યા હતા. બુકીઓ બેંકના કર્મચારીઓની સાથે મળીને અન્યના ડોક્યુમેન્ટથી એકાઉન્ટ ખોલાવીને બેંકમાંથી ચેકબુક-ડેબિટ કાર્ડ લઈ લેતા હતા. મોટા ભાગના બેંક એકાઉન્ટ ભાડા આપીને ચલાવાતા હતા. આર્થિક વ્યવહારની લિમિટ પૂર્ણ થવા પર બેંક એકાઉન્ટ બંધ કરવામાં આવતા હતા. પોલીસની તપાસમાં બેંકોના એક્ઝીક્યુટીવથી લઈને મોટા અધિકારીઓના નામ પણ બહાર આવી શકે તેમ છે.
શું છે સમગ્ર મામલો?
IPL પહેલા અમદાવાદના માધુપુરામાં આવેલી એક ખાનગી ઓફિસમાં દરોડો પાડીને PCBની ટીમે સટ્ટો રમાડનારા 4 આરોપીઓની ધરપકડ કરી હતી. તપાસમાં 1 હજાર 800 કરોડથી વધારેના રૂપિયાના વ્યવહાર મળી આવ્યા હતા. આરોપીઓએ સટ્ટો રમાડવા અને બેંક એકાઉન્ટ મેનેજ કરવા આ ઓફિસ રાખી હોવાનું પણ સામે આવ્યું હતું. આ ઓફિસમાંથી ઈન્ટરનેશનલ એકાઉન્ટ મેનેજ કરાતું હોવાનું પણ સામે આવ્યું હતું. PCBની તપાસમાં 500થી વધારે એકાઉન્ટ મળી આવ્યા હતા. સાથે 100 જેટલા સિમકાર્ડ અને મોબાઈલ પણ મળી આવ્યા હતા. IPL સટ્ટાકાંડમાં રેડ દરમિયાન નામચીન બુકીઓના ઓનલાઈન આઈડી પણ મળી આવ્યા હતા. જેમા મહાદેવ બુક, ક્રિષ્ના રેડ્ડી બુકના સટ્ટા એકાઉન્ટ મળી આવ્યા હતા.
4 શખ્સોની કરાઈ હતી ધરપકડ
PCBની ટીમે ઓફિસમાંથી (1) જીતેન્દ્ર હીરાગર (રહે.લક્ષ્મીનગર, સાબરમતી), (2) સતીષ પરિહાર (રહે.નંદનવન એપાર્ટમેન્ટ, નવા વાડજ), (3) અંકિત ગેહલોત (રહે.રત્નાસાગર સોસાયટી, મેઘાણનગર) અને (4)નિરવ પટેલ (રહે.શુભમ ગેલેક્ષી, નવા નરોડા) નામના શખ્સની ધરપકડ કરી હતી.
મહાદેવ બુકી ઉર્ફે સૌરભ ચંદ્રાકરનું નામ આવ્યું હતું સામે
જે બાદ તપાસ કરતા આ સટ્ટાકાંડના તાર દુબઈથી ભારતનો સૌથી મોટો સટ્ટો રમતા મહાદેવ બુકી ઉર્ફે સૌરભ ચંદ્રાકર સાથે જોડાયેલા હોવાનું બહાર આવ્યું હતું. મહાદેવ બુકીને સટ્ટા બેટિંગના નેટવર્કને ચલાવવા માટે હજારો બેંક એકાઉન્ટની જરૂરિયાત રહેતી હતી. જેથી તેના માટે ફ્રેન્ચાઇઝી પેટર્નથી કામ કરતા બુકીઓએ બેંક એકાઉન્ટ ખોલાવવા માટે અલગ ટીમ બનાવી હતી.
ગ્રામ્ય વિસ્તારના લોકોના ડોક્યુમેન્ટથી ખોલાવતા હતા ખાતા
જેઓ ગ્રામ્ય વિસ્તારના લોકોને મહિને 5 હજાર આપવાનું કહીને બેંક એકાઉન્ટ ખોલાવવા માટે ડોક્યુમેન્ટ લઈ લેતા હતા. સાથે જ તેમના ડોક્યુમેન્ટથી સીમકાર્ડ પણ લેતા હતા. જે બેંક એકાઉન્ટ સાથએ જોડાયેલા મોબાઈલ નંબરનું રહેતું હતું. તેઓ મોટે ભાગે ખાનગી બેંકોને જ પસંદ કરતા હતા. કારણ કે ખાનગી બેંકોને ખાતા ખોલાવવા માટે ટાર્ગેટ આપવામાં આવતા હતી. આ એકાઉન્ટમાં આર્થિક મર્યાદા પૂર્ણ થયા બાદ ખાતાને બંધ કરાવી દેવામાં આવતા હતા.