મોરબી નગરપાલિકામાં ત્રણ વોર્ડની છ બેઠકો માટે પેટા ચૂંટણી શાંતિપૂર્ણ માહોલમાં યોજાઈ હતી. જાગૃત નાગરીકો વહેલી સવારથી જ મતદાન કરવા માટે મતદાન મથકે ઉમટ્યા હતા. આ ચૂંટણીમાં 46 જેટલા EVM મશીનનો ઉપયોગ કરવામાં આવ્યો છે.
તો તરફ મતદાન પ્રક્રિયા માટે 400 જેટલા ચૂંટણી કર્મચારીઓ પણ ફરજ બજાવી રહ્યા છે. મહત્વનું છે કે ત્રણ વોર્ડની પેટા ચૂંટણીમાં કુલ 40 મતદાન મથકો પૈકી 34 મતદાન મથકો સંવેદનશીલ ગણવામાં આવા છે. તેથી પોલીસનો ચાપતો બંદોબસ્ત અહી ગોઠવવામાં આવ્યો છે.
ઉલ્લેખનીય છે કે આજે સવારે મતદાન શરૂ થતાં જ મતદારો ઉત્સાહભેર મતદાન કરવા માટે પહોંચ્યા હતા અને મોટાભાગે વડીલોએ મતદાનની શરૂઆત કરી તંદુરસ્ત લોકશાહી માટે પોતાની ફરજ નિભાવી હતી.
મોરબી પાલિકાની પેટા ચૂંટણીમાં વોર્ડવાઇઝ મતદારોની સંખ્યા જોઈએ તો વોર્ડ નંબર-1માં બે બેઠકો માટે 5168 પુરુષ મતદાર અને 4622 સ્ત્રી મળી કુલ 9790 મતદારો બે ઉમેદવારોનું ભાવિ નક્કી કરશે.
એવી જ રીતે નગરપાલિકાના વોર્ડ નંબર-3 માં 5951 પુરુષ અને 5412 સ્ત્રીઓ સહિત કુલ 11363 મતદારો એક ઉમેદવારનું ભાવિ નક્કી કરશે. જ્યારે વોર્ડ નંબર-6 માટે પેટાચૂંટણી લડતા ત્રણ ઉમેદવારોનું ભાવિ 5204 પુરુષ મતદાર અને 4742 સ્ત્રી મતદાર મળી 9946 મતદારો આ બેઠકનું ભાવિ નકકી કરશે.
આપને જણાવી દઇએ કે મોરબી નગરપાલિકાના ત્રણ વોર્ડની પેટા ચૂંટણીમાં કુલ 40 મતદાન મથકો પૈકી 34 મતદાન મથકો સંવેદનશીલ ગણાવવામાં આવતા પોલીસનો ચાપતો બન્દોબસ્ત ગોઠવવામાં આવ્યો છે અને સવારથી મતદારોનો ઉત્સાહ જોતા સાંજ સુધીમાં 55 થી 60 ટકા મતદાન થાય તેવી શક્યતા જોવાઇ રહી છે.