રાજકારણ / મોરબી : ચૂંટણીની શરત હારી જતા ભાજપ નેતાના ભાઈને મળી ધમકી, પછી જે થયું તે જાણીને ચોંકી જશો

• ચૂંટણીની શરત મામલે ધમકી
• શરત હારી જતા માગ્યા 10 લાખ
• અપક્ષ ઉમેદવાર પરબત હુંબલે આપી ધમકી

મળતી માહિતી મુજબ મોરબીના રવાપર રોડ પર આવેલ વ્રજ સોસાયટીમાં રહેતા મહેન્દ્રભાઈ પ્રેમજીભાઈ ચીખલીયા(ઉ.૪૦)એ માળિયા પોલીસમાં ફરિયાદ નોંધવી હતી કે આરોપી પરબતભાઈ ભવાનભાઈ હુંબલ રહે-હાલ મોરબી મૂળ મોટા દહીસરા વાળા જીલ્લા પંચાયતની સામાન્ય ચૂંટણી વખતે અપક્ષ ઉમેદવાર તરીકે ઉભા હતા. ફરિયાદી મહેન્દ્રભાઈ ચીખલીયાએ અપક્ષ ઉમેદવાર તરીકે આ સીટ પરથી એક હાજર મત પણ મેળવવા અઘરા છે તેમ કહેતા ફરિયાદી મહેન્દ્રભાઈ તથા આરોપી પરબતભાઈ વચ્ચે મતની શરત બાબતે રૂપિયા એકલાખની શરત લગાવેલ જે આરોપી પરબતભાઈ વધુ મત મેળવી શરત જીતી જતા ફરિયાદી મહેન્દ્રભાઈ પાસે નક્કી થયા મુજબના એક લાખ રૂપિયાને બદલે 10 લાખની માંગણી કરતા રકજકના અંતે રૂપિયા સાત લાખ આપી દેવાનું નક્કી થતા જે રૂપિયા મેળવવા આરોપી પરબતભાઈએ દબાણ કરી અવારનવાર ફરિયાદી મહેન્દ્રભાઈ તથા સાહેદોને રૂબરૂ તથા મોબાઈલ ફોન પર ગાળો આપી જાનથી મારી નાખવાની ધમકી આપી રૂપિયા એક લાખ ફરિયાદીના ભાઈ સાહેદ કિશોરભાઈ પાસેથી બળજબરીથી કઢાવી લઇ બાકીના રૂપિયા છ લાખ આપી દેવા દબાણ કરતા હોવાની ફરિયાદ માળિયા પોલીસમાં નોંધાઈ છે. તો માળિયા પોલીસે ફરિયાદ નોંધી વધુ તપાસ હાથ ધરી છે.

આરોપી નિવૃત પોલીસ હોવાનું સામે આવ્યું 

આરોપી પરબતભાઇ ભવાનભાઇ હુંબલ અગાઉ રાજકોટ રૂરલ જિલ્લામાં પોલીસ ડ્રાઇવર તરીકે ફરજ બજાવતો હતો. ત્યારબાદ પોતે આશરે સાત આઠ વર્ષ પહેલા સ્વૈછીકપણે રાજીનામુ લીધેલ હતું. ત્યારબાદ પોતાની મોટા દહીંસરા ખાતે આવેલ વાડી ખાતે જીમખાનાનું લાયસન્સ મેળવી જીમખાનાના ઓઠા હેઠળ ગેરકાયદે પ્રવૃતિઓ ચલાવતો હોવાનુ સામે આવ્યું છે.   

પૂર્વ પોલીસ મેન ગેરકાયદેસર પિસ્તોલ સહીત 7.16 લાખના મુદ્દામાલ સાથે ઝડપી પાડ્યો

પૂર્વ પોલીસ મેન આરોપી પરબતભાઇ ભવાનભાઇ હુંબલને ગાડી, મોબાઈલ ફોન સહિત ગેરકાયદે દેશી બનાવટી પિસ્તોલ તથા જીવતા કારતૂસ સાથે ઝડપી લેવામાં આવ્યો છે. પોલીસ દ્વારા હથિયાર ક્યાંથી લાવ્યો, કોણે આપ્યા વગેરે દિશાઓમાં પોલીસ તપાસ ચલાવી રહી છે.   

અપક્ષ ઉમેદવાર પરબત હુંબલે બળજબરીથી રૂપિયા 1 લાખ લઈ લીધા હોવાનો આક્ષેપ

મોરબી જિલ્લા પંચાયતના માજી પ્રમુખ તેમજ ફરિયાદીના ભાઈ કિશોરભાઈ ચીખલીયા પાસેથી બળજબરીથી 10 લાખ માંગ્યા હતા. ત્યાર બાદ 7 લાખ નકકી કરીને 1 લાખ રૂપિયા પડાવામાં આવ્યા હતા.