મોરબીમાં આફતનો વરસાદ વરસ્યો છે. જેમાં 8થી વધુ લોકોના મોત નિપજ્યાં છે. તો અનેક વિસ્તારો જળમગ્ન થયા છે. આ દરમિયાન મોરબીમાં NDRF અને પોલીસની પ્રશંસનીય કામગીરી સામે આવી છે.
મોરબી જિલ્લામાં શુક્રવારથી જ ધોધમાર વરસાદ પડી રહ્યો છે. ત્યારે રાત્રીના સમયથી વરસાદનું જોર વધ્યું છે. જેને લઇને અનેક ડેમ ઓવરફ્લો થયા છે. અનેક ગામડાઓમાં પાણી ઘુસી ગયા છે. તો NDRF અને પોલીસ દ્વારા ફસાયેલા લોકોનું રેસ્ક્યું કરવાની કામગીરી હાથધરવામાં આવી છે. આ દરમિયાન વધુ એક પોલીસ જવાનની સેવા સામે આવી છે.
મોરબીમાં રેસ્ક્યુ કરતા પોલીસનો વીડિયો વાયરલ થયો છે. કોન્સ્ટેબલ પૃથ્વીરાજસિંહ જાડેજાનો વીડિયો વાયરલ થયો છે. જેમાં કોન્સ્ટેબલે જીવના જોખમે બાળકીઓને બચાવી હોવાનુ સામે આવ્યુ છે. પોલીસના જવાને ખભા પર બાળકોને લઈને પાણીના ધસમસતા વહેણમાં બાળકોને બચાવ્યા હતા.
ભારે વરસાદ વચ્ચે NDRF અને પોલીસ દ્વારા કસ્તુરબા ગાંધી સ્કૂલની 43 વિદ્યાર્થીનિઓનું રેસ્ક્યુ કરાયું હતું. જેમાં પોલીસ કોન્સ્ટેબલ પૃથ્વીરાજસિંહ જાડેજાએ બે બાળકીને બચાવી હતી. 9 શિક્ષકોને પણ સ્કૂલમાંથી સુરક્ષિત બહાર કાઢવામાં આવ્યા હતા. ભારે વરસાદથી સ્કૂલની ચારેય બાજુ પાણી ભરાઇ ગયા હતા. જેમાંથી તમામને બચાવાયા છે. ત્યારે જિલ્લા વહીવટી તંત્રની શાનદાર કામગીરી સામે આવી છે.
મહત્વનું છે કે, મોરબી જિલ્લામાં હવામાન વિભાગ દ્વારા ભારે વરસાદની આગાહી કરવામાં આવતા મોરબી જિલ્લા તંત્ર અલર્ટ થયું છે. ત્યારે જિલ્લામાં ભારે વરસાદની સ્થિતિમાં બચાવ કામગીરી માટે એક NDRFની ટીમને તૈનાત કરી દેવામાં આવી છે.
મચ્છુમાં આવ્યા નવા નીર
મોરબીમાં ભારે વરસાદ થતા વાંકાનેર પાસેનો મચ્છુ-1 ડેમ ઓવરફ્લો થયો છે. જ્યારે મચ્છુ 2 ડેમના 4 ફૂટ સુધી 6 દરવાજા ખોલાયા છે.
નીચાણવાળા વિસ્તારોમાં અલર્ટ
મોરબાના ટંકારામાં ધોધમાર વરસાદ પડી રહ્યો છે. ભારે વરસાદને કારણે ટંકારાનો ડેમી-1 ડેમ ઓવરફલો થયો છે. વરસાદને લઈને તંત્રએ નિચાણવાળા ગોમોને અલર્ટ જાહેર કર્યા છે. મીતાણા, રાજાવડ, ભૂત કોટડા ગામને અલર્ટ જાહેર કર્યા છે.