કાર્યવાહી / નશાની નાગચૂડમાં મોરબી, 10 લાખના મેફેડ્રોન ડ્રગ્સના જથ્થા સાથે આરોપીને દબોચી લેતી SOG,  નેટવર્કના મૂળ સુધી પહોચવા કવાયત

• મોરબી પોલીસે 100 ગ્રામ ડ્રગ્સ ઝડપી પાડ્યું
• 10 લાખના મુદ્દામાલ સાથે એકની ધરપકડ
• પોલીસે હાથ ધરી તપાસ

ગુજરાતમા દિવસેને દિવસે ડ્રગ્સનું દુષણ વકરી રહ્યું છે. જેને નાબૂદ કરવા પોલીસ દ્વારા મોટી કાર્યવાહીના દાવા કરવામાં આવે છે. છતાં આ દૂષણ અટકતું નથી અને છાશવારે ડ્રગ્સના જથ્થા સાથે આરોપીઓ પોલીસ ઝપટે ચડી રહ્યા છે. તેવામાં મોરબી પોલીસને સફળતા હાથ લાગી છે. જેમાં ૧૦૦ ગ્રામ મેફેડ્રોન ડ્રગ્સના જથ્થા સાથે માળીયા મીયાણા પંથકમાંથી પોલીસે એક શખ્સને દબોચી લીધો હતો.

૧૦ લાખ ઉપરાંતનો મુદામાલ કબજે કરાયો
આ અંગે પોલીસ મથકેથી જાણવા મળતી વિગત અનુસાર એક શખ્સ સામખીયાળી બાજુથી મોરબી - માળીયા નેશનલ હાઇવે રોડ પર આવેલ ભીમસર ચોકડીના ઓવરબ્રીજ નજીક ડ્રગ્સ સાથે આવવાનો હોવાની બાતમી મળી હતી.જેને લઈને પોલીસ તાત્કાલિક દોડી ગઇ હતી. આ દરમિયાન એક શખ્સ શંકાસ્પદ હાલતમાં નજરે ચડતા પોલીસે તેને અટકાવ્યો હતો અને તલાશી લીધી હતી. જેમાં દેવીલાલ મગારામ સેવર (ઉ.વ .૨૪ રહે. રાજસ્થાન) ના કબ્જામાથી 10 લાખની કિંમતનો ૧૦૦ ગ્રામ MD ડ્રગ્સનો જથ્થો ઝડપાયો હતો.આથી પોલીસે આરોપીને પકડી પાડી એક મોબાઈલ, ૪૫૮૦ રૂપિયા રોકડ સહિત  કુલ ૧૦,૦૯,૫૮૦ નો મુદામાલ કબજે કર્યો હતો. અને આરોપી વિરુદ્ધ એન.ડી.પી.એસ. એકટ ૮ (C), ૨૧ મુજબ ગુન્હો નોંધી કાર્યવાહી આગળ ધપાવી છે.હાલમાં પકડાયેલ શખ્સ મેફેડ્રોન ડ્રગ્સનો જથ્થો ક્યાંથી લઈને આવ્યો હતો અને તે ક્યાં આપવા માટે જઈ રહ્યો હતો તે દિશામાં પોલીસ દ્વારા તપાસ શરૂ કરવામાં આવી છે.

ડ્રગ્સના નેટવર્કના મૂળ સુધી પહોચવા તપાસ
ઉલ્લેખનિય છે કે અગાઉ મોરબી તાલુકાના જીંજુડા ગામેથી ડ્રગ્સનો મોટો જથ્થો એટીએસની ટિમ દ્વારા પકડવામાં આવ્યો હતો અને મોરબીના કેટલાક શખ્સો ડ્રગ્સ સાથે બીજા જીલ્લામાં ઝડપાયા હતા. જેથી કરીને મોરબી પંથકમાં પણ ડ્રગ્સની મોટા પ્રમાણમાં દારૂની જેમ હેરાફેરી થવા લાગી હોય તેવો ઘાટ છેલ્લાં સમયથી મોરબી જિલ્લાની અંદર જોવા મળી રહ્યો છે ત્યારે હાલમાં પકડાયેલ શખ્સને સાથે રાખીને પોલીસ દ્વારા ડ્રગ્સના નેટવર્કના મૂળ સુધી પહોચવા માટેની હાલમાં કવાયત શરૂ કરવામાં આવી છે જો કે, મેફેડ્રોન ડ્રગ્સના મૂળ કયા સુધી પથરાયેલા છે તે તપાસ બાદ જ સામે આવશે.