મોરબી માળીયા વિધાનસભા બેઠકની પેટા ચૂંટણીનું પ્રચારયુદ્ધ હવે અંતિમ તબબકામાં પહોંચી ગયું છે. આથી ભાજપ અને કોંગ્રેસના ઘુરંઘરો મોરબી અને માળીયામાં ચૂંટણી સભા ગજાવી રહ્યાં છે. ત્યારે મોરબી કોંગ્રેસના ઉમેદવારે ચૂંટણી પહેલા મોટી જાહેરાત કરી છે. કોંગ્રેસના ઉમેદવાર જયંતિ પટેલે પોતે ચૂંટણી જીતશે તો પગાર નહીં લેવાની જાહેરાત કરી છે.
મોરબી કોંગ્રેસના ઉમેદવાર છે જયંતિ પટેલ
હું ધારાસભ્ય બનીશ તો 22 મહિનાનો પગાર નહીં લઉંઃ જયંતિ પટેલ
તમામ પગાર જનતાની સેવામાં વાપરવાની કરી જાહેરાત
આગામી 3 નવેમ્બરે રાજ્યમાં 8 બેઠકો પર પેટાચૂંટણી યોજાવાની છે. ત્યારે આ વિધાનસભાની પેટા ચૂંટણીનો માહોલ જામ્યો છે. ત્યારે મતદાતાને રીઝવવા માટે ચૂંટણી પ્રચારમાં અવનવા પ્રયોગ અને જાહેરાત કરવામાં આવી રહી છે. ત્યારે પેટાચૂંટણી પહેલા મોરબીના કોંગ્રેસના ઉમેદવાર જયંતિ પટેલે કહ્યું કે, હું ધારાસભ્ય બનીશ તો પગાર નહીં લઉં, મારો તમામ પગાર જનતાની સેવામાં વાપરીશ. જયંતિ પટેલે એક ફેસબુક પોસ્ટમાં લખ્યું કે, હું જયંતીલાલ પટેલ વચન આપું છું કે ધારાસભ્ય બનીશ તો 22 મહિનાનો અંદાજિત રૂપિયા 24,00,000/-થી વધુ પગાર મોરબી માળીયાની જનતાની સેવામાં વાપરીશ. મહત્વનું છે કે, આ મોરબીના કોંગી ઉમેદવાર જયંતિ પટેલ કરોડોપતિ છે.
જયંતીલાલ નું વચન હું જયંતીલાલ પટેલ વચન આપું છું કે ધારાસભ્ય બનીશ તો 22 મહિનાનો અંદાજિત રૂપિયા 24,00,000/- થી વધુ પગાર મોરબી માળીયાની જનતાની સેવામાં વાપરીશ.
મોરબીના આ કોંગ્રેસના ઉમેદવાર જયંતિ પટેલ 7.22 કરોડના આસામી
જયંતિ પટેલે ભરેલા ઉમેદવારી ફોર્મમાં પોતાની જંગમ મિલ્કત રૂ. 6.72 કરોડની તેમજ સ્થાવર મિલકત રૂ. 50.85 લાખની દર્શાવી છે. તેઓના પત્ની ઉષાબેનના નામે જંગમ મિલકત રૂ. 1.67 કરોડની તેમજ હિન્દૂ અવિભક્ત કુટુંબના નામે જંગમ મિલકત 2.01 કરોડની છે.
વર્ષ 2019-20ના વર્ષમાં જયંતીભાઈની આવક રૂ. 99.50 લાખ, તેઓના પત્નીની રૂ. 26.80 લાખ અને હિન્દૂ અવિભક્ત કુટુંબની રૂ. 33.59 લાખ રહી હતી. તેઓ પાસે હાથ પરની રોકડ માત્ર રૂ. 19,012 તેમની પત્ની પાસે રૂ.1.17 લાખ છે.
બૅંકમાં થાપણ અને કંપનીઓમાં રોકાણ
જયંતિ પટેલ બેન્કની તેમજ અન્ય સંસ્થાઓની થાપણો રૂ. 5.68 કરોડ તેમજ પત્નીની રૂ.2.32 કરોડ છે. સન ગ્લોઝ સિરામિક ઇન્ડસ્ટ્રીઝમાં તેઓ રૂ. 3.61 કરોડનું રોકાણ ધરાવે છે. તેઓએ ઇમ્પીરિયમ સિરામિક પ્રા.લી.ને રૂ. 75 લાખની લોન આપી છે. તેઓ રૂ.16.50 લાખની એક કાર ધરાવે છે. રૂ. 1.50 લાખની કિંમતનું 75 ગ્રામ સોનુ ધરાવે છે. તેઓની પત્ની પણ રૂ. 2.50 લાખની કિંમતનું 300 ગ્રામ સોનુ ધરાવે છે. સાથે તેઓને અંદાજે 2 હેકટર જેટલી ખેતીની વારસાગત જમીન પણ છે. તેઓને રાજકોટમાં એક ફ્લેટ તેમજ જોધપરમાં એક અને મોરબીમાં બે મકાન છે. તેઓ ઉપર રૂ. 1.40 કરોડની લોનની જવાબદારી પણ છે.