ભારતની અર્થવ્યવસ્થામાં સુધારાના સંકેતને જોતાં હવે રેટિંગ એજન્સીઓ ભારતની ઇકોનોમીને લઇ પોઝિટિવ જોવા મળી રહી છે. રેટિંગ એજન્સી મૂડીઝે વર્ષ 2020 માટે ભારતના GDP ગ્રોથનું પોતાનું અનુમાન વધારી દીધુ છે. નાણા મંત્રી નિર્મલા સીતારમણે આર્થિક પેકેજના એલાન સમયે આ અંગે જણાવ્યું હતું.
કેન્દ્ર સરકાર માટે આ ઘણા સારા સમાચાર છે. મૂડીઝે ઇન્વેસ્ટર્સ સર્વિસે આ વર્ષ માટે GDP ગ્રોથનું અનુમાન વધારીને -8.9 ટકા કરી દીધું છે. આ પહેલા રેટિંગ એજન્સીએ અનુમાન -9.6 ટકા રાખ્યું હતું. એટલે કે આ આંતરરાષ્ટ્રિય રેટિંગ એજન્સીને ભારતની અર્થવ્યવસ્થામાં ઝડપી સુધારના સંકેત જોવા મળી રહ્યાં છે.
તે સિવાય મૂડીઝે આવનાર વર્ષ 2021 માટે ભારતના GDP ગ્રોથનું અનુમાન 8.1 ટકાથી વધારીને 8.6 ટકા કરી દીધું છે. મૂડીઝનું માનીએ તો આવનારા વર્ષમાં ઝડપથી રિકવરીની આશા છે. એજન્સીએ ગુરુવારે પોતાના ગ્લોબલ મેક્રો આઉટલૂક 2021-22 રિપોર્ટમાં આ અંગેની જાણકારી આપી છે.
ભારતના અનુમાનમા વધારો કરતા મૂડીઝે કહ્યું કે કોરોનાના કેસમાં ઘટાડો થવાથી દેશમાં દરેક પ્રકારની આર્થિક ગતિવિધિઓ પર લગાવામાં આવેલ પ્રતિબંધ દૂર કરવામાં આવી રહ્યો છે. ભારતમાં નવા સંક્રમણનો દર 5 ટકાથી પણ નીચે જતો રહ્યો છે. લોકડાઉનમાં પ્રતિબંધોમાં છૂટ-છાટ પછી હવે કેટલાંક મહીનાઓથી ભારતની અર્થવ્યવસ્થા ઝડપથી રિકવર કરી રહી છે.
મૂડીઝે પોતાના રિપોર્ટમાં કહ્યું કે આ જ કારણ છે કે આવનારા ત્રિમાસિકમાં આર્થિક ગતિવિધિઓમાં હજુ પણ વધુ તેજીની આશા કરવામાં આવી રહી છે.