રેટિંગ એજન્સી મૂડીઝે પણ ભારતનું રેટિંગ ડાઉન ગ્રેડ કરીને મોટો ઝટકો આપ્યો છે. મૂડીઝે ભારતના રેટિંગનું આઉટલુક 'સ્ટેબલ'થી બદલીને 'નેગેટિવ' કર્યું છે. BAA2 રેટિંગને સમર્થન આપતાં મૂડીઝે જણાવ્યું છે કે મૂડીઝ ઇન્વેસ્ટર્સ સર્વિસ દ્વારા ભારતના ક્રેડિટ રેટિંગ આઉટલુકને નકારાત્મક કરી દેવામાં આવ્યું છે.
ગયા મહિને પણ મૂડીઝે ભારત માટેનું ગ્રોથ રેટ અનુમાન ઘટાડયું હતુ
દુનિયાની રેટિંગ એજન્સીઓ ભારતના જીડીપી ગ્રોથનું ઘટાડી રહી છે અનુમાન
લાંબા સમય માટેની આર્થિક સુસ્તી આવક વૃદ્ધિની તકો ઘટાડશે
આ મંદી તરફનું એક પ્રથમ પગલું છે, કારણ કે આર્થિક મંદીને લઇને ચિંતા લાંબો સમય રહેશે તો ભારતનું દેવું વધશે. આજકાલ દુનિયાભરની રેટિંગ એજન્સીઓ ભારતના જીડીપી ગ્રોથનું અનુમાન ઘટાડી રહી છે. મૂડીઝે નાણાકીય વર્ષ ૨૦૨૦-૨૧ માટે જોકે ગ્રોથ રેટ વધારીને ૬.૬ ટકા રહેવાનું અનુમાન કર્યું છે.
મૂડીઝે પોતાના રિપોર્ટમાં કેટલાંક જોખમી પરિબળો ટાંકીને જણાવ્યું છે કે ભારતનો આર્થિક ગ્રોથ સરકારની ઓછી અસરકારક નીતિના કારણે તુલનાત્મક રીતે નીચો રહેશે. ભારતમાં આર્થિક ક્ષેત્રે ખૂબ જ સુસ્તી જોવા મળી રહી છે અને તેનો આર્થિક વિકાસ એપ્રિલથી જૂન ક્વાર્ટરમાં છ વર્ષની નીચી સપાટીએ પહોંચ્યો છે.
મૂડીઝે ભારતનું વધતું જતું દેવું અને બજેટખાધને મર્યાદિત રાખવા માટે ભારતના અનેક પ્રયાસોને ટાંકીને જણાવ્યું છે કે ભારત દ્વારા લેવામાં આવેલાં શ્રેણીબદ્ધ પગલાંની કોઇ નક્કર અસર વરતાતી નથી. આ ઉપરાંત મૂડીઝે નાણાકીય સંકટ ખાસ કરીને ગ્રામીણ વિસ્તારમાં રોજગારનું ઓછું પ્રમાણ જેવાં પરિબળો ટાંકીને જણાવ્યું છે કે સરકાર આર્થિક સુસ્તીને દૂર કરવામાં નિષ્ફળ રહી છે.
મૂડીઝના સોવરિન રિસ્ક ગ્રૂપના વાઇસ પ્રેસિડેન્ટ વિલિયમ ફોસ્ટરે જણાવ્યું છે કે લાંબા સમય માટેની આર્થિક સુસ્તી આવક વૃદ્ધિની તકો ઘટાડશે. આ અગાઉ પણ ઓક્ટોબર મહિનામાં મૂડીઝે ભારતના વિકાસદરનું અનુમાન ઘટાડ્યું હતું. નાણાકીય વર્ષ ૨૦૧૯-૨૦ માટે મૂડીઝે જીડીપી ગ્રોથ ઘટાડીને ૫.૮ ટકા કર્યો હતો.