GST / આર્થિક મોરચા પર ખુશખબર, સતત 7માં મહિને GST કલેક્શન 1.40 લાખ કરોડને પાર, જાણો આંકડા

• સપ્ટેમ્બર મહિનામાં જીએસટી કલેક્શન આંકડા
• જીએસટી કલેક્શન 1.4 લાખ કરોડ રૂપિયાને પાર
• ગત વર્ષના સપ્ટેમ્બર કરતા અ વર્ષે 26 ટકા વધારો

મહામારીની અસર બહાર આવવાની સાથે જ સરકારની આવકમાં સ્થિરતા દેખાવા લાગી છે. સપ્ટેમ્બરમાં સતત 7મા મહિને જીએસટી કલેક્શન 1.4 લાખ કરોડ રૂપિયાને પાર કરી ગયું છે. નાણા મંત્રાલયે આજે આ જાણકારી આપી છે. મંત્રાલયના જણાવ્યા અનુસાર સપ્ટેમ્બર મહિનામાં જીએસટી કલેક્શન ગત વર્ષની સરખામણીએ 26 ટકા વધીને 1.47 લાખ કરોડ રૂપિયા રહ્યું છે. આ સાથે સપ્ટેમ્બર મહિનામાં ઈ-બિલ અને ઈ-ઈનવોઈસની સંખ્યા પણ 1.1 કરોડને પાર કરી ગઈ છે. એપ્રિલમાં જ કુલ જીએસટી કલેક્શન 1.67 લાખ કરોડ રૂપિયા હતું, જે અત્યાર સુધીનું રેકોર્ડ સ્તર છે.

શું છે GST ના આંકડા
નાણા મંત્રાલયે જાહેર કરેલા આંકડા મુજબ સપ્ટેમ્બર મહિનામાં જીએસટીથી ગ્રોસ રેવન્યૂ 1,47,686 કરોડ રૂપિયા રહી છે. જીએસટી લાગુ થયાને આ 8મો મહિનો છે જ્યારે જીએસટી કલેક્શન 1.4 લાખ કરોડ રૂપિયાને પાર કરી ગયું છે. આ કલેક્શનમાં સીજીએસટી 25271 કરોડ રૂપિયા, એસજીએસટી 31813 કરોડ રૂપિયા, આઇજીએસટી 80464 કરોડ રૂપિયા અને સેસ 10137 કરોડ રૂપિયા છે. સપ્ટેમ્બર મહિનાનો કુલ સંગ્રહ ગયા વર્ષના સમાન મહિનાની તુલનામાં 26 ટકા વધુ રહ્યો છે. સપ્ટેમ્બર દરમિયાન જ એક દિવસમાં 49453 કરોડ રૂપિયાનું કલેક્શન થયું છે, જે કોઈ પણ દિવસે બીજા નંબરનું સૌથી વધુ કલેક્શન છે.

રાજ્યોના આંકડા શું કહે છે
રાજ્યો અનુસાર જીએસટી કલેક્શન પર નજર કરીએ તો, બિહારમાં ગયા વર્ષની તુલનામાં 67 ટકાનો ગ્રોથ જોવા મળ્યો છે. નાગાલેન્ડમાં 61 ટકાનો વધારો થયો છે. જીએસટી કલેક્શનના મામલે મહારાષ્ટ્ર આ યાદીમાં ટોચ પર છે. જ્યાં મહિના દરમિયાન 21403 કરોડ રૂપિયાનું કલેક્શન થયું છે.

આ નાણાકીય વર્ષમાં કલેક્શન કેવું રહ્યું
આ નાણાકીય વર્ષની શરૂઆત ખૂબ ધમાકેદાર રહી હતી જ્યારે એપ્રિલમાં જીએસટી કલેક્શન રેકોર્ડ 1,67,540 કરોડ રૂપિયા સુધી પહોંચી ગયું હતું. સાથે જ મે મહિનામાં કલેકશન 1,40,885 કરોડ રૂપિયા હતું, જે આ નાણાકીય વર્ષમાં સૌથી ઓછો આંકડો હતો. જૂન મહિનામાં કલેક્શન 56 ટકા વધીને 1,44,616 કરોડ રૂપિયા રહ્યું છે. ગયા વર્ષની તુલનામાં જૂન એ સૌથી ઝડપી વૃદ્ધિ હતી. જુલાઈમાં કલેક્શન 1,48,995 કરોડ રૂપિયા અને ઓગસ્ટમાં 1,43,612 કરોડ રૂપિયા હતું.