ચોમાસું / ઓડિશા-હૈદરાબાદ ને તેલંગાણામાં ચોમાસાની ધમાકેદાર એન્ટ્રી:, વરસાદને લઇ હાઇ અલર્ટ

(પ્રતિકાત્મક તસ્વીર)

નવી દિલ્હીઃ દક્ષિણ-પશ્ચિમ ચોમાસાએ ઓડિશા (Odisha) નાં કિનારે એન્ટ્રી કરતાં લોકોને ગરમીમાંથી રાહત મળી છે. સમગ્ર ઓડિશાના અલગ અલગ વિસ્તારમાં આજે વહેલી સવારથી વરસાદ વરસી રહ્યો છે. ભારતીય હવામાન વિભાગ (આઈએમડી)નાં વરિષ્ઠ વિજ્ઞાની મૃત્યુંજય મહાપાત્રાએ જણાવ્યું કે ચોમાસું આગામી ત્રણ દિવસમાં ઓડિશામાં આગળ વધશે. સમગ્ર રાજ્યમાં આગામી ૭ર કલાક સુધી મધ્યમથી ભારે વરસાદ (Rainfall) પડવાની સંભાવના છે.

આજે સવારથી બૌધ, ગજપતિ, ગંજામ, કાલાહાંડી અને કંધમાલ જિલ્લામાં વરસાદ શરૂ થઈ ગયો છે. હવામાન વિભાગનાં જણાવ્યાં પ્રમાણે ઓડિશા-હૈદરાબાદ અને તેલંગાણા (Telangana) માં ચોમાસું શરૂ થઈ ગયું છે અને આગામી ૭ર કલાક સુધી આ તમામ રાજ્યમાં ભારે વરસાદનું એલર્ટ પણ જારી કરવામાં આવ્યું છે. ભુવનેશ્વર હવામાન વિજ્ઞાન કેન્દ્રનાં ડાયરેક્ટર એચ.આર. વિશ્વાસે જણાવ્યું કે ઓડિશાના ૧૬ જિલ્લામાં ચોમાસાનો પ્રારંભ થઈ ગયો છે, જેમાં દરિયા કિનારાના તમામ ૧૧ જિલ્લા અને અન્ય પાંચ જિલ્લાનો સમાવેશ થાય છે.

(પ્રતિકાત્મક તસ્વીર)

બાકીનાં જિલ્લામાં ૪૮ થી ૭ર કલાકની અંદર વરસાદ શરૂ થઈ જશે. હૈદરાબાદ (Hyderabad) માં પણ સવારથી વાતાવરણમાં પલટો જોવા મળ્યો છે. અનંતપુર અને ચિત્તુર ઉપરાંત રાયલસીમા જિલ્લામાં વરસાદ વરસી રહ્યો છે. આંધ્રપ્રદેશમાં અનેક સ્થળે ભારે વરસાદની આગાહી કરવામાં આવી છે. બીજી તરફ ગોવા અને મહારાષ્ટ્રમાં પણ આજે સવારથી ઝરમર વરસાદ પડતાં લોકોમાં આનંદ ફેલાઈ ગયો છે. આગામી ર૪ કલાકમાં સમગ્ર મહારાષ્ટ્રમાં વરસાદ શરૂ થઈ જાય તેવી સંભાવના છે. હવામાન વિભાગે મહારાષ્ટ્ર ઉપરાંત બિહાર અને ઝારખંડમાં પણ ભારે વરસાદ પડવાની આશંકા વ્યક્ત કરી છે. પૂર્વ ઉત્તરપ્રદેશનાં કેટલાંક વિસ્તારમાં સવારથી વરસાદ પડી રહ્યો છે.