રાજ્યભરમાં ગઇકાલે મેઘો મહેરબાન જોવા મળ્યો છે. જેને લઇને રાજ્યમાં આ વખતે ભાદરવો ભરપુર જોવા મળી રહ્યો છે. રાજ્યમાં સૌરાષ્ટ્ર પંથકથી લઇને મધ્ય અને ઉત્તર ગુજરાતમાં મેઘરાજા મન મુકીને વરસી રહ્યાં છે ત્યારે ભરૂચમાં ભારે વરસાદને લઇને ભયજનક સ્થિતિનું નિર્માણ થયું છે. રાજ્યના અમદાવાદ, વડોદરા, સુરત, જુનાગઢ સહિત અનેક જિલ્લામાં વરસાદ ગત મોડી રાતે વરસ્યો છે.
જૂનાગઢમાં દામોદરકુંડ છલકાયો
જનાગઢમાં પણ મેઘરાજ વરસી રહ્યા છે ત્યારે ગઢ ગિરનાર ઉપર ભારે વરસાદને પગલે પાણી નદીઓમાં પહોંચી છે અને નદીઓ બે કાંઠે વહેતી થઈ છે. ભવનાથ વિસ્તારની નદીઓમાં પાણીની સારી એવી આવક થઈ છે. પાણીની આવક થતા દામોદરકુંડ પણ છલકાયો છે.
સુરતમાં સૌથી વધુ વરસાદ વરાછા-એ ઝોનમાં નોંધાયો
સુરત શહેરમાં માં આખી રાત વરસાદ વરસ્યો છે જેમાં સેન્ટ્રલ ઝોનમાં પોણા 2 ઈંચ વરસાદ નોંધાયો હતો જ્યારે રાંદેરમાં અડધો ઈંચ, કતારગામ 1 ઈંચ વરસાદ વરાછામાં 2 ઈંચ, વરાછા-બી માં અડધો ઈંચ વરસાદ, ઉધનામાં 1.5 ઈંચ, અઠવામાં પોણા 2 ઈંચ વરસાદ, લીંબાયતમાં પોણા 2 ઈંચ વરસાદ નોંધાયો છે. અને હજુ પણ બે દિવસ સુધી વરસાદની આગાહી છે.
અમદાવાદના અનેક વિસ્તારોમાં વરસાદ
અમદાવાદ જિલ્લા અને શહેરી વિસ્તારોમા વરસાદ ચાલુ છે. બાવળા, સાણંદ, ધોળકાના ગ્રામ્ય વિસ્તારોમાં પણ વરસાદે મહેર કરી છે. અમદાવાદમાં રાતથી જ વરસી રહ્યો છે ત્યારે વહેલી સવારથી વરસાદનુ જોર વધ્યુ છે. સેટેલાઈટ, વસ્ત્રાપુર, આનંદનગરમાં વરસાદ, શ્યામલ, નેહરુનગર, મણીનગર, દિલ્લી દરવાજા, ચાંદખેડા, ઘાટલોડિયામાં વરસાદ, ચાંદલોડિયા, ગોતા, બોપલ, શીલજ, આંબલીગામ, થલતેજ, સોલા, મેમનગર, નેહરુનગર, બાપુનગર, ઈસનપુર, નિકોલ સહિતના સમગ્ર અમદાવાદમાં ગઈકાલ સાંજથી શરુ થયેલો વરસાદ સવાર સુધી અટક્યો નથી.
કચ્છ જિલ્લો પણ વરસાદથી તરબોળ
કચ્છ જિલ્લો પણ વરસાદથી તરબોળ થયો છે.કચ્છ જિલ્લામાં થયેલા ભારે વરસાદથી નદી નાળા છલકાઈ ગયા છે. તો બીજી તરફ કેટલીક નદીઓમાં પૂરની સ્થિતિ સર્જાઈ છે. જેના કારણે વાતાવરણ પણ આહલાદક બન્યું છે. કચ્છમાં વહેતી નાગમતી નદીમાં પાંચ વર્ષ બાદ નવા નીર આવ્યા છે. જેના કારણે ખેડૂતોમાં પણ ખુશીનો માહોલ છવાયો છે.
ભરૂચમાં ભયજનક સ્થિતિ
ભરૂચમાં નર્મદા નદીનું જળસ્તર વધ્યું છે. નદીનું જળસ્તર વધતા કાંઠા વિસ્તારના ગામોને એલર્ટ કરાયા. જળસ્તર વધતા કિનારા વિસ્તારમાંથી લોકોનું સ્થળાંતર કરવામાં આવ્યું નથી. કડોદ અને નિકોરા બેટ ખાતેથી લોકોનું સ્થળાંતર કરવામાં આવ્યું છે. પોલીસ દ્વારા 25થી વધુ લોકોનું સ્થળાંતર કરવામાં આવ્યું છે. ગોલ્ડન બ્રિજ નજીક જળ સપાટી 28.5 ફૂટે પહોંચી છે. અને નર્મદા નદીએ 24 ફૂટની ભયજનક સપાટી વટાવી દીધી છે. નદીમાં પાણી 4.5 ફૂટ ઉપરથી વહી રહ્યું છે ફુરજા રોડ, ચારરસ્તા નજીક પાણી આવવાની શરૂઆત થઈ ગઈ છે.
ડાંગ - જિલ્લામાં સાર્વત્રિક વરસાદ
વહેલી સવારથી ડાંગમાં વરસાદ પડી રહ્યો છે જિલ્લાની પૂર્ણા,અંબિકા,ખાપરી નદીમાં પૂર ની સ્થિતિ નિર્માણ થઈ છે.
છેલ્લા 12 કલાકમાં આહવા : 4.5 ઇંચ, વઘઇ :4 ઇંચ, સુબિર :3.80 ઇંચ, સાપુતારા : 4 ઇંચ વરસાદ નોંધાયો છે.
રાજકોટ શહેરમાં 70 વર્ષ જૂનો વરસાદનો રેકોર્ડ તૂટ્યો
સીઝનનો સૌથી વધુ વરસાદનો રેકોર્ડ તૂટ્યો છે. 86 દિવસમાં 57 ઇંચ વરસાદ ખાબક્યો છે.
હજુ પણ હવામાન વિભાગની વરસાદની આગાહી છે. 1949 થી અત્યાર સુધીમાં 55 ઈંચ વરસાદ નોંધાયો હતો અને 2010માં 55 ઇંચ વરસાદ નોંધાયો હતો