ચોમાસાની ઋતુમાં ભેજવાળું હવામાન, વાદળછાયું વાતારણ, જીવજંતુ, કાદવ-કીચડ, ખાબોચિયાં, ગંદકી વગેરે રોગોને આમંત્રણ આપે છે. વરસાદ અને ગરમીમાં ઘણી વખત નાની ફોલ્લીઓ, ચાઠાં, ખંજવાળ અથવા ખરતા વાળની ફરિયાદો સાંભળવા મળે છે. મોટા ભાગે લોકો આ શરૂઆતી નાનાં લક્ષણોની અવગણના કરે છે અને સમયસર સારવાર લેતા નથી, જેથી સામાન્ય અને સાદા રોગો જટિલ સ્વરૂપ ધારણ કરી શકે છે. ચોમાસાની સિઝનમાં શરીર પર ગમે ત્યાં ફંગલ ઇન્ફેક્શન, ખરજવું, ગૂમડાં, એલર્જી, ખસ અને ચહેરા પર ખીલ, વાળની સમસ્યાઓ વધી શકે છે.
ચોમાસાની શરૂઆત સાથે રોગચાળો પણ વધવા લાગે છે. ઠેર-ઠેર વરસાદી પાણીનો ભરાવો અને ગંદકીના ઢગલાને કારણે પાણીજન્ય અને મચ્છરજન્ય રોગો ઝડપથી વધે છે. જેમાં મલેરીયા, ઝાડા- ઊલટી, ડેન્ગ્યુ, ચિકન ગુનિયા, ટાઈફોઈડ, વાયરલ ઈન્ફેક્શન, તાવ, કમળાને કારણે કેટલાક લોકો તો પોતાનો જીવ પણ ગુમાવી દે છે પરંતુ શું તમે જાણો છો કે તમારી નાની-નાની સાવધાની અને તકેદારી તમને આવા ગંભીર રોગોથી બચાવી શકે છે.
આ સમસ્યાઓ થાય છે
ખસ
આ અત્યંત ચેપી રોગ છે, જેના જંતુ તાપમાન અને ભેજના ફેરફારના હિસાબે ઝડપથી વધી શકે છે. પરિવારના અથવા આસપાસના લોકોને ખંજવાળ આવવી, શરીરે ખાસ કરીને આંગળાં વચ્ચે નાની ફોલ્લીઓ થવી આનાં મુખ્ય લક્ષણો છે.
ખરજવું
લાલ, કાળું અથવા ફોતરીવાળું ચાઠું થવું, જેમાં ચીરા પડી શકે અથવા પાણીમાં પલળવાથી ફોલ્લા પડી શકે છે. ચોમાસામાં ખરજવાની તકલીફો વધી શકે છે. સંવેદનશીલ ત્વચા ધરાવતી વ્યક્તિઓએ ચોમાસામાં ખાસ સંભાળ રાખવી જરૂરી છે.
વાળ ખરવા
વધુ પ્રમાણમાં વાળ ખરવા, સૂકા થવા, માથામાં ફોલ્લીઓ થવી વગેરે સમસ્યાને સાધારણ કાળજીથી દૂર રાખી શકાય છે.
ખીલ
ચહેરા પર ફોલ્લીઓ વધી જાય છે. ઉચિત ફેસવોશથી ચહેરો ધોવાથી અને ડૉક્ટરની સલાહ મુજબ ક્રીમ લગાવવાથી રાહત મળે છે.
આટલું કરો
ટુવાલ શેર કરવાનું ટાળો.
કપડાંને સૂર્યપ્રકાશમાં સૂકવો.
સ્નાન કર્યા બાદ શરીર બરાબર કોરું કરવું.
તમારાં કપડાં બીજા બધાં સાથે ન ધુઓ, ચેપ એક કપડાથી બીજા કપડામાં લાગી શકે છે.
અંદર પહેરવાના કપડા અને મોજા દરરોજ બદલો.
ઢીલાં કપડા પહેરો. ટાઇટ કપડા પહેરવાનું ટાળો.
તમારા પગ કોરા અને સાફ રાખો, ખાસ કરીને પગની આંગળીઓ વચ્ચેનો ભાગ.
ચોમાસામાં ખાસ એન્ટીબેક્ટેરિયલ સોપ, ફેસવોસ અને ટેલ્કમ પાઉડરનો ઉપયોગ કરવો.