આગાહી / ચોમાસાને લઇને દેશવાસીઓ માટે રાહતના સમાચાર, 6 ટકા વધુ વરસ્યો વરસાદ, હજુ 2 દિવસની આગાહી

• દેશમાં અત્યાર સુધી સામાન્યથી 6 ટકા વધુ વરસ્યો વરસાદ
• દેશમાં વરસાદનું જોર હજુ યથાવત રહેશેઃ હવામાન વિભાગ
• ગુજરાતમાં 2 દિવસ ભારે વરસાદની આગાહી

હવામાન વિભાગે વરસાદના માપદંડને લઇને દેશમાં 4 ડિવિઝન નક્કી કર્યા છે. જે પ્રમાણે ઉત્તર-પશ્ચિમી ભારતમાં 107 ટકા વરસાદની શકયતા છે. આ ડિવિઝનમાં જમ્મુ-કાશ્મીર, લદ્દાખ, હિમાચલ પ્રદેશ, દિલ્હી, હરિયાણા અને ઉત્તરપ્રદેશ આવે છે. જ્યારે કે દક્ષિણી વિસ્તારમાં સામાન્યથી 17 ટકા વધુ વરસાદ વરસ્યો છે આ ડિવિઝનમાં તમિલનાડુ, પુડ્ડુચેરી, કેરળ, કર્ણાટક અને આંધ્રપ્રદેશ અને તેલંગાણાનો સમાવેશ થાય છે. જ્યારે કે ઉત્તર-પશ્ચિમી વિસ્તારમાં 18થી 20 જુલાઇ સુધી વરસાદની શક્યતા છે.

હવામાન વિભાગના કહેવા પ્રમાણે મધ્યભારતમાં 12 ટકા વધુ વરસાદ વરસ્યો છે. આ ડિવિઝનમાં ગોવા, મહારાષ્ટ્ર, ગુજરાત, મધ્યપ્રદેશ, છત્તીસગઢ અને ઓડિસાનો સમાવેશ થાય છે. આ તરફ વાત કરીએ નોર્થ-ઇસ્ટની તો આ ડિવિઝનમાં 10 ટકા વધુ વરસાદ વરસશે. આ ડિવિઝનમાં બિહાર, ઝારખંડ, પશ્ચિમ બંગાળ અને ઉત્તર-પૂર્વના 7 રાજ્ય આવે છે. ઉલ્લેખનિય છે કે બિહાર, અસમના કેટલાક વિસ્તારોમાં અતિભારે વરસાદ વરસી ગયો છે.

રાજ્યમાં 2 દિવસ ભારે વરસાદની આગાહી

આગામી 2 દિવસ ગુજરાતમાં ભારે વરસાદની હવામાન વિભાગે આગાહી કરી છે. દક્ષિણ રાજસ્થાનમાં અપર એર સાયક્લોનિક્લ સર્ક્યુલેશન સર્જાયુ છે. જેને લઈને સૌરાષ્ટ્ર અને દક્ષિણ ગુજરાતમાં ધોધમાર વરસાદ પડી શકે છે. જામનગર સહિતના વિસ્તારોમાં ભારે વરસાદ થઈ શકે છે. જ્યારે અન્ય વિસ્તારોમાં સામાન્યથી મધ્યમ વરસાદ પડી શકે છે. તો દક્ષિણ ગુજરાતના વલસાડમાં ભારે વરસાદ રહેશે. સુરત, નવસારી સહિતના વિસ્તારોમાં હળવા વરસાદની શક્યતા છે. તો અમદાવાદમાં પણ વરસાદી માહોલ યથાવત રહેશે. હવામાન વિભાગ દ્વારા બે દિવસ માછીમારોને દરિયો ન ખેડવા સુચના આપવામાં આવી છે.