રાજકોટ, અમરેલી, સાબરકાંઠા, મોરબી અને નવસારી સહિતના વિસ્તારોમાં વરસાદ ખાબક્યો હતો. વાવણીલાયક વરસાદ પડતા ખેડૂતોમાં ખુશીની લાગણી જોવા મળી.
રાજકોટ પંથકમાં વરસાદ, નદીઓમાં ઘોડાપુર
રાજકોટમાં પણ વરસાદી માહોલ જોવા મળ્યો હતો. પહેલો વરસાદ જ વાવાણીલાયક થતા લોકોમાં ભારે ખુશીનો માહોલ જોવા મળ્યો હતો. તો બીજી તરફ વાતાવરણમાં ઠંડક પ્રસરતા લોકોને અસહ્ય ગરમીમાંથી રાહત મળી હતી. રાજકોટના જામકંડોરણા તાલુકામાં વરસાદ થયો છે. જસદણ, ચાવન્ડી, જામદાદાર, ગુંદાસરી, માત્રાવાડમાં વરસાદ થયો છે. 3 ઇંચ જેટલો વરસાદ ખાબક્યો છે. અનેક ગામના ચેકડેમ ઓવરફ્લો થયો છે. નાની અનેક નદીઓમાં ઘોડાપુર આવ્યા છે. વાવણી બાદ વરસાદ પડતાં ખેડૂતોમાં ખુશી જોવા મળી છે.
મોરબીના માળીયા તાલુકામાં ધોધમાર વરસાદ
મોરબીના માળીયા તાલુકામાં ધોધમાર વરસાદ થયો છે. સવારથી ભારે ઉકળાટ બાદ સાંજે વરસાદ શરૂ થયો છે. મેઘરાજાની પવન સાથે એન્ટ્રી થતા ગરમીથી રાહત મળી છે.
અમરેલી જિલ્લાના અનેક વિસ્તારોમાં વરસાદ
અમરેલી જિલ્લાના અનેક વિસ્તારોમાં પણ આજે વરસાદી માહોલ જોવા મળ્યો હતો. ખાસ કરીને બાબરાના ઘરાઈ અને દરેડ સહિતના ગામોમાં વરસાદ પડ્યો હતો. ભારે વરસાદના કારણે રસ્તાઓ પર ખેતરોમાં પાણી ફરી વળ્યા હતા. સાથે લાઠીમાં વીજળીના કડાકા સાથે વરસાજ પડ્યો હતો. ત્યારે વાવણી લાયક વરસાદ પડતા ખેડૂતોમાં ખુશીની લાગણી જોવા મળી.
સાબરકાંઠાના પોશીના પંથકમાં પણ વરસાદ
સાબરકાંઠાના પોશીના પંથકમાં પણ વરસાદી માહોલ જોવા મળ્યો હતો. વિરામબાદ વિસ્તારમાં ભારે પવન સાથે ફરી વરસાદ પડતા સમગ્ર વિસ્તારમાં ઠંડક પ્રસરી ગઈ હતી. તો બીજી તરફ નવસારી જિલ્લાના અનેક વિસ્તારોમાં પણ વરસાદી માહોલ જોવા મળ્યો હતો. ભારે વરસાદના કારણે નદી નાળાઓમાં નવા નીરનું આગમન થયું છે. તો વાવાણી લાયક વરસાદ થતા જિલ્લાના ખેડૂતોમાં ખુશીનો માહોલ છવાઈ ગયો છે.