એક અઠવાડિયાથી સમગ્ર ગુજરાતને વાયુ વાવાઝોડાએ ચગડોળે ચડાવ્યું હતું છેવટે તેની અસર નાબૂદ થતાં તેની આડઅસરરૂપે અમદાવાદ સહિત રાજ્યભરમાં વરસાદી માહોલ છવાયો છે. ગઇ કાલે શહેરમાં બે ઇંચ જેટલો વરસાદ નોંધાયો હતો. પરંતુ હજુ પણ ગુજરાતમાં ચોમાસાનું સત્તાવાર આગમન થયું નથી. સ્થાનિક હવામાન વિભાગ કહે છે હજુ નૈઋત્ય ચોમાસું ત્રણ ચાર દિવસ બાદ કોંકણ ગોવા પહોંચશે ત્યાર બાદ મુંબઇથી આગળ વધી દ.ગુજરાત તરફ વધશે.
અમદાવાદઃ એક અઠવાડિયાથી સમગ્ર ગુજરાતને વાયુ વાવાઝોડાએ ચગડોળે ચડાવ્યું હતું છેવટે તેની અસર નાબૂદ થતાં તેની આડઅસરરૂપે અમદાવાદ સહિત રાજ્યભરમાં વરસાદી માહોલ છવાયો છે. ગઇ કાલે શહેરમાં બે ઇંચ જેટલો વરસાદ નોંધાયો હતો. પરંતુ હજુ પણ ગુજરાતમાં ચોમાસાનું સત્તાવાર આગમન થયું નથી. ચોમાસા માટે નૈઋત્ય ચોમાસાની ગતિ પર હવામાન વિભાગ નજર રાખી રહ્યું છે.
શહેરમાં છેલ્લા ર૪ કલાક દરમ્યાન બે ઇંચથી વધુ વરસાદ નોંધાયો હતો. સૌથી વધુ વિરાટનગરમાં ૩.પ ઇંચ વરસાદ પડ્યો હતો. જોકે રાતભર વરસાદે વિરામ લેતાં લોકોએ રાહત અનુભવી હતી. ચાલુ ચોમાસાની સિઝનમાં શહેરનો સરેરાશ વરસાદ આશરે પોણા ત્રણ ઇંચ નોંધાયો છે. બીજી તરફ વરસાદનાં કારણે ગઇ કાલે કાલુપુરની સોદાગરની પોળમાં આવેલ એક મકાનની દીવાલ ધરાશયી થઇ હતી તો સીટીએમમાં આવેલા એક મકાનનાં ભોંયરામાં વરસાદી પાણી ભરાતાં તે ભોંયરાંનું પુરાણ કરાયું હતું.
સ્થાનિક હવામાન વિભાગ કહે છે હજુ નૈઋત્ય ચોમાસું ત્રણ ચાર દિવસ બાદ કોંકણ ગોવા પહોંચશે ત્યારબાદ મુંબઇથી આગળ વધી દ.ગુજરાત તરફ વધશે. અત્યારે તો નૈઋત્ય ચોમાસાની ગતિ પર નજર રખાતી હોઇ તેના આધારે ગુજરાતમાં સત્તાવાર ચોમાસા અંગેની વિધિવત જાહેરાત કરાશે.
ઉલ્લેખનીય છે કે વાયુ વાવાઝોડાનાં કારણે સૌરાષ્ટ્રમાં સારો એવો વરસાદ પડી રહ્યો છે. જ્યારે રાજ્યમાં ધીરે ધીરે ચોમાસું પણ જામતું જાય છે. ગઇ કાલે રાજ્યનાં 131 તાલુકામાં વરસાદ વરસ્યો હતો. જેમાં સૌથી વધુ ઉનામાં સવા બે ઈંચ વરસાદ થયો હતો.
ત્યારે બીજી બાજુ સૂત્રાપાડા અને ગીર-ગઢડામાં 2-2 ઈંચ વરસાદ નોંધાયો હતો. કોડીનારમાં પણ સવા ઈંચ અને રાજુલા, ખાંભા તેમજ જાફરાબાદમાં એક-એક ઈંચ વરસાદ પડ્યો હતો. જ્યારે માંડવી-બાલાસીનોરમાં પોણો ઈંચ, મહુવા, વંથલી, સાવરકુંડલા, ગારીયાધાર અને મહેસાણામાં અડધો ઈંચ વરસાદ પડ્યો હતો.
વરસાદની શરૂઆત થતાં ખેડૂતો પણ ખુશખુશાલ થઈ ગયા છે. જ્યારે બીજી તરફ રાજ્યભરમાં લોકોને ગરમીમાં પણ આંશિક રાહત મળી. જ્યારે હવામાન વિભાગે મહેસાણા, અમદાવાદ, ગાંધીનગરમાં આગામી ત્રણ કલાકમાં ભારે પવન ફૂંકાવાની આગાહી કરતાં જિલ્લા ડિઝાસ્ટર વિભાગ દ્વારા અધિકારીઓને સતર્ક રહેવા સૂચના આપવામાં આવી હતી.