ભારતીય હવામાન વિભાગ (IMD)એ આજરોજ ચોમાસુ કેરળ પહોંચે તેવી શક્યતા દર્શાવી છે. કેરળના તટીય વિસ્તારમાં ચોમાસાના આગમન બાદ દેશના અન્ય ભાગમાં પહોંચશે. આ અગાઉ હવામાન વિભાગે ચોમાસુ પાંચ-છ દિવસ મોડુ એટલે કે 7 જૂન સુધીમાં કેરળમાં દસ્તક આપશે તેવું અનુમાન કર્યું હતું.
હવામાન વિભાગના અનુસાર કેરળમાં આગામી 24 કલાકમાં ભારે વરસાદની આગાહી વ્યક્ત કરવામાં આવી છે. ત્યારબાદ 48 કલાકમાં ઉત્તર-પૂર્વમાં ચોમાસા આગળ વધશે. જો કે આઇએમડી દ્વારા ઉત્તર અને મધ્ય ભારતમાં આવતા અઠવાડીયે હજી પણ હિટવેવની આગાહીનું અનુમાન કર્યું છે.
હવામાન વિભાગે આગાહી કરી છે કે આજે કેરળના દરિયા કિનારે ચોમાસુ દસ્તક આપી શકે છે. સામાન્ય રીતે કેરળમાં ચોમાસાની શરૂઆત પહેલી જૂનના રોજ થઇ જતી હોય છે. જો કે આ વખતે હવામાન વિભાગે કહ્યું કે આજે કેરળમાં ચોમાસુ દસ્તક આપશે તેવી આગાહી કરી છે. આ સાથો સાથ ધીરે ધીરે ચોમાસુ ઉત્તર પૂર્વ તરફ આગળ વધે તેવું પણ અનુમાન છે.
જેથી કેરળમાં ચોમાસુ દસ્તક આપ્યા બાદ આગામી ત્રણ થી ચાર દિવસમાં પૂર્વોત્તર રાજ્યોના કેટલાક વિસ્તારોમાં દક્ષિણ પશ્ચિમ મોનસૂન આગળ વધશે. અગાઉ પણ હવામાન વિભાગે આગાહી કરી હતી કે 7મી જૂનના રોજ ચોમાસુ દસ્તક આપી શકે છે. જ્યારે સ્કાઈમેટે ચાર જૂનથી સાતમી જૂન સુધી કેરળમાં ચોમાસુ બેસે તેવી શક્યતા વ્યક્ત કરી હતી.
હવામાન વિભાગનું માનીએ તો આ વખતે ચોમાસુ સામાન્ય રહી શકે છે. આ ઉપરાંત હવામાન વિભાગે એવી પણ આગાહી કરી છે કે ઉત્તર અને મધ્ય ભારતમાં હીટવેવની સ્થિતિ યથાવત રહેશે. મંગળવાર સુધીમાં મધ્યપ્રદેશ, ઉત્તર પ્રદેશ અને રાજસ્થાનમાં ભારે હીટવેવ રહી શકે છે. જોકે, ચોમાસાની શરૂઆત બાદ લોકોને ગરમીથી રાહત મળશે.