માવઠું / ગુજરાતમાં ચોમાસા જેવો માહોલ: આ જિલ્લાઓમાં વરસાદ રીતસર તૂટી પડ્યો, હવામાનની આગાહીથી ખેડૂતોમાં ચિંતાના વાદળો

• વલસાડ જિલ્લાના વાતાવરણમાં પલટાછથી ખેડૂતોમાં ચિંતા 
• સૌરાષ્ટ્ર, કચ્છ અને દક્ષિણ ગુજરાતમાં વરસાદની આગાહી
• કમોસમી વરસાદને કારણે શાકભાજીની ખેતી કરતા ખેડૂતો ચિંતામાં

રાજ્યમાં  ગરમી વચ્ચે કમોસમી વરસાદની આગાહી કરવામાં આવી છે. ત્યારે 48 કલાક સુધી કમોસમી વરસાદ થવાની આગાહી છે. સૌરાષ્ટ્ર, કચ્છ અને દક્ષિણ ગુજરાતમાં વરસાદની આગાહી કરવામાં આવી છે.  સુરત, નવસારી અને વલસાડ  સહિતના જીલ્લામાં વરસાદની શક્યાતા છે. ઉત્તર ગુજરાતમાં વીજળી સાથે ચોમાસા જેવો માહોલ જોવા મળ્યો છે.

વલસાડ જિલ્લામાં આજે પણ વાતાવરણમાં પલટો આવ્યો હતો
વાપી સહિત સમગ્ર વલસાડ જિલ્લામાં આજે પણ વાતાવરણમાં પલટો આવ્યો હતો. હવામાન  વિભાગની આગાહી પ્રમાણે વાતાવરણમાં પલટા બાદ જિલ્લાના વાપી વલસાડ ઉમરગામ સહિતના તાલુકાઓમાં છૂટો છવાયો કમોસમી વરસાદ વરસ્યો હતો. બપોર ના સમયે  વાપી અને ઉમરગામ સહિત આસપાસના વિસ્તારમાં વીજળીના કડાકા ભડાકા સાથે ચોમાસા જેવો માહોલ સર્જાયો હતો. અચાનક વરસાદને કારણે રાહદારીઓ અને વાહન ચાલકો મુશ્કેલીમાં મુકાયા હતા. વરસાદી માહોલને કારણે રસ્તાઓ ભીંજાયા હતા. વાદળછાયા વાતાવરણ અને વરસાદને કારણે કેરીના પાકને નુકસાન ની ભીતી સેવાઇ રહી છે. આથી જિલ્લાના ખેડૂતોમાં ચિંતા નો માહોલ છે. હજુ પણ આગામી સમયમાં વલસાડ જિલ્લામાં વાતાવરણમાં પલટા અને કમોસમી વરસાદની હવામાન વિભાગની આગાહીને કારણે ખેડૂતોના જીવ અધ્ધર છે.

કમોસમી વરસાદને કારણે શાકભાજીની ખેતી કરતા ખેડૂતો ચિંતામાં
સુરતના બારડોલીમાં વાંકાનેર ગામે ગાજવીજ સાથે વરસાદી માહોલ જામ્યો હતો. હવામાન વિભાગની આગાહી વચ્ચે માવઠું પડતા ખેડૂતોનો જીવ પડીકે બંધાયો છે. કમોસમી વરસાદને કારણે શાકભાજીની ખેતી કરતા ખેડૂતો ચિંતામાં વધારો થવા પામ્યો છે.

આમોદમાં વહેલી સવારે વરસાદ વરસ્યો
ભરૂચ જીલ્લાના વાતાવરણમાં પણ પલ્ટો આવવા પામ્યો છે. ત્યારે સવારથી વાદળછાયું વાતાવરણ છવાયેલું છે. આમોદમાં વહેલી સવારે વરસાદ વરસ્યો હતો.

સર્વેનો રિપોર્ટ આવ્યા બાદ નુકસાનનો સાચો આંકડો જાણવા મળશે- સેક્રેટરી
કમોસમી વરસાદના કારણે જસદણ માર્કેટીંગ યાર્ડમાં પાક પલળ્યો છે. માર્કેટિંગ યાર્ડમાં ખુલ્લામાં પડેલો પાક પલળ્યો છે. ખેડૂતો અને વેપારીઓનાં ઘઉ, જીરૂ, ધાણા, એરંડા સહિતના પાકો પલળ્યા છે. પાક પલળવાથી માર્કેટિંગ યાર્ડમાં સર્વે કરવામાં આવ્યો છે. આ બાબતે સેક્રેટરીએ જણાવ્યું હતું કે સર્વેનો રિપોર્ટ આવ્યા બાદ નુકસાનનો સાચો આંકડો જાણવા મળશે. 
અઠવાગેટ સહિત રિંગરોડ વિસ્તારમાં ઝરમર વરસાદ
સુરત સહિત દક્ષિણ ગુજરાતના વાતાવરણમાં પલ્ટો આવવા પામ્યો છે. સુરતમાં કેટલીક જગ્યાએ ઝરમર વરસાદ વરસવા પામ્યો છે. તેમજ અઠવાગેટ સહિત રિંગ રોડ વિસ્તારમાં ઝરમર વરસાદ પડ્યો છે.