તિથલના દરિયા કાંઠે 8 ફૂટ ઉંચા ઉછળ્યા મોજા સહેલાણીઓ જીવના જોખમે મા'ણી રહ્યા છે મજા

વલસાડ: અરબી સમુદ્રમાં હાઈ ટાઈડ સર્જાઈ છે. જેના કારણે વલસાડના તિથલના દરિયામાં મોજા ઉછળ્યા છે. તિથલના દરિયામાં 8 ફુટ જેટલા મોજા ઉછળ્યા છે. તો આટલા ઉંચા મોજા ઉછળતા હોવા છતાં તંત્ર દ્વારા સાવચેતીના ભાગરૂપે કોઈ વ્યવસ્થા કરવામાં નથી આવી. સહેલાણીઓ દરિયા કિનારાની નજીક પહોંચી રહ્યા છે.

પરંતુ તંત્ર દ્વારા સાવધાની માટે કોઈ પગલા લેવામાં નથી આવ્યા. દરિયામાં અત્યારે હાઇટાઇડનો સમય ચાલી રહેલો છે. તેથી ગુજરાતના તિથલના દરિયા કિનારાનો દરિયો ગાંડો થયેલ જોવા મળી રહ્યો છે. ત્યારે તિથલના દરિયામાં આઠ ફુટથી ઉંચા તોતિંગ મોજા ઉછળી રહ્યા છે. દરિયાના આ તોફાની મૂડ ને જોવા મોટી સંખ્યામાં સહેલાણીઓ દરિયાકિનારે પહોંચ્યા છે.

આપને જણાવી દઇએ કે દરિયામાં હાલ હાઇટાઇડનો સમયગાળો ચાલી રહ્યો હોવા છતાં સ્થાનિક તંત્ર દ્વારા કોઇ પ્રકારના સુરક્ષાના પગલા લેવામાં ન આવેલ હોવાથી પ્રવાસીઓની સુરક્ષા જોખમમાં મુકાઈ હોય તેમ લાગી રહ્યું છે. કારણ કે કેટલાક સહેલાણીઓ તો દરિયા કાંઠે ઉછળતા મહાકાય મોજાઓ વચ્ચે જઇને નાહતા હોય તેવા દ્રશ્યો જોવા મળ્યા હતા. ત્યારે તંત્રની આ લાપરવાહી કોઇ પ્રવાસી માટે જીવલેણ પણ સાબિત થઇ શકે છે.

ઉલ્લેખનીય છે કે હજી થોડા દિવસ પહેલા જ તિથલના દરિયામાં નાહવા પડેલી બે મહિલાઓ ડૂબવા લાગી હતી. જેમને બચાવવા સ્થાનિક લોકો અને 108ની ટિમ કામે લાગી હતી અને મહામહેનતે બંન્નેને બચાવી લેવામાં આવી હતી. ત્યારે હાલ તિથલના દરિયા કાંઠે હાઈટાઇડ સમયગાળામાં દરિયાના તોતિંગ મોજા ઉછળી રહ્યા છે. ત્યારે કોઇ અઘટિત બનાવ ના બને તે જોવું જ રહ્યું.