આગાહી / કેરળમાં ચોમાસાનું આગમન, હવામાન વિભાગે કરી ભારે વરસાદની આગાહી

કેરળના 8 જિલ્લામાં ઓરેન્જ એલર્ટ

કેરળમાં ચોમાસાનું આગમન તો થઈ ચૂક્યું છે. પરંતુ 8 દિવસ મોડું ચોમાસું પહોંચ્યું છે. સામાન્ય રીતે ચોમાસું 1 જૂને કેરળ પહોંચતું હોય છે. પરંતુ આ વખતે મોડું પહોંચ્યું છે. હવામાન વિભાગના જણાવ્યા પ્રમાણે દક્ષિણમાં લક્ષદ્વીપના વિસ્તાર ઉપર ચક્રવાતી વિસ્તાર સર્જાયો છે. દક્ષિણ-પૂર્વ અરબ સાગરમાં લો પ્રેશર પણ સર્જાઈ શકે છે. જેના કારણે, આગામી 24 કલાકમાં પૂર્વોત્તરના ત્રિપુરામાં પ્રવેશ કરે તેવી પણ શક્યતા છે. આ સિવાય હવામાન વિભાગે 9 જૂનના રોજ કેરળના આઠ જિલ્લા તિરુવનંતપુરમ, કોલમ, અલાપુઝા, કોટટ્યમ, અર્નાકુલમ, ત્રિશુર, માલાપ્પુરમ અને કોઝિકોટમાં ઓરેન્જ એલર્ટ જાહેર કર્યું છે. 

ગુજરાતમાં જુલાઇની શરૂઆતમાં પહોંચશે

જ્યારે 10 જૂને ત્રિશુરમાં રેડ એલર્ટ જાહેર કરવામાં આવ્યું છે. અર્નાકુલમ, મલાપ્પુરમ અને કોઝિકોટ જિલ્લામાં 11 જૂને રેડ એલર્ટ જાહેર કરવામાં આવ્યું છે. આ વિસ્તારમાં ભારેથી અતિભારે વરસાદ થવાની શક્યતા છે. બીજી તરફ ગુજરાતની વાત કરીએ તો રાજ્યમાં હજૂ ચોમાસું પહોંચતા ઘણા દિવસોની વાર લાગી શકે છે.

જાણીતા હવામાન નિષ્ણાંત અંબાલાલ પટેલ મતે રાજ્યમાં જૂનના અંત અને જુલાઈની શરૂઆત સુધીમાં ચોમાસું પહોંચશે. એટલે હજૂ 10 થી 15 દિવસો તો ગુજરાત વાસીઓએ ગરમીમાં સેકાવું જ પડશે. જોકે હવામાન વિભાગ અને સ્કાયમેટની આગાહી પ્રમાણે, આ વર્ષે ચોમાસું સારૂ અને લાબું રહેવાના એંધાણ છે. સ્કાઈમેટ આ વર્ષે 93 ટકા અને હવામાન વિભાગે 96 ટકા વરસાદ થવાની શક્યતા રજૂ કરી છે.