ગુજરાતમાં ભારે વરસાદની આગાહીને પગલે અને છેલ્લા 24 કલાકથી વરસી રહેલા વરસાદને પગલે NDRFની ટૂકડીઓ તૈનાત કરવામાં આવી. કચ્છ પર વેલ માર્ક લો પ્રેશર સક્રિય થયું છે. સાયક્લોનીક સર્ક્યૂલેશન પણ સક્રિય થયું છે. બે સિસ્ટમ સક્રિય થવાથી રાજ્યના તમામ જિલ્લામાં વરસાદની આગાહી કરવામાં આવી છે
હવામાન વિભાગની આગાહીને લઇ NDRF એલર્ટ
આગાહીને પગલે રાજ્યમાં NDRFની 7 ટીમ તૈનાત કરાઈ
દક્ષિણ ગુજરાત, સૌરાષ્ટ્ર અને કચ્છમાં NDRF ની ટીમ પહોચી
હવામાન વિભાગની આગાહીને લઇ NDRF અલર્ટ મોડ પર છે. રાજ્યમાં NDRFની 7 ટીમ તૈનાત કરાઈ છે..દક્ષિણ ગુજરાત, સૌરાષ્ટ્ર અને કચ્છમાં NDRFની ટીમ મોકલાઈ છે. વલસાડ, નવસારી, સુરતમાં NDRFની ટીમ પહોંચી ગઈ છે.તો પોરબંદર, દ્વારકા, રાજકોટમાં પણ NDRFના જવાનો ખડેપગે છે. કચ્છમાં ભારે પવનની શક્યતાને લઈ NDRFની ટીમ પહોંચી છે..આ ઉપરાંત સુરતમાં NDRFની 3 ટીમ સ્ટેન્ડ ટુ રખાઈ છે. બીજી તરફ પોરબંદર, દ્વારકા અને અમરેલીના બંદરો પર 3 નંબરનું સિગ્નલ લગાવાયું છે. સાથે જ માછીમારોને દરિયો ન ખેડવાની પણ સૂચના આપી દેવાઈ છે.
શું છે આગાહી
રાજ્યમાં વરસાદી માહોલ જામ્યો છે. ત્યારે વરસાદને લઇને હવામાન વિભાગે આગાહી કરી છે. કચ્છ પર વેલ માર્ક લો પ્રેશર સક્રિય થયું છે. સાયક્લોનીક સર્ક્યૂલેશન પણ સક્રિય થયું છે. બે સિસ્ટમ સક્રિય થવાથી રાજ્યના તમામ જિલ્લામાં વરસાદની આગાહી કરવામાં આવી છે. દક્ષિણ ગુજરાત અને સૌરાષ્ટ્ર-કચ્છમાં ભારેથી અતિભારે વરસાદની આગાહી કરાઇ છે.
રાજ્યમાં વરસાદી માહોલ જામ્યો
રાજ્યમાં વરસાદી માહોલ જામ્યો છે. રાજ્યમાં ક્યાંક ધીમીધારે તો ક્યાંક ધોધમાર વરસાદ વરસ્યો છે. છેલ્લા 24 કલાકમાં રાજ્યના 174 તાલુકામાં વરસાદ પડ્યો છે. જેમાં સૌથી વધારે ખંભાળિયામાં વરસાદ પડ્યો છે. ખંભાળિયામાં સૌથી વધારે 18.5 ઇંચ વરસાદ ખાબક્યો છે. તો પોરબંદરમાં 10 ઈંચ, રાણાવાવામાં 10 ઈંચ, કલ્યાણપુરમાં 9 ઈંચ, દ્વારકામાં 7 ઈંચ, ભાણવડમાં 6 ઈંચ, વિસાવદરમાં 6 ઈંચ વરસાદ પડ્યો છે. બીજી તરફ કુતિયાણામાં 6 ઈંચ, સુત્રાપાડામાં 5 ઈંચ, મેંદરડામાં 5 ઈંચ, માણાવદરમાં 5 ઈંચ, ચીખલીમાં 4.5 ઈંચ, પારડીમાં સવા 4 ઈંચ વરસાદ વરસ્યો છે.
વરસાદને કારણે ડેમમાં પાણીની આવક
ક્યાંક ધીમીધારે તો ક્યાંક ધોધમાર વરસાદ પડ્યો છે. સારા વરસાદના કારણે રાજ્યના ડેમોમાં નવા નીર આવ્યા છે. સારા વરસાદથી સૌરાષ્ટ્રના ડેમોમાં પાણીની આવક થઇ છે. સૌરાષ્ટ્રના 17 ડેમોમાં 4 ફુટ સુધી પાણીની આવક થઇ છે. દ્વારકાના સોઢાભારથરી ડેમમાં 4.27 ફુટ પાણીની આવક થઇ છે. તો વેરાડી-1માં 2.62 ફુટ, વેરાડી-2માં 1.31 ફુટ, મીણસારમાં 0.98 ફુટ, મોરબીના મચ્છુ-3માં 0.07 ફુટ પાણી આવ્યું છે. તો બીજી તરફ જામનગરના ઉંડ-3માં 1.15 ફુટ, ભાદર ડેમમાં 0.10 ફુટ, ફોફળ ડેમમાં 0.92 ફુટ, વેણુ-2માં 0.16 આજી-1માં 0.20 ફુટ પાણીની આવક થઇ છે.