સુરેન્દ્ર નગરમાં વરસાદે તારાજી સર્જી છે. ખેતરોમાં પાણી ફરી વળ્યા છે. રોડ રસ્તા ધોવાયા છે ત્યારે ભોગાવો નદીએ બે લોકોનો ભોગ લીધો છે.
સુરેન્દ્રનગરની ભોગાવો નદીમાં બે યુવકો ડૂબ્યા
સ્થાનિકોએ એક યુવકનો મૃતદેહ બહાર કાઢ્યો
અન્ય એક યુવકની શોધખોળ હાથ ધરાઇ
સુરેન્દ્રનગરમાં ભારે વરસાદના કારણે ભોગાવો નદીમાં પૂરની સ્થિતિ સર્જાઇ છે. નદીમાં પૂરની સ્થિતિને લઇને ભોગાવો નદીમાં બે યુવકો ડૂબ્યા છે. સ્થાનિકોએ એક યુવકના મૃતદેહને બહાર કાઢ્યો છે. જ્યારે અન્ય એક યુવકની શોધખોળ હાથ ધરાઇ છે. તો ઘટનાને પગલે ફાયર વિભાગ, મામલતદાર સહિતના અધિકારીઓ ઘટનાસ્થળે પહોંચ્યા છે
સુરેન્દ્રનગર જિલ્લામાં સાર્વત્રિક વરસાદ
સુરેન્દ્રનગર જિલ્લામાં સાર્વત્રિક વરસાદના કારણે સ્થિતિ ખરાબ થઇ રહી છે. ત્યારે સુરેન્દ્રનગરના લીંબડીના ધલવાણા ગામની નદીના સામે કાંઠે ત્રણથી વધુ લોકો ફસાઇ ગયા હતા. જેમને ગ્રામજનોએ રેસ્ક્યુ કરી બચાવ્યા છે. ગ્રામજનોએ માનવસાંકળ બનાવી અને ફસાયેલા લોકોને રેસ્ક્યૂ કરી બચાવ્યા છે.
વઢવાણના અનેક ગામોમાં ખેતરોમાં પાણી ભરાતા પાકને નુકસાન
સુરેન્દ્રનગરમાં સાર્વત્રિક વરસાદ વરસ્યો છે. વઢવાણના અનેક ગામોમાં ખેતરોમાં પાણી ભરાતા પાકને નુકસાન થયું છે. કપાસ, તલ, મગફળીના પાકોને નુકસાન થયું છે. ખેરાળી, માળોદ ગામના ખેતરોમાં પાણી ભરાયા છે. લીમલી, મુજપર ગામના ખેતરમાં પણ પાણી ફરી વળ્યા છે. સરકાર નુકસાનીનો સર્વે કરે તેવી ખેડૂતો દ્વારા માંગ કરવામાં આવી રહી છે.