કુદરતી આફત / રાજકોટના આ ગામમાં પૂર આવ્યા, 40થી વધુ પશુઓ અને વાહનો પાણીમાં તણાયા

• રાજકોટના ગ્રામ્ય વિસ્તારમાં ભારે વરસાદ
• ભારે વરસાદને કારણે ગામડામાં ભરાયા પાણી
• ખીજડિયા ગામે પૂરની સ્થિતિ

સમગ્ર ગુજરાતની અંદર ભારે વરસાદની આગાહી ને લઈને રાજકોટ જિલ્લામાં સતત બે દિવસથી ધોધમાર વરસાદ વરસી રહ્યો છે ત્યારે પડધરી તાલુકાના મોટા ખીજડીયા ગામે અતિ ભારે વરસાદ પડવાથી ગામની ગૌશાળામાં થી 40 જેટલા મૂંગા પશુઓ પાણીના વેગમાં તણાયા હતા.

રાજકોટના ગ્રામ્ય વિસ્તારમાં ભારે વરસાદને કારણે પૂરની સ્થિતિ, ખીજડિયા ગામ જળબંબોળ, 40 પશુઓ અને રીક્ષા તણાયા #monsoon #rain #weather #flood pic.twitter.com/daJP1lyL39

— VTV Gujarati News and Beyond (@VtvGujarati) July 7, 2020

એક છકડો રીક્ષા પાણીમાં ગરકાવ થઇ હતી ખીજડીયા ગામ માં અતિ ભારે વરસાદ પડવાથી વીજ લાઈટ ના પોલ ધરાશાયી થયા હતા.ખીજડીયા ગામ માં વીજ લાઇટ ખોરવાઇ ગઈ હતી. 

રાજકોટમાં ડેમ ઓવરફ્લો

આજે રાજ્યમાં ભારેથી અતિભારે વરસાદની આગાહી છે. હવામાન વિભાગનું માનીએ તો, હાલમાં વરસાદની 2 સિસ્ટમો વેલમાર્ક લો પ્રેશર અને અપર એર સાયક્લોનિક સક્રિય થઈ છે. જેની અસરને પગલે સૌરાષ્ટ્ર અને દ.ગુજરાતમાં અતિભારે વરસાદ પડી શકે છે. આથી સૌરાષ્ટ્રના જિલ્લાઓમાં અલર્ટ જાહેર કરવામાં આવ્યું છે. ભારે વરસાદને કારણે નદીઓમાં પૂરની પરિસ્થિતિ સર્જાઈ છે. અને આથી લોકોને આસપાસના વિસ્તારમાં ન જવા અપીલ કરાઈ છે. આ ઉપરાંત મધ્ય ગુજરાત અને અમદાવાદમાં પણ ભારે વરસાદની શક્યતા છે. તો આ તરફ ઉત્તર ગુજરાતમાં પણ આજે વરસાદ પડી શકે છે.

રાજ્યમાં દક્ષિણ ગુજરાત અને સૌરાષ્ટ્રમાં મેઘરાજાએ જમાવટ કરી છે. અમરેલી જિલ્લામાં વરસાદી માહોલ યથાવત છે.  ધીમી ધારે વરસાદ પડી રહ્યો છે. ધીમી ધારે સતત વરસતા વરસાદના કારણે શેત્રંજી નદીમાં પાણીની આવક થતાં  બે કાંઠે વહી રહી છે. સતત વરસાદથી નદીમાં પાણીની  આવકમાં વધારો થઇ રહ્યો છે.

રાજ્યમાં વરસાદી માહોલ જામ્યો છે. ક્યાંક ધીમીધારે તો ક્યાંક ધોધમાર વરસાદ વરસ્યો છે. છેલ્લા 24 કલાકમાં રાજ્યના 215 તાલુકામાં વરસાદ થયો છે...જેમાં સૌથી વધારે કાલાવાડમાં 15.5 ઇંચ વરસાદ ખાબક્યો છે. તો પડધરીમાં 9 ઈંચ, ખંભાળિયામાં 9 ઈંચ, ધ્રોલમાં 8.5 ઈંચ, જામગનરમાં સવા 8 ઈંચ, જોડીયામાં 7.5 ઈંચ, લાલપુરમાં 7 ઈંચ, ભચાઉમાં સવા 6 ઈંચ અને લોધીકામાં 5.5 ઈંચ વરસાદ વરસ્યો છે. 

જ્યારે રાજકોટમાં સવા 5 ઈંચ, અંજારમાં 5 ઈંચ, ગાંધીધામમાં 4.5 ઈંચ, વઘઈમાં સવા 4 ઈંચ, ટંકારામાં 4 ઈંચ, કોડીનારમાં 4 ઈંચ વરસાદ નોંધાયો છે...તેમજ અન્ય તાલુકામાં દોઢ ઇંચથી લઇને ચાર ઇંચ સુધી વરસાદ વરસ્યો છે.