ભયજનક / રાજ્યમાં આજે 185 તાલુકાઓમાં વરસાદ: નદી નાળા છલકાયા, 2000થી વધુ લોકોનું સ્થળાંતર

• રાજ્યમાં આજે 185 તાલુકાઓમાં વરસાદ
• સૌથી વધુ બનાસકાંઠાના દાંતામાં વરસાદ
• દાંતામાં 4 કલાકમાં 5 ઇંચ વરસાદ વરસ્યો

વેરાવળના ડભોર ગામમાં દેવકા નદીના પાણી ઘૂસ્યા 

વેરાવળના ડભોર ગામમાં દેવકા નદીના પાણી ઘૂસી ગયા છે. વેરાવળમાં ભારે વરસાદથી નદીઓમાં પૂરની સ્થિતિ સર્જાઇ છે. જેને લઇ નદીના પાણી નીચાળવાળા વિસ્તારમાં ઘૂસી ગયા છે. વેરાવળના ડભોર ગામમાં પાણી ઘૂસી જતા ગ્રામજનોને મુશ્કેલી પડી રહી છે.

જૂનાગઢના માળીયા હાટીનામાં મેઘલ નદી ગાંડીતૂર 

જૂનાગઢના માળીયા હાટીનામાં મેઘલ નદી ગાંડીતૂર બની છે. જૂનાગઢમાં ભારે વરસાદથી મેઘલ નદીમાં પાણીની આવક થઇ છે. તો ગ્રામ્ય વિસ્તારમાં પણ ધોધમાર વરસાદ પડી રહ્યો છે.

ધોધમાર વરસાદથી બલરામ નદીમાં ઘોડાપૂર

બનાસકાંઠામાં ભારે વરસાદથી નદી-નાળા છલકાયા છે. ધોધમાર વરસાદથી બલરામ નદીમાં ઘોડાપૂર આવ્યું છે. અંબાજી, વિરમપુરમાં ભારે વરસાદ વરસ્યો છે. જેના કારણે ગંગેશ્વર ચેકડેમ ઓવરફ્લો થયો છે. ડેમનું પાણી બલરામ નદીમાં આવતા નદીમાં ઘોડાપૂર આવ્યું છે.

બોટાદ જિલ્લામાં ગઇકાલથી ધોધમાર વરસાદ

બોટાદ જિલ્લામાં ગઇકાલથી ધોધમાર વરસાદ વરસી રહ્યો છે. ભારે વરસાદથી ઘેલો નદીમાં પાણીની આવક થઇ છે. ગઢડાના ગ્રામ્ય વિસ્તારોમાં મુશળધાર વરસાદ વરસ્યો છે. ભારે વરસાદથી નદી-નાળા છલકાયા છે. સતત વરસાદથી ખેડૂતોને મોટું નુકસાન થયું છે.

ચાણોદનો મલ્હારઘાટ પાણીમાં ગરકાવ 

સરદાર સરોવર ડેમમાંથી નર્મદા નદીમાં પાણી છોડવામાં આવ્યું છે. નર્મદા નદીમાં પાણી છોડાતા ચાણોદનો મલ્હારઘાટ પાણીમાં ગરકાવ થયો છે. જેને લઇને મામલતદારે નીચાણવાળા વિસ્તારની મુલાકાત લીધી છે...અને લોકોને સલામત સ્થળે જવા માટે અપીલ કરી છે.

ગીર સોમનાથમાં ભારે વરસાદના કારણે નદીઓમાં ઘોડાપૂર

ગીર સોમનાથમાં ભારે વરસાદના કારણે નદીઓમાં ઘોડાપૂર આવ્યું છે. ધોધમાર વરસાદથી સરસ્વતી નદીમાં ઘોડાપૂર આવતા નદીના પાણી હાઇવે પર ફરી વળ્યા છે. જેના કારણે વેરાવળ-કોડિનાર નેશનલ હાઇવે પર પાણી ભરાઇ ગયા છે. નદીના પાણી હાઇવે પર ફરી વળતા વાહનચાલકોને મુશ્કેલી પડી રહી છે.

પંચમહાલના હડફ ડેમમાંથી પાણી છોડાયું

પંચમહાલના હડફ ડેમમાંથી પાણી છોડવામાં આવ્યું છે. હાલ હડફ ડેમમાં  કુલ 1 હજાર 570 ક્યૂસેક પાણીની આવક થઇ છે. જેને લઇ ડેમનો એક ગેટ એક ફૂટ સુધી ખોલી દેવામાં આવ્યો છે. ડેમમાંથી પાણીની જાવક 1 હજાર 358 ક્યૂસેક છે. જ્યારે ડેમનું રુલ લેવલ 166.09 મીટર છે.

કચ્છના અબડાસામાં ધોધમાર વરસાદ

કચ્છના અબડાસામાં પણ ધોધમાર વરસાદ ખાબક્યો છે. ધોધમાર વરસાદથી નદીમાં ઘોડાપૂર આવ્યું છે. ભારે વરસાદથી બીટ્ટા ગામની નદી બે કાંઠે વહેતી થઇ છે. નદીના પાણી મુખ્યમાર્ગ પર ફરી વળ્યાં છે. જેના કારણે બીટ્ટા-નખત્રાણાને જોડતો માર્ગ બંધ થઇ ગયો છે.

રાજ્યમાં આજે 185 તાલુકાઓમાં વરસાદ નોંધાયો

• સૌથી વધુ બનાસકાંઠાના દાંતામાં વરસાદ ખાબક્યો
• દાંતામાં 4 કલાકમાં 5 ઇંચ વરસાદ ખાબક્યો
• પંચમહાલના હાલોલમાં 4 ઇંચ વરસાદ ખાબક્યો
• વડોદરા 3 ઇંચ. વંથલી 3 ઇંચ, ગોધરામાં 3 ઇંચ વરસાદ
• મેંદરડા 2 ઇંચ, વિસાવદર 2 ઇંચ, કાલોલ 2 ઇંચ વરસાદ
• કોટડાસાંગણી અને લોધિકામાં 2-2 ઇંચ વરસાદ
• મોરવા હડફ અને ઘોઘંબામાં 2-2 ઇંચ વરસાદ
• બાબરા, ઉમરગામ, બોટાદમાં 2-2 ઇંચ વરસાદ
• સતલાસણા, અમીરગઢ અને કપરાડામાં 2-2 ઇંચ વરસાદ
• 30 તાલુકાઓમાં 1 ઇંચ કરતા વધુ વરસાદ નોંધાયો
• 50 તાલુકાઓમાં અડધો ઇંચ વરસાદ નોંધાયો