આગાહી / આગામી 48 કલાકમાં દેશના અનેક રાજ્યોમાં મન મુકીને વરસશે મેઘરાજા, જાણો ગુજરાતની સ્થિતિ

• 48 કલાકમાં ભારે વરસાદની આગાહી
• અનેક રાજ્યમાં વરસાદની શક્યતા

હવામાન વિભાગે આગામી 2 દિવસમાં બિહારના અનેક વિસ્તારોમાં ભારે વરસાદની શક્યતા વ્યક્ત કરી છે. તો આગામી 24 કલાકમાં કર્ણાટકના તટીય વિસ્તારોને પણ મેઘરાજા ઘમરોળી શકે છે. આ ઉપરાંત કોંકણ અને ગોવામાં પણ ભારે વરસાદની શક્યતા વ્યક્ત કરાઈ છે.

અરવલ્લીના ભિલોડામાં વરસાદ ખાબક્યો 

અરવલ્લીના ભિલોડામાં વરસાદ ખાબક્યો હતો. એકાએક બદલાયેલા વાતાવરણ સાથે વરસાદ પડવાની શરૂઆત થઇ હતી. ભારે પવન સાથે વરસાદ પડતા ભિલોડાના રસ્તાઓ પાણી પાણી થયા હતા. તો વાવણી લાયક વરસાદ થતાં ખેડૂતોમાં પણ આનંદની લાગણી જોવા મળી રહી છે. 

રાજ્યમાં છેલ્લા 24 કલાકમાં અનેક જગ્યાએ પડ્યો વરસાદ 

છેલ્લા 24 કલાકમાં રાજ્યના 45 તાલુકામાં વરસાદ પડ્યો છે. જેમાં સૌથી વધુ જૂનાગઢના માળિયામાં 2.5 ઈંચ વરસાદ પડ્યો છે. જ્યારે ગઢડામાં સવા 2 ઈંચ, કુતિયાણામાં 2 ઈંચ વરસાદ પડ્યો છે. તો તાલાલામાં 2 ઈંચ, મેંદરડામાં પોણા 2 ઈંચ વરસાદ પડ્યો છે. જ્યારે રાણાવાવમાં પોણા 2 ઈંચ, માણાવદરમાં 1.5 ઈંચ વરસાદ, ગીર ગઢડામાં સવા ઈંચ, વડિયામાં સવા ઈંચ વરસાદ પડ્યો છે. જ્યારે ચોર્યાસીમાં 1 ઈંચ, ગોંડલમાં પોણો ઈંચ વરસાદ પડ્યો છે. તો ભાણવડ, વિસાવદર, ખંભાળિયા, ઉમરગામમાં પોણો ઇંચ વરસાદ પડ્યો છે. જ્યારે માંડવી અને લાલપુરમાં અડધો ઇંચ વરસાદ પડ્યો છે.