મેઘમહેર / મેઘરાજાની ધમાકેદાર બેટિંગથી રાજકોટવાસીઓમાં આનંદની લહેર, 24 કલાકમાં 8 ઈંચ વરસાદ

રાજ્યના વડોદરામાં મેઘરાજાએ ધમાકેદાર બેટિંગ કરી છે ત્યારે રાજકોટમાં પણ ભારે વરસાદ વરસ્યો છે. શહેરમાં 24 કલાકમાં 8 ઈંચ જેટલો વરસાદ વરસ્યો છે. જ્યારે છેલ્લા 5 કલાકમાં 6 ઈંચ વરસાદ વરસ્યો છે. જેને લઇને અનેક વિસ્તારમાં પાણી ભરાયા છે. ભારે વરસાદને પગલે નીચાણવાળા વિસ્તારોમાં રહેતા લોકોને હાલાકી ભોગવવી પડી રહી છે. મહત્વનું છે કે બપોરના બે વાગ્યા બાદ મેઘરાજાની ધમાકેદાર ઈનિંગ શરૂ થઇ હતી. તો રાજકોટવાસીઓએ વરસાદમાં રમઝટ બોલાવી. ટ્રેકટરમાં સવાર થઇને વરસાદની મજા માણી.

રાજકોટના લક્ષ્મીનગર, રિંગરોડ, યાજ્ઞિકરોડ, કાલાવડ રોડ સહિત શહેકના અનેક વિસ્તારમાં રોડ પર પાણી ફરી વળ્યા. જેને લઇને શહેરીજનોને ભારે મુશ્કેલીનો સામનો કરવો પડી રહ્યો છે. જ્યારે તંત્ર દ્વારા વરસાદ દરમિયાન બહાર ન જવાની અપીલ કરવામાં આવી છે. 

સૌરાષ્ટ્ર કલા કેન્દ્ર વિસ્તારમાં ઘરમાં ઘુસ્યા પાણી

રાજકોટ ભારે પવન સાથે ધોધમાર વરસાદ થયો છે. વરસાદથી સૌરાષ્ટ્ર કલા કેન્દ્ર વિસ્તારમાં ઘરમાં પાણી ઘુસ્યા છે. સોસાયટીમાં પાણી ઘુસતા સ્થાનિકો મુશ્કેલીમાં મુકાયા છે. અમૃત ધારા સોસાયટીમાં ઘરમાં પાણી ધુસી ગયા છે.

RMC કોટર પાસે દિવાલ પડી

રાજકોટ શહેરમાં કાલાવાડ રોડ પર RMC કોટરની દિવાલ પડી હોવાની ઘટના સામે આવી છે. જોકે દિવાલ પડતા કોઇ જાનહાની થવા પામી નથી.

મોટી દુર્ઘટના ટળી

શહેરના લક્ષ્મીનગર વિસ્તારમાં ભારે વરસાદ થતા નાળુ પાણીમાં ગરકાવ થયુ છે. પાણી વધારે હોવાના કારણે પોલીસે ગરનાળામાં વાહનો ન ચલાવવાના આદેશ આપ્યા છે. આ ગરનાળામાં પાણી ભરાવતા બાળકો અંદર નહાવા પડ્યા હતા. પાણીમાં બાળકો હોવા છતા PGVCLની પૂર ઝડપે ગાડી નિકળી હતી. આ દરમિયાન બાળકો ખસી જતા મોટી દુર્ઘટના ટળી છે.

બી.આર.ટી.એસ રસ્તો પણ બંધ કરાયો

રસ્તા પર પાણી ભરાતા રીંગરોડ રાધે ચોકડી પાસે ટ્રાફિક જામના દ્રશ્યો સર્જાયા હતા. ઓવરબ્રિજ પર 2 કિલોમીટર સુધી વાહનોની લાઈનો લાગી હતી. તો BRTS રસ્તો પણ બંધ કરવામાં આવ્યો હતો. જોકે યાજ્ઞિક રોડ પર જ્યારે ટ્રાફિક જામ સર્જાયો ત્યારે પોલીસ હાજર હોવા છતા તેમણે ટ્રાફિકને હળવો કરવાની જહેમત ઉઠાવ ન હતી. ટ્રાફિક પોલીસ ગાડીમાંથી પણ ન ઉતરી અને સરકારી ગાડીમાં બેઠા બેઠા પોલીસ કર્મી જોતા રહ્યા હતા. ટ્રાફિક પોલીસ દ્વારા ટ્રાફિક ક્લિયર ન કરાયો.

વાન બંધ થતા વિદ્યાર્થીઓએ માર્યા ધક્કા

પાણી ભરાવવાના કારણે નાળા પાસે સ્કૂલ વાન બંધ પડી હતી. સ્કૂલવાન બંધ થતા વિદ્યાર્થીઓને હાલાકી ભોગવવાનો વારો આવ્યો હતો. વાન બંધ થતા વિદ્યાર્થીઓએ ધક્કા માર્યા હતા. સ્થાનિકોની મદદથી વાનને પાણીમાંથી બહાર કઢાઈ હતી.

વીરપુર આસપાસના ગામડામાં વરસ્યો વરસાદ

જેતપુરમાં ઘણા સમયથી ખેડૂતો વરસાદની રાહ જોઈ રહ્યા હતા. લાંબા વિરામ બાદ જેતપુરમાં ફરી વરસાદનું આગમન થયુ છે. જેતપુર અને વીરપુરમાં મેઘરાજા મહેરબાન થયા છે. વીરપુરના આસપાસના ગામડાઓમાં વરસાદ વરસ્યો છે. ભારે વરસાદને પગલે નીચાણવાળા વિસ્તારમાં પાણી ભરાયા છે. લાંબા સમય બાદ વરસાદ થતા ખેડૂતોમાં ખુશીનો માહોલ જોવા મળ્યો છે.

વાસાવડી નદીમાં ઘોડાપૂર, અમરેલીનો રસ્તો થયો બંધ

ભારે વરસાદ થતા ગોંડલની વાસાવડી નદીમાં ઘોડાપૂર આવ્યુ છે. નદીમાં પાણીની આવક થતા કોઝવે પર પાણી ફરી વળ્યા હતા. કોઝવે પર પાણી ભરાતા ગોંડલ, દેરડી,બગસરા, અમરેલીનો રસ્તો બંધ થયો છે. રસ્તા પર પાણી હોવાના કારણે વાહન વ્યવહાર ઠપ્પ થયો છે. જેને લઈને લોકોને હાલાકી ભોગવવાનો વારો આવ્યો છે.