ક્રિકેટ જગતમાં ઘણી અનોખી લવ સ્ટોરીઝ જોવા મળે છે. જેમાંથી કેટલાકે બોર્ડર પાર લગ્ન કર્યા તો કેટલાક ક્રિકેટરોએ બોલિવૂડ અભિનેત્રીઓ સાથે લગ્ન કર્યા. જોકે, પાકિસ્તાનના મોહમ્મદ આમિરની કહાની આ બધાંથી અલગ છે. તેના જીવનના સૌથી મુશ્કેલ સમયે તેણે જીવનસાથી પસંદ કર્યો હતો અને પછી તેની સાથે લગ્ન કરી લીધા. પાકિસ્તાનનો આ ક્રિકેટર મેચ ફિક્સિંગના આરોપમાં ઈંગ્લેન્ડમાં સજા ભોગવી રહ્યો હતો, ત્યારે તેને પોતાની જ વકીલ સાથે પ્રેમ થઈ ગયો.
ક્રિકેટ જગતમાં અનોખી લવ સ્ટોરી છે આ પાકિસ્તાની ક્રિકેટરની
પાકિસ્તાનનો આ ક્રિકેટર પર લાગ્યો હતો મેચ ફિક્સિંગનો આરોપ
તેનો કેસ લડી રહેલી વકીલ સાથે જ થઈ ગયો પ્રેમ
મોહમ્મદ આમિરનો ફિક્સિંગ કેસ લડી રહી હતી નરગિસ
વર્ષ 2010માં મોહમ્મદ આમિર મેચ ફિક્સિંગના વિવાદમાં ફસાઈ ગયો હોવાના કારણે ઇંગ્લેન્ડમાં હતો, જ્યાં કેસની સુનાવણી ચાલી રહી હતી. ઇંગ્લેન્ડ સામેની ટેસ્ટ મેચમાં મોહમ્મદ આમિર અને મોહમ્મદ આસિફે તત્કાલીન કેપ્ટન સલમાન બટ્ટના કહેવાથી ઇરાદાપૂર્વક નો બોલ ફેંક્યો હતો. આ આરોપ બાદ આમિર પર પાંચ વર્ષ માટે પ્રતિબંધ મૂકાયો હતો. આમિરનો મામલો પાકિસ્તાની મૂળની નરગિસ લડી રહી હતી.
આ કેસની સુનાવણી દરમિયાન બંનેને પ્રેમ થઈ ગયો અને તેમણે લગ્ન કરી લીધા. જોકે, તે સમયે કોઈને આ વિશે જણાવવામાં આવ્યું નહોતું. આમિરના મુશ્કેલ સમયમાં નરગિસ તેની સાથે હતી. જેલમાં સજા કાપ્યા બાદ આમિર પાકિસ્તાન આવ્યો હતો અને 2014માં બંનેએ સંપૂર્ણ ધાર્મિક વિધિઓ અને રિવાજો સાથે લગ્ન કર્યા હતા.
મોહમ્મદ આમિરે પ્રતિબંધ બાદ શાનદાર વાપસી કરી હતી
મોહમ્મદ આમિરે 17 વર્ષની ઉંમરે પાકિસ્તાન ક્રિકેટમાં પોતાની ઓળખ બનાવવાની શરૂઆત કરી હતી. તે તેની ગતિ માટે જાણીતો હતો. વર્ષ 2009માં, આમિરને પાકિસ્તાનની રાષ્ટ્રીય ટીમમાં તક આપવામાં આવી હતી. જોકે, એક વર્ષ બાદ ઇંગ્લેન્ડ સામેની મેચ દરમિયાન સ્પોટ ફિક્સિંગ માટે તેના પર પાંચ વર્ષ માટે પ્રતિબંધ મૂકાયો હતો. 2015માં તે ક્રિકેટની દુનિયામાં પરત ફર્યો હતો
આમિર પર એ સમયે પ્રતિબંધ હતો જ્યારે ફાસ્ટ બોલર પાસે સૌથી વધુ તક હોય છે, તેમ છતાં આમિર 2016માં પાકિસ્તાનની ટીમમાં પાછો ફર્યો હતો. સતત પ્રદર્શન કરીને તેણે ફરીથી વિશ્વના મંચ પર પોતાનું નામ બનાવ્યું. 2017ની ચેમ્પિયન્સ ટ્રોફીની ફાઇનલમાં આમિરે પાકિસ્તાનને ભારત સામે આકર્ષક બોલિંગ કરીને ટાઇટલ જીતવામાં મદદ કરી હતી. થોડા સમય પહેલાં તે ટેસ્ટ ક્રિકેટમાંથી નિવૃત્ત થયો હતો. જોકે, તે વનડે અને ટી20 ટીમોમાંથી પણ બહાર છે.