અમદાવાદ / મોદી સ્ટેડિયમ પર એટેકની ધમકીઃ સાયબર ક્રાઈમ પોલીસની ટીમ ત્રણ રાજ્યમાં ત્રાટકી, ચોંકાવનારી માહિતીઓ મળી

• ગુજરાત સાયબર ક્રાઈમ પોલીસને મળી મોટી સફળતા
• મોદી સ્ટેડિયમ પર એટેકની ધમકી આપવાના મામલે બે આરોપીઓની ધરપકડ
• મધ્યપ્રદેશમાં સાયબર ક્રાઈમની ટીમે દરોડામાં વધુ ચોંકાવનારી માહિતી મળી

 ‘શીખ ફોર જસ્ટિસના સમર્થકો નરેન્દ્ર મોદી સ્ટેડિયમમાં ઘૂસી જશે. મેચના દિવસે લોકો સલામત રહેવા માગતા હોય તો પોતાના ઘરમાં રહે’ તેવી ખાલિસ્તાન મૂવમેન્ટ ચલાવતા ગુરપતવંતસિંહ પન્નુના અવાજમાં ધમકી વાઈરલ કરનાર બે શખ્સોને સાયબર ક્રાઇમની ટીમે મધ્યપ્રદેશથી ઝડપી લીધા હતા. આ કાંડમાં સાયબર ક્રાઈમ પોલીસે ત્રણ અલગ અલગ રાજ્યમાં દરોડા પાડ્યા છે, જેમાં વધુ ચોંકાવનારા ખુલાસાઓ થાય તેવી પણ શક્યતા છે.     
મધ્યપ્રદેશના સતનામાંથી બે આરોપીઓની ધરપકડ કરાઈ
અમદાવાદના નરેન્દ્ર મોદી સ્ટેડિયમ ખાતે યોજાયેલી ભારત-ઓસ્ટ્રેલિયા મેચ પહેલાં લોકોમાં ડર ફેલાવવા માટે પ્રી-રેકોર્ડેડ મેસેજ વાઈરલ કરવામાં આવ્યો હતો, જેમાં ખાલિસ્તાન મૂવમેન્ટ ચલાવતા ગુરપતવંતસિંહ પન્નુના અવાજમાં એવો ઉલ્લેખ હતો કે મેચના દિવસે લોકો સલામત રહેવા માગતા હોય તો પોતાના ઘરમાં રહે, કેમ કે શીખ ફોર જસ્ટિસના સમર્થકો સ્ટેડિયમમાં ઘૂસી જશે. આ મેસેજને લઇ એક્ટિવ બનેલી સાયબર ક્રાઇમ બ્રાંચની ટીમે મેસેજને ટ્રેસ કરી તેને મધ્યપ્રદેશના સતના જિલ્લામાંથી રાહુલ દ્વિવેદી અને નરેન્દ્ર કુશવાહને ઝડપી લીધા હતા. પોલીસે તેમના ઘરે તપાસ કરતાં તેમની પાસેથી મેસેજ વાઈરલ કરવા માટે વપરાતાં ૧૧ સિમબોક્સ અને ૧૬૮ ‌સિમકાર્ડ કબજે લીધાં હતાં. નરેન્દ્ર અને રાહુલ પોતાના ઘરમાં જ બોગસ ટેલિફોન એક્સચેન્જ ધરાવતા હતા. પ્રાથમિક તપાસમાં પોલીસને એવું જાણવા મળ્યું છે કે આવા મેસેજ વાઈરલ કરવાના તેમને રૂપિયા મળતા હતા.

સાયબર ક્રાઇમની ટીમે બંને યુવાનોને મધ્યપ્રદેશથી ઝડપી લીધા
પ્રો ખાલિસ્તાન મૂવમેન્ટ ચાલી રહી છે ત્યારે જ આવા મેસેજને લઇ લોકોમાં ભય ફેલાય તેવી સ્થિતિનું નિર્માણ થયું હતું, જેના પગલે અમદાવાદ ક્રાઇમ બ્રાંચના જેસીપી પ્રેમવીર સિંઘ દ્વારા આ દિશામાં તપાસ શરૂ કરવાના આદેશ આપવામાં આવ્યા હતા. ક્રાઇમ બ્રાંચ ડીસીપી ચૈતન્ય માંડલિક અને સાયબર ક્રાઇમ બ્રાંચના ડીસીપી અજિત રાજિયાની ટીમો કામે લાગી ગઇ હતી. સાયબર ક્રાઇમની ટીમે બંને યુવાનોને મધ્યપ્રદેશથી ઝડપી લીધા હતા.
લોકોએ ગુરપતવંતસિંહ પન્નુના અવાજમાં પ્રી-રેકોર્ડેડ મેસેજ મોટી સંખ્યામાં વાઇરલ કર્યા હતા. તેમણે આવાં ટ્વીટ પણ કર્યાં હતાં. બંને યુવકો વિરુદ્ધ અનલોફુલ એક્ટિવિટીઝ પ્રિવેન્શનલ એક્ટ (યુએપીએ) અંતર્ગત ફરિયાદ નોંધી તપાસ શરૂ કરી હતી. આ બંને યુવકોને પૈસા મળતાં તેમણે સ્થાનિક વિસ્તારમાંથી સિમબોક્સની ખરીદી કરી છે. યુવાનો વોઇસકોલ દ્વારા ગુજરાતના પ્રતિષ્ઠત લોકોને ધમકીભર્યા મેસેજ મોકલતા હતા. સામાન્ય રીતે ઇન્ટરનેશનલ કોલને લોકલ કોલમાં ડાઈવર્ટ કરવા માટે વોઇપન ઉપયોગ કરવામાં આવતો હોય છે. 
રાહુલ દુબઈમાં ઇલેક્ટ્રિકનું કામ કરવા ગયો અને શાતિર ઠગ બનીને આવ્યો
રાહુલ દુબઈમાં ગયો ત્યારે તેણે ઇન્ટરનેશનલ કોલ કરવા માટે કોમ્યુનિકેશન સિસ્ટમ વિશેની માહિતી વિદેશી લોકો પાસેથી લીધી હતી. ત્યાર બાદ ઇન્ટરનેશનલ વોઇપ કોલને ડોમેસ્ટિક વોઇપ કોલમાં કેવી રીતે કન્વર્ટ કરવા તે પણ શીખ્યો હતો. આ સિવાય ઇન્ટરનેશનલ કોલ કરવા માટે ડમી ટેલિકોમ એક્સેચન્જ કેવી રીતે કામ કરે છે તે પણ શીખ્યા બાદ તેણે પોતે કમિશન પર વિદેશીઓ સાથે ભાગીદારી કરી હતી. સંપૂર્ણ તાલીમ લઇ લીધા બાદ રાહુલ પરત આવી ગયો હતો, જ્યાં તેણે પોતાનું ટેલિફોન એક્સેન્જ ઊભું કર્યું હતું.