લોકશાહીનાં પર્વ પહેલા યોગાનું યોગ હોળીનો તહેવાર આવી રહ્યો છે ત્યારે દેશવાસીઓમાં રંગોનો તહેવાર ઉજવવા માટે ખૂબ ઉત્સાહ જોવાં મળી રહ્યો છે. બજાર વિવધ રંગોથી ઉભરાયું છે. દુકાનો અવનવી પિચકારીઓથી લદોલદ છે.
લોકો એકબીજાને રંગોથી વધાવવા માટે ઉત્સુક છે. ત્યારે વડોદરા શહેરનાં લોકો પણ હોળી અને ધુળેટીને હૈયાનાં ઉત્સાહથી અને પ્રકૃતિનાં રંગોથી રગોથી મનાવવા થનગની રહ્યાં છે. આ બધાં વચ્ચે લોકસભા ચૂંટણી પહેલાં બજારોમાં મોદી પિચકારીએ પણ આકર્ષક જમાવ્યું છે.
રંગોનાં તહેવારે ઘરનાં દ્વારે અને ભરચોકમાં દસ્તક દઈ દીધી છે. બજારો વિવિધ રંગોથી ઉભરાયાં છે. કેમિકલ યુક્ત રંગો અને પ્રાકૃતિક રંગોથી દુકાનો શોભી રહી છે અને ગ્રાહકોને આકર્ષી રહી છે. એક એક દુકાનની દિવાલો અને છત અને અવનવી પિચકારીઓથી લદોલદ છે.
રંગોનાં આ તહેવારમાં બજારનું વાતાવરણ પણ રંગબેરંગી થઈ ગયું છે. આ તહેવાર રંગોનો તહેવાર તો છે જ પરંતુ અસત્ય સામે સત્યનાં વિજયનું પણ પ્રતિક છે. પરંતુ બાળકો માટે શું સત્ય ને શું અસત્ય બસ તેમને તો આ વખતે બજારમાં જોવા મળતી મોદી પિચકારીથી જ બાળગોઠિયાઓ પર આક્રમણ કરી દેવું છે. આ વખતે સમગ્ર રાજ્યોની બજારો સહિત વડોદરાની બજારોમાં અવનવી પિચકારીઓ સાથે સાથે મોદી પિચકારીએ પણ આકર્ષણ જમાવ્યું છે. વડીલો બાળકો માટે મોદી પિચકારીની માંગ કરી રહ્યાં છે.
રાજ્યમાં લોકશાહીનાં પર્વ એવાં લોકસભા ચૂંટણી પ્રચારમાં આરોપ-પ્રતિઆરોપનાં હુમલાઓ શરૂ થાય તે પહેલાં લોકો આ રંગો તહેવારને ભરપૂર રીતે માણી લેવાનાં મૂડમાં છે. ચૂંટણી અને હોળી બંન્નેનો માહોલ દેશમાં મિશ્ર થઈ ગયો છે. બજારમાં બાળકોની પિચકારીઓ પર નેતાઓનાં ફોટાઓ લાગેલાં છે.
પ્રચારની આ પણ એક રીત છે. જો કે વડીલો પ્રાકૃતિક કલરનો આગ્રહ રાખી રહ્યાં છે અને રંગોનો આ તહેવાર સૌહાર્દપૂર્ણ વાતાવરણમાં ઉજવાય તેવી મનોકામના કરી રહ્યાં છે. વડોદરા શહેરમાં લોકો દરેક તહેવાર પોતાની રીતે ઉજવે છે પણ આ વખતે કલરફુલ હોળીની મજા લેવા માટે ઇકોફ્રેન્ડલી રંગ અને પેકીંગ કલરની પસંદગી વધુ કરતા જોવાં મળ્યાં. તેનાં કારણે વેપારીઓ પણ ખરાબ કેમિકલ યુક્ત કલરની બદલે ફક્ત ઇકોફ્રેન્ડલી કલરનું વેચાણ કરતા થયાં છે.
હોળી એ રંગોનો તહેવાર છે. પરંતુ બદલાતા સમયમાં અને બદલાતા રાજકારણમાં હોળીનાં તહેવાર પર રાજકારણનાં રંગોનાં છાંટણા થવાની શરૂઆત થઈ ચૂકી છે. ફરક માત્ર એટલો છે કે રાજકારણમાં કાદવ ઉછાળ પ્રવૃત્તિ છે અને હોળી ધુળેટીનાં સામાજિક તહેવારમાં રંગોનાં વધામણાં છે. પરંતુ વડોદરાનાં રોડ ઉપર દેખાતી આ રંગબેરંગી પિચકારીઓ અને પ્રાકૃતિક કલરનાં સ્ટોલ જોતાં વડોદરાનાં સમજદાર નાગરિકો અને દુકાનદારોને તેમની જાગૃતતા બદલ સલામ કરવાનું મન થયા વગર રહે નહીં.